1 Ñwed emi oto Saimọn Pita, isuñutom ye Mbet Jisọs Kraist. Nnọ ñwed emi esọk mmọ emi etode ke edinen ido Abasi ye Andinyaña ñnyin Jisọs Kraist, emi ekebọde utọ mbuọtidem emi ọsọñde urua nte eke ñnyin. Editim Ndiọñọ Enye.

2 Yak mfọn ye emem edi eke mbufo ọyọhọ ọyọhọ ke ntak emi mbufo ediọñọde Abasi ye Jisọs Ọbọñ ñnyin. 3 Anana utit odudu Abasi ọnọ ñnyin kpukpru ñkpọ emi ñnyin iyomde ndida ndu uwem nte Abasi amade, oto koro ñnyin inyenede ifiọk ibaña Enye mi okokotde ñnyin idibuana ke ubọñ ye mfọnido Esie. 4 Ke usuñ emi ke Enye ọnọ ñnyin akwa nsọñurua enọ emi Enye ọkọñwọñọde, man oto ke ntak enọ emi mbufo efehe ebọhọ idiọk udọñ nsobo odude ke ererimbot, ndien edibuana ke mfọnmma obot Esie.

5 Ke ntak emi, enam ofuri ukeme mbufo ndidian mfọnido ke mbuọtidem mbufo, ke mfọnido edian ifiọk. 6 Ke ifiọk mbufo edian mfara ke idem, ke mfarakeidem edian ediyọ, ke ediyọ edian ndik Abasi, 7 ke ndik Abasi mbufo edian mfọnido nditọ ete, ke mfọnido nditọ ete edian ima. 8 Emi edi mme nti ido uwem emi mbufo enanade, ndien edieke mbufo enyenede mmọ nte ọyọhọde ọduọi, mmọ eyenam mbufo etiam idem enyuñ eforo ke ifiọk emi mbufo enyenede ebaña Ọbọñ Jisọs Kraist. 9 Edi owo ekededi emi ananade mmọ enyene ibio ñkukut ndien ikemeke ndikut usuñ onyuñ efre ete ke ema efen mme idiọkñkpọ emi imọ ikanamde ke mme ini emi ekebede.

10 Ke ntre, nditọ ete mi, eneñerede esin ifik eti eti ndinam ikot emi Abasi okokotde mbufo ye edimek emi Abasi ekemekde mbufo edi se mbufo edade esin ke edinam kpukpru usen, edieke mbufo enamde ntre, mbufo ididuọhọ ikpọñ usuñ. 11 Ke usuñ emi, eyenọ mbufo ọyọhọ unen ndiduk ke nsinsi Obio Ubọñ Ọbọñ ye Andinyaña ñnyin Jisọs Kraist.

12 Ke ntak emi, ami ñyeka iso nditi mbufo kpukpru ini mbaña mme ñkpọ emi, okposuk edi nte mbufo ema ekefọfiọk mmọ, emenyuñ esọñọ ewuhọ ke akpanikọ emi mbufo ekebọde. 13 Ami ñkere nte ke edi unen ami ndidemerede ekikere mbufo kabaña mme ñkpọ emi, adaña nte ami ndude ke uwem. 14 Ami mọfiọk nte ke idibighike ami ñyeyak ikpọkidem emi edikpade mi nnim, nte Ọbọñ ñnyin Jisọs Kraist eketiñde ọnọ mi, añwa añwa. 15 Ami ñyenam ofuri ukeme mi ndien ndisiak usuñ nnim nte mbufo edisañade eti mme ñkpọ emi kpukpru ini ke ami mma ñkpa.

16 Ñnyin iketieneke mme ikpuikpu mbuk emi mme owo ekebukde ke edinam mbufo ediọñọ ebaña utibe edidi Ọbọñ ñnyin Jisọs Kraist. Ñnyin ikokut odudu Esie ke enyin ñnyin. 17 Ñnyin ima idu do ke ini emi Abasi Ete ọkọnọde Enye ubọñ ye ukpono, ke ini emi uyo okotode ñkoñkoñ itie ubọñ esim Enye, emi ọkọdọhọde ete, "Emi edi edima Eyen mi, emi ami nnemde esit ye Enye." 18 Ñnyin ke idem ñnyin ima ikop nte uyo emi otode Obio Ubọñ Abasi, ke ini emi ñnyin ikodude ye Enye ke enyọñ edisana obot oro.

19 Ke ntre ñnyin imetetim inyene mbuọtidem ke etop emi mme Asiak uduak Abasi ekesuande. Eyefọn nte mbufo ekpañde utọñ enọ Enye, koro Enye etie nte utueneikañ emi asakde ke ebiet emi ekimde tutu eyo esiere, ndien uñwana ntantaọfiọñ usiere ayama ke esit ñnyin. 20 Ke se ikande kan kpukpru, eti emi ete, ke owo baba kiet ikemeke ndinam ntiñnnim uduak Abasi ke Ñwed Abasi añwaña ke ifiọk idem esie. 21 Koro ntiñnnim uduak Abasi ndomokiet akanam itoho ke uduak owo, edi Edisana Spirit akada mme owo usuñ nte mmọ eketiñde mme etop emi eketode Abasi.