1 Se ikodude ke editọñọ, emi ñnyin ikokopde, emi ñnyin ikokutde ke enyin ñnyin, emi ñnyin ikowukde enyin ise, ikonyuñ itukde ke ubọk ñnyin, se ñnyin itiñde ibaña emi edi se itukde ikọ uwem. 2 Ke ini Uwem emi akayararede owut idem, ñnyin ima ikut Enye. Ima inyuñ itie ntiense ibaña Enye, ñnyin ima itiñ inyuñ inam añwaña mbufo, ite ke edi nsinsi Uwem emi okodude ye Ete, ekenyuñ eyararede ewut ñnyin. 3 Ñnyin imanam mbufo efiọk se ñnyin ikokutde ye se ñnyin ikonyuñ ikopde, man oto do mbufo ñko ekeme ndidiana ye ñnyin ke ebuana emi ñnyin inyenede ye Ete ye Eyen Esie Jisọs Kraist. 4 Ñnyin iwet emi man oto do idaraesit ñnyin ọyọhọ.

5 Emi edi etop emi Abasi ọnọde ñnyin, ete yak inam mbufo efiọk ebaña ete ke Abasi edi Uñwana, ndien ke Enye, ekim baba kiet iduhọ. 6 Ntre, edieke ñnyin idọhọde ite ke ñnyin imenyene ebuana ye Abasi, edi ika iso idu ke ekim, ye idiọkñkpọ, ñnyin isosu, inyuñ idaha akpanikọ isin ke edinam. 7 Edieke ñnyin isañade ke uñwana nte Enye odude ke uñwana, ñnyin imenyene ebuana ye kiet eken, ndien iyip Jisọs Eyen Esie eyet ñnyin isana ke kpukpru idiọkñkpọ.

8 Edieke ñnyin idọhọde ite ke ñnyin inyeneke idiọkñkpọ, ñnyin ibabiaña idem ñnyin ndien akpanikọ inyuñ iduhọ ke esit ñnyin. 9 Edieke ñnyin iyararede mme idiọkñkpọ ñnyin, Enye edi anam akpanikọ onyuñ edi edinen, Enye eyefen mme idiọkñkpọ ñnyin, onyuñ eyet ñnyin isana ke kpukpru mme ukwaññkpọ ñnyin. 10 Edieke ñnyin idọhọde ite ke ñnyin inamke idiọkñkpọ, ñnyin inanam Abasi edi osu nsu, ndien ikọ Esie iduñke ñnyin ke idem.