Lucas 22

पत्रुसले येशूलाई तीन पल्ट इन्कार गरेका

54 त्यसपछि तिनीहरूले उहाँलाई पक्रेर लगे। अनि उहाँलाई प्रधान पुजारीको घरमा लगे। पत्रुसले उहाँलाई टाढैबाट पछ्याए। 55 तर जब मानिसहरू चोकको बीचमा आगो बालेर साथसाथै बसेका थिए, पत्रुस पनि तिनीहरूसितै बसे। 56 तब एउटी सेविकाले आगोको उज्यालोमा तिनलाई त्यहाँ बसिरहेको देखी। त्यसले तिनलाई नजिकैबाट नियालेर हेरी र भनी, "यी मानिस पनि तिनीसँगै थिए।"

57 तर तिनले इन्कार गरेर भने, "ए नारी, म उहाँलाई चिन्दिनँ।"

58 केही बेरपछि कोही अर्को व्यक्तिले तिनलाई देख्यो र भन्यो, "तिमी पनि तिनीहरूमध्येकै एक हौ।"

पत्रुसले जवाफ दिए, "ए मानिस, म होइनँ।"

59 लगभग एक घण्टापछि अर्को एक जनाले दृढतासाथ भन्यो, "साँच्‍चै नै यी मानिस तिनीसँगै थिए; किनकि यिनी पनि गालीली हुन्।"

60 पत्रुसले जवाफ दिए, "ए मानिस, तिमी के भनिरहेछौ, म जान्दिनँ।" तिनी बोलिरहेकै बेलामा भाले बास्यो। 61 अनि प्रभुले फर्केर पत्रुसलाई सोझै हेर्नुभयो। तब पत्रुसले तिनलाई प्रभुले भन्‍नुभएको यो वचन सम्झे: "आज भाले बास्‍नुभन्दा पहिले तिमीले मलाई तीनपल्ट इन्कार गर्नेछौ।" 62 तिनी बाहिर गए, र धुरुधुरु रोए।