1 Ndima ufan mi! Emi edi ọyọhọ ñwed iba emi ñwetde nnọ esọk mbufo. Ke esit ñwed mbiba emi, mañwana ndidemede edisana ekikere ke esit mbufo; ke editi mbufo mbaña mme ñkpọ emi. 2 Ami ñyom mbufo eti mme ikọ emi mme ndisana Asiak uduak Abasi eketiñde ke ata anyan ini emi ekebede, ye ewuhọ emi okotode Ọbọñ ye andinyaña emi mme Mbet mbufo ekenọde mbufo.

3 Ke akpa itie, mbufo enyene ndifiọk ete ke mme utit usen, ndusuk idiọk udọñ obukidem mmọ akarade mmọ, mmọ eyeda mbufo enam mbubru, 4 ndien edọhọ ete, "Enye ama ọnwọñọ ndidi, nte Enye ikọdọhọke ntre? Enye enye? Mme ete ñnyin ema ekpaña, edi kpukpru ñkpọ esuk edi ukem ukem nte ekedide tọñọ nte ekebot ererimbot!"

5 Mmọ ekekoi esin ndinim ke akpanikọ nte ke Abasi ama etiñ ikọ ke ata anyan ini emi ekebede, ndien ekebobot enyọñ ye isọñ. Ekesio ererimbot ke mmọñ ewuk, enyuñ ebot enye ye mmọñ, 6 ndien ekedi ọtọ mmọñ ñko, ke ekeda esobo akani ererimbot. 7 Edi enyọñ ye ererimbot emi edude idahaemi, eda kpa ukem ikọ Abasi oro etim mmọ enim enọ nsobo ke ikañ. Enim mmọ enọ usen emi edikpede ikpe inyuñ isobo mme mmọ emi mibakke Abasi.

8 Edi ekufre ñkpọ kiet emi, mme ndima ufan mi! Ukpuhọde iduhọ ke enyin Abasi ke ufọt usen kiet ye tọsin isua, ke Enye, mbiba edi ukem ukem. 9 Abasi inyọnike nyọni ke ndinam se Enye ọkọñwọñọde, nte mme ndusuk owo ekerede. Utu ke oro Enye enyene ime ye mbufo, koro Enye miyomke esobo baba owo kiet; edi oyom kpukpru owo ewọñọde ekpọñ mme idiọkñkpọ mmọ. 10 Edi usen Ọbọñ edidi nte inọ. Ke usen oro, ikpaenyọñ eyesop ye ọkpọsọñ uyom, eyefọp enyuñ esobo kpukpru mme odu uwem ñkpọ ke enyọñ, ndien ererimbot ye kpukpru se idude ke esit eyeta ikañ.

11 Sia edibiatde kpukpru ñkpọ emi ke utọ usuñ emi, nso utọ uduot owo ke mbufo ekpedi? Akpana uwem mbufo asana, enyuñ eyak uwem mbufo ofuri ofuri enọ Abasi. 12 Nte mbufo etiede ebet usen Abasi, enyuñ enam ofuri ukeme mbufo ndinam usen oro ọsọp edi. Usen emi ikpaenyọñ editade ikañ, edinyuñ ibiatde enye, ndien kpukpru mme odu uwem ñkpọ do ke ikpaenyọñ eyetara oto ke ufiop. 13 Edi ñnyin itie ibet se Abasi ọkọñwọñọde. Obufa enyọñ ye obufa ererimbot ebiet emi edinen ido ediduñde. 14 Ndien ke ntem, mme ufan mi, nte mbufo etiede ebet usen oro, enam ofuri ukeme mbufo ndisana ñnyuñ nnana ndo ke enyin Abasi, ye ndidu ke emem ye Enye. 15 Se ime Ọbọñ nte edi ifet emi Enye ọnọde mbufo man enyaña mbufo, kpa nte edima eyen ete ñnyin Pọl ekewetde ọnọ mbufo oto ke ifiọk emi Abasi ọkọnọde enye.

16 Emi edi se enye etiñde ke kpukpru mme ñwed esie, ke ini enye ekewetde otuk mme ñkpọ emi. Enyene mme ndusuk ñkpọsọñ ikọ ke ñwed emi mme mbon ndisime ye mme anana iwuk ekabarede ukwañ ukwañ, kpa nte mmọ enamde ye mme itie ñwed Abasi eken. Ke ntre mmọ eda nsobo enọ idem mmọ.

17 Edi ama edi mbufo mme ufan mi, emefefiọk emi; ekpeme idem mbufo mbak ndudue mme abiat ibet edida mbufo awaha ọkpọñ usuñ onyuñ anam mbufo eduọñọ ekpọñ mfọnmma itie mbufo. 18 Edi eka iso ndikọri ke mfọn ye ifiọk Ọbọñ ye Andinyaña ñnyin Jisọs Kraist. Ubọñ enyene Enye ke emi ye ke nsinsi. Amen.