Mateus 3

बाप्तिस्मा करणारा योहान मार्ग तयार करतो

1 त्याच दिवसात, बाप्तिस्मा करणारा योहान आला व यहूदीयाच्या अरण्यात गेला व लोकांना संदेश देऊ लागला, 2 व म्हणाला, "पश्चात्ताप करा, कारण स्वर्गाचे राज्य जवळ आले आहे." 3 तो हाच आहे ज्याच्याबद्दल संदेष्टा यशायाह बोलला होता:

"अरण्यात घोषणा करणार्‍या एकाची वाणी झाली,

‘प्रभूसाठी मार्ग तयार करा,

त्यांच्यासाठी मार्ग सरळ करा.’ "*3:3 यश 40:3

4 योहानाचा पोशाख उंटाच्या केसांपासून तयार केलेला आणि त्याच्या कंबरेला चामड्याचा पट्टा बांधलेला होता. त्याचे भोजन टोळ आणि रानमध होते. 5 यरुशलेम, सर्व यहूदीया आणि यार्देन प्रांतातील प्रत्येक भागातून लोक त्यांच्याकडे आले. 6 त्यांनी पापे कबूल केल्यानंतर यार्देन नदीमध्ये योहानाकडून त्यांचा बाप्तिस्मा केला जात असे.