1 Ma e wach mar Jehova Nyasaye mane obirone janabi Jeremia kuom jo-Filistia kapok Farao nomonjo Gaza:

2 Ma e gima Jehova Nyasaye wacho:

"Neuru kaka pige gingore e yo nyandwat;

ginibed ataro mopongʼ.

Giniyieny e piny

kod gimoro amora manie iye,

mier gi jok modak eigi.

Ji noywagi;

jogo duto modak e piny nodengi.

3 Ka giwinjo

koko mar tiend farese ma giro,

kod koko mar geche wasigu

to gi moor tiend gechegi.

Wuone ok nokony nyithindgi;

lwetgi kalandhidhi nomaki.

4 Nimar odiechiengʼ

osechopo mondo otiek jo-Filistia duto,

kendo gengʼo joma notony duto

mane nyalo konyo Turo kod Sidon.

Jehova Nyasaye ochiegni tieko jo-Filistia,

jogo mane otony moa e dho nam mar Kaftor.

5 Jo-Gaza noliel wigi

manyiso ni gin gi kuyo;

kendo jo-Ashkelon noket malingʼ thii.

Yaye un joma otony manie pewe,

unungʼadru nyaka kara angʼo?

6 "Uywak ni, ‘Yaye ligangla mar Jehova Nyasaye,

ibiro yweyo nyaka karangʼo?

Dog ei olaloni;

chungʼ kendo ilingʼ thi.’

7 To ere kaka onyalo yweyo

ka Jehova Nyasaye owuon osechiko,

ka osechiwo chik

mondo omonj Ashkelon to gi dho nam?"