1 Ma e gima Jehova Nyasaye wacho,

Ere baruwa mar weruok

manyiso nine ariembo minu?

Koso ngʼato nitie mane achiwene

mondo achulgo gope ma an-go?

Nousu nikech richou;

kendo minu noriembi nikech ketho mage.

2 Kane abiro iru, angʼo momiyo ne ok ayudo ngʼato?

Kane aluongou, ere gima omiyo ne ok ngʼato odwoka?

Koso uparo ni bada ne chiek ma ok nyal konyou?

Uparo ni aonge gi teko mar resou?

Wuoyona matin nomiyo nam oduono,

kendo ne amiyo aore obedo piny motwo mi rech manie eigi otho

kendo otop nikech onge mar pi.

3 Aloko polo doko maratengʼ

ti mana ka gima aume gi pien gugru.

4 Jehova Nyasaye Manyalo Gik Moko Duto osemiyo apongʼ

kod puonj,

mondo omi angʼe wach manyalo hoyogo ngʼama ni e chandruok.

Ochiewa pile okinyi kokinyi,

kendo oyawo ita mondo abed gi winjo ka ngʼat mipuonjo.

5 Jehova Nyasaye Manyalo Gik Moko Duto oseyawo pacha

kendo ok asetamore winjo wachne;

bende ok asedok chien.

6 Ne achiwora ne joma goya,

ne joma pudho yie tika;

kendo ne ok apando

wangʼa ne joma nyiera kendo ngʼulo kuoma olawo.

7 Nikech Jehova Nyasaye Manyalo Gik Moko Duto konya,

ok anayud wichkuot.

Kuom mano,

asechomo wangʼa tir kuome maonge luoro

kendo angʼeyo maber ni ok nayud achaya.

8 Jal mabiro ngʼadona bura ni koda.

Kare koro en ngʼa manyalo donjona?

Owuogane oko koro!

En ngʼa modonjona?

Owuogane okwera.

9 En mana Jehova Nyasaye Manyalo Gik Moko Duto ema konya.

En ngʼa mabiro ngʼadona bura?

Gibiro ti mana ka law, ma olwenda ochamo.

10 En ngʼatno e dieru moluoro Jehova Nyasaye

kendo mako weche jatichne?

Weuru ngʼat mawuotho e mudho kaonge ler ogen kuom nying

Jehova Nyasaye kendo osud machiegni gi Nyasache.

11 To koro un jogo duto ma jomok mach

kendo moko mirni maliel,

dhiuru mondo uwuothi e ler mar mach mumoko

kata e ligek mach musemoko.

Ma e gima udhi yudo e lweta:

Ubiro rieru piny gi rem malit.