उत्पत्ती 45

योसेफ आपल्या भावांना ओळख देतो

1 आता मात्र आपल्या सेवकांसमोर योसेफाचा भावनावेग अनावर झाला आणि तो मोठ्याने ओरडला, "सगळ्यांनी माझ्या समक्षतेतून बाहेर जावे!" योसेफाने तिथे कोणी नसताना स्वतःला आपल्या भावांसमोर प्रगट केले. 2 मग तो इतक्या मोठमोठ्याने रडू लागला की, ते इजिप्तच्या लोकांनी ऐकले आणि फारोहच्या घराण्यातील लोकांनीही ते ऐकले.

3 तेव्हा योसेफ आपल्या भावांना म्हणाला, "मी योसेफ आहे! माझे वडील अद्याप जिवंत आहेत काय?" परंतु त्याचे भाऊ इतके घाबरले होते की त्यांच्या मुखातून एकही शब्द बाहेर पडेना.