1 Ñwed emi oto Ada Idaha ufọk Abasi. Nnọ esọk edima eyenañwan emi Abasi emekde, ye mme nditọ esie, emi ami mmade ke esit akpanikọ. Idighe ami ikpọñ, edi kpukpru mme mmọ emi ediọñọde akpanikọ ema fi, 2 koro akpanikọ oduñde ñnyin ke idem, ndien eyesuk oduñ ye ñnyin ke nsinsi. 3 Abasi Ete ye Jisọs Kraist Eyen Esie, akpakam ọnọ ñnyin mfọn, mbọm, ye emem; mmọ ekpekam edu ye ñnyin ke akpanikọ ye ima.

4 Ekenem mi didie ndikut nte ke ubak nditọ fo edu uwem ke akpanikọ, kpa nte Ete okowukde ñnyin!

5 Ndien ke ntre, ke ami mbeñe fi, edima eyen ete añwan nte, yak ñnyin kpukpru ima kiet eken. Emi idighe obufa ewuhọ ke ñwed nnọ fi; edi ewuhọ emi ñnyin ima ikenyenyene toto ke editọñọ. 6 Ima emi ami ntiñde mbaña mi, ọwọrọ ete ñnyin inyene ndidu uwem ñnyin ke ñkopitem nnọ mme ewuhọ Abasi. Ewuhọ emi, nte kpukpru mbufo ekekopde toto ke editọñọ, edi ntem: Mbufo kpukpru enyene ndidu uwem ke ima.

7 Mme ata ediwak mbon abiaña emewọñọ esuana eyọhọ ererimbot, mme mmọ oro minyimeke nditiñ ñwut nte ke Jisọs Kraist ama edi ke ikpọkidem. Utọ owo oro edi owo abiaña ye asua Kraist. 8 Kpeme idem fo, ndien, mbak ududuọk se afo akanamde utom ọnọ, edi ọkpọbọ utib fo ọyọhọ ọyọhọ. 9 Owo ekededi emi mikaha iso ye ukpepñkpọ Kraist, inyeneke Abasi. Owo ekededi emi akade iso ye ukpepñkpọ emi, enyene Ete ye Eyen.

10 Edieke owo baba kiet edide ebine fi, ndien isañake ye ukpepñkpọ emi, kudara unyuñ uda enye usin ke ufọk fo, kudedei udọhọ enye ete, "Emem odu ye afo."

11 Koro owo ekededi emi oyomde emem ọnọ enye akabade edi nsaña esie ke mme oburobut ñkpọ emi enye anamde.

12 Ami menyene ata ediwak mme ñkpọ emi ñkpetiñde ye afo, edi ami ndinamke ntre ke ediwewet ke babru ye mmọññwed, utu ke oro, ami mekere ndidi ndise fi ñnyuñ ñnyene nneme ye afo iso ye iso, man otodo ñnyin ikpokop inemesit ọyọhọ ọyọhọ.

13 Mme nditọ edima eyen eka fo añwan enọ ekọm mmọ esọk fi.