1 Kpukpru mmọ emi enimde ete ke Jisọs edi Kraist, edi mme mmọ emi Abasi obonde, ndien owo ekededi emi amade Ete, ama Eyen ñko. 2 Ñnyin ida emi ifiọk ite ke ñnyin imama nditọ Abasi, ke ndima Abasi ñnyuñ nnim mbet Esie. 3 Ñnyin ndima Abasi edi ñnyin ndisuk ibuot nnọ mme mbet Esie ndien mbet Esie inyuñ idobike. 4 Kpukpru mmọ emi Abasi obonde ekan ererimbot. Ndien edikan ererimbot emi mmọ ekande edi kpa ke mbuọtidem.

5 Edi anie ekeme ndikpeñwana ñnyuñ ñkan ererimbot ke mibọhọke enye emi enyimede ke akpanikọ ete Jisọs edi Eyen Abasi! 6 Emi edi Enyemi ekedide ke mmọñ ye iyip, kpa Jisọs Kraist. Enye ikedighe ke mmọñ oro ikpọñ, edi edi ke mmọñ ye iyip. 7 Ndien edi Spirit etie ntiense, koro Spirit edide akpanikọ. 8 Ndien ñkpọ ita edu emi etiede ntiense, Spirit ye mmọñ ye iyip, mmọ mbita enyuñ enyene uyo kiet. 9 Ñnyin imenyime ikọ ntiense emi owo etiñde, edi ikọ ntiense Abasi okpon akan oro, ndien emi edi ikọ ntiense emi Abasi ọnọde abaña Eyen Esie. 10 Owo ekededi emi enimde Eyen Abasi ke akpanikọ, enyene ikọ ntiense emi ke esit esie; enye emi minimke Abasi ke akpanikọ, anam Enye akabade edi osu nsu, koro enye minimke se Abasi etiñde nte ikọ ntiense ke akpanikọ abaña Eyen Esie.

11 Ndien ikọ ntiense oro edi emi, ete, ke Abasi ọnọ ñnyin nsinsi uwem, uwem emi onyuñ odu ke Eyen Esie. 12 Ntre owo ekededi emi enyenede Eyen Abasi, enyene uwem, ndien owo emi minyeneke Eyen Esie, inyeneke uwem.

13 Ñwet emi nnọ mbufo emi enimde Eyen Abasi ke akpanikọ, man mbufo ekpenim ke akpanikọ ete ke mbufo emenyene nsinsi uwem. 14 Ndien ñnyin inim emi ke akpanikọ ite ke Enye eyekpañ utọñ ọnọ ñnyin ke ini kiet ekededi emi ñnyin ibeñede Enye ñkpọ kiet ekededi emi asañade ekekem ye uduak Esie. 15 Ndien edieke ñnyin ke akpanikọ ifiọkde ite Enye okop ñnyin ke se ededi emi ñnyin ibeñede Enye, ñnyin imọfiọk ite ke ñnyin imenyene ebeñe ñnyin. 16 Edieke owo okutde eyen ete esie nte anamde idiọkñkpọ emi midighe eke ñkpa, enye enyene ndibọñ akam mbaña ndien Abasi eyenọ enye uwem. Ami ntiñ mbaña mme mmọ oro idiọkñkpọ mmọ midighe eke ñkpa. Idiọkñkpọ odu emi edide eke ñkpa. Ami ndọhọke nte enye ọbọñ akam abaña enye oro. 17 Kpukpru idiọk edinam edi idiọkñkpọ, edi enyene idiọkñkpọ emi midaha ñkpa idi.

18 Ñnyin imọfiọk ite owo ekededi emi Abasi obonde ikaha iso ndinam idiọkñkpọ. Enyemi Abasi obonde, ekpeme idem esie, anam andidiọk ikemeke ndituk enye. 19 Ñnyin imọfiọk ite ke ñnyin idi nditọ Abasi, ndien kpukpru ererimbot emi ekanarede ñnyin ekuk edu ke idak odudu Setan ye ukara esie. 20 Ñnyin imọfiọk ite ke Eyen Abasi ama edi, onyuñ ọnọ ñnyin ikike, man oto do ñnyin ifiọk ata Abasi akpanikọ, ñnyin inyuñ inyene ebuana ye ata Abasi akpanikọ ye Eyen Esie Jisọs Kraist. Enye edi ata Abasi akpanikọ ye nsinsi uwem.

21 Ndima ñkpri nditọ, ediañade ekpọñ ukpono ndem, ekpọñ ñkpọ ekededi emi ekemede ndida itie Abasi ke esit mbufo.