1 Ñkpri nditọ mi, ami ñwet emi nnọ mbufo man mbufo ekunam idiọkñkpọ. Edi edieke owo ekededi anamde idiọkñkpọ, ñnyin imenyene Enyemi anamde ñkpeubọk ke iso Ete ọnọ ñnyin kpa Jisọs Kraist emi edide edinen. 2 Enye edi uwa emi emende mme idiọkñkpọ ñnyin efep. Inyuñ idighe idiọkñkpọ ñnyin ikpọñ, edi idiọkñkpọ ofuri ererimbot.

3 Edieke ñnyin isukde ibuot inọ mme mbet Abasi, ñnyin imeneñede ifiọk ite ke ñnyin imọdiọñọ Enye.

4 Owo emi ọdọhọde ete, "Ami mmọdiọñọ Enye," edi minimke mbet Esie edi osu nsu, akpanikọ inyuñ iduhọ ke esit esie. 5 Edi owo ekededi emi osukde ibuot ọnọ ikọ Esie, ke akpanikọ ima Abasi ọfọn ama ke esit esie. Emi anam ñnyin ifiọk ite ñnyin idu ke Enye. 6 Owo kiet ekededi emi ọdọhọde ete imọ idu ke Enye, enyene ndidu uwem nte Jisọs Kraist okodude.

7 Ndima nditọ ete, ami ñwetke obufa mbet nnọ mbufo, edi, edi akani mbet, emi mbufo ekenyenede toto ke editọñọ. Akani mbet emi edi etop emi mbufo ekekopde. 8 Ami ñwet obufa mbet nnọ mbufo emi ekutde akpanikọ ke uwem Esie ye ke uwem mbufo. Koro ekim ke ebe efep, ata uñwana ke ayayama.

9 Owo kiet ekededi emi ọdọhọde ete ke imọ idu ke uñwana, edi enye asua eyen ete esie, osuk aka iso odu ke ekim. 10 Owo kiet ekededi emi amade eyen ete esie ododuñ ke uñwana, ndien baba ñkpọ iduọ kiet iduhọ enye ke idem. 11 Edi owo ekededi emi asuade eyen ete esie, odu ke ekim, onyuñ asaña ke ekim, inyuñ idiọñọke ebiet emi enye akade, koro ekim ekimde enye enyin.

12 Ami ñwet nnọ mbufo mme ndima nditọ mi, koro ema efen mme idiọkñkpọ mbufo kabaña enyiñ Esie.

13 Ami ñwet nnọ mbufo mme ete, koro mbufo efiọkde Enyemi okodude toto ke editọñọ. Ñwet nnọ mbufo ñkparawa iren, koro mbufo ema ekekan andidiọk. Ami ñwet nnọ mbufo nditọ ọwọñ, koro mbufo ema ekefiọk Ete.

14 Ami ñwet nnọ mbufo mme ndima nditọ mi, koro mbufo emediọñọ Ete. Ami ñwet nnọ mbufo, mme ete, koro mbufo ediọñọde Enyemi okodude toto ke editọñọ. Ami ñwet nnọ mbufo ñkparawa iren, koro mbufo emesọñ idem, ikọ Abasi onyuñ oduñ ke esit mbufo, anam mbufo emekan andidiọk.

15 Ekuma ererimbot ye mme ñkpọ ekededi emi odude ke ererimbot, koro owo ekededi emi amade ererimbot, ima Ete iduhọ enye ke esit. 16 Koro kpukpru se idude ke ererimbot, se obukidem idiọkñkpọ okopde udọñ, se enyin okutde onyuñ oyomde ye ntañidem uwem emi, itoho Ete, edi oto ererimbot. 17 Ererimbot ye idiọk udọñ esie eyebe efep; edi owo ekededi emi akade iso anam uduak Abasi eyedu uwem ke nsinsi.

18 Ndima ñkpri nditọ, akpatre ini edi emi; nte mbufo ekopde ete ke mme andibiọñọ Kraist ke edi, kpa idem idahaemi, ediwak mme andibioño Kraist ededi, ke ntak oro ke ñnyin ifiọk ite ke akpatre ini edi emi. 19 Mmọ ekewọñọ ekpọñ ñnyin ke emi mmọ mikedighe kiet ye ñnyin, edi mmọ ekekpọñ ñnyin man oto do ayarade owut nte ke mmọ ndomokiet ikedighe kiet ye ñnyin.

20 Edi mbufo itiehe ntre, koro Edisana Spirit odude mbufo ke idem, ndien mbufo emediọñọ akpanikọ. 21 Ami ñwetke nnọ mbufo nte mme mmọ emi mifiọkke akpanikọ, edi koro mbufo efiọkde akpanikọ, koro baba nsu kiet miduhọ ke akpanikọ,

22 Ndien anie edi akwa osu nsu? Enyemi ọdọhọde ete ke Jisọs idighe Kraist. Oruk owo oro edi andibiọñọ Kraist koro enye inimke Abasi Ete ye Eyen Esie ke akpanikọ. 23 Owo ekededi emi ananade Eyen, ikemeke ndinyene Ete; edi enye emi enyimede Eyen eyenyene Ete ñko.

24 Eyak se mbufo ekopde toto ke editọñọ odu ke esit mbufo. Se mbufo ekopde toto ke editọñọ ama odu ke esit mbufo, mbufo eyenyene ebuana ye Eyen enyuñ enyene ye Ete ñko. 25 Ndien emi edi se Enye ọkọñwọñọde ọnọ ñnyin, kpa nsinsi uwem.

26 Ami ñwet mme ñkpọ emi nnọ mbufo mbaña mme mmọ emi eñwanade ndinam mbufo ewaha ekpọñ usuñ. 27 Edi ama edi mbufo, Kraist ama añwaña Spirit Esie odori mbufo ke idem, ndien nte ededi emi Spirit Esie odude ye mbufo, mbufo idiyomke owo baba kiet ekpep mbufo ñkpọ, koro Spirit Esie ekpepde mbufo kpukpru ñkpọ, ndien kpukpru se Enye ekpepde edi akpanikọ idighe nsu. Esuk ibuot enọ ukpepñkpọ Spirit, ntre ke mbufo edidu ke Kraist.

28 Ndien idahaemi, ndima nditọ mi, eka iso edu ke Enye, man ke Enye ama ọwọrọ owut idem, ñnyin ikpenyene uko ikunyuñ ikop but ke iso Esie ke edidi Esie. 29 Edieke mbufo efiọkde ete Enye edi edinen, mbufo eyefiọk ñko ete Enye obon kpukpru mmọ emi enamde edinen ido.