Yeremia 47

Ujumbe kuhusu Wafilisti

1 Hili ndilo neno la Mwenyezi Mungu lililomjia nabii Yeremia kuhusu Wafilisti, kabla Farao hajaishambulia Gaza:

2 Hili ndilo asemalo Mwenyezi Mungu:

"Tazama jinsi maji yanavyoinuka huko kaskazini,

yatakuwa mafuriko yenye nguvu sana.

Yataifurikia nchi na vitu vyote vilivyo ndani yake,

miji na wanaoishi ndani yake.

Watu watapiga kelele;

wote wanaoishi katika nchi wataomboleza

3 kwa sauti ya kwato za farasi wanaoenda mbio,

kwa sauti ya magari ya vita ya adui,

na mngurumo wa magurudumu yake.

Baba hawatageuka kuwasaidia watoto wao,

mikono yao italegea.

4 Kwa maana siku imewadia

kuwaangamiza Wafilisti wote

na kuwakatilia mbali walionusurika wote

ambao wangeweza kusaidia Tiro na Sidoni.

Mwenyezi Mungu anakaribia kuwaangamiza Wafilisti,

mabaki toka pwani za Kaftori*47:4 yaani Krete.

5 Gaza atanyoa kichwa chake katika kuomboleza,

Ashkeloni atanyamazishwa.

Enyi mabaki kwenye tambarare,

mtajikatakata wenyewe hadi lini?

6 "Mnalia, ‘Aa, upanga wa Mwenyezi Mungu,

utaendelea hadi lini ndipo upumzike?

Rudi ndani ya ala yako;

acha na utulie.’

7 Lakini upanga utatuliaje

wakati Mwenyezi Mungu ameuamuru,

wakati ameuagiza kuishambulia Ashkeloni

pamoja na pwani yake?"