1 Mme nsu nsu asiak uduak Abasi ema ewọñọ ebuaha ke otu mme owo ke eyo oko, ndien ke ukem usuñ emi mme ekpep nsu eyewọñọ ebuaha ke otu mbufo. Mmọ eyeda mme ukpepñkpọ nsobo, ye mme ido ukpono emi midighe akpanikọ eduk edi, ndien mmọ eyekañ Eteufọk emi akanyañade mmọ, ndien eda nsobo unana idorenyin esọk idem mmọ. 2 Kpa ye oro, ediwak owo eyetiene mme mbiara ido use mmọ, ndien eyeto ke se mmọ enamde, mme owo eyetiñ idiọk ebaña usuñ akpanikọ.

3 Ke idiọk itọñ mmọ, mme nsu nsu andikpep emi eyenam udori eto mbufo ke edibuk mme mbuk emi mme owo ekekọkde ibuot ebon. Ke ata anyan ini idahaemi, ekpe ikpe mmọ odu ke mbeñeidem, andidisobo mmọ inyuñ idehe idap. 4 Abasi ikefenke mme enjel emi ekenamde idiọkñkpọ, edi ama otop mmọ ọdọñ ke idak isọñ ke ebiet emi ekọbide mmọ ke ñkpọkọbi enim ke ekim, etie do ebet usen ikpe; 5 Abasi ikefenke akani ererimbot, edi ama ada ọtọ mmọñ inyañ etiene mme mbon ererimbot emi mikebakke Abasi; ñkukure mme mmọ emi Enye akanyañade ekedi Nua, emi ọkọkwọrọde edinen ido ye owo itiaba efen. 6 Abasi ama etip mme obio Sọdọm ye Komora ikpe, onyuñ ada ikañ osobo mmọ, ndien ada mmọ anam uwutñkpọ kabaña se iditibede ye mme mmọ emi mikabakke Abasi.

7 Enye ama anyaña Lọt, edinen owo, emi ọkọfuhọde abaña ido use emi mme abiat ibet ekenamde. 8 Eti owo oro okodu ke otu mmọ, ndien ke usen ke usen, enye ama okop, onyuñ okut mme ñkpọ emi akanamde edisana esit esie etimede oto ke mme idiọk edinam mmọ. 9 Ndien ke ntre, Ọbọñ ọdiọñọ nte Enye anyañade mme mmọ emi ebakde Abasi osio ke mme idomo emi edomode mmọ, ye nte Enye enimde oburobut owo ke idak ufen ọnọ usen ikpe, 10 akpan akpan mme mmọ oro etienede mme idiọk itọñ nsobo obukidem mmọ ndien efumi ukara Abasi. Mme andikpep nsu emi enyene uko enyuñ etañ idem; inyuñ iwutke mme mfọnmma obot ke enyọñ ukpono, utu ke oro, mmọ emiom mmọ. 11 Idem mme enjel emi ekopde odudu enyuñ ekpon ekan mme andikpep nsu emi, imiomke mmọ ke iso Ọbọñ.

12 Edi mme mmọ emi enam ñkpọ ke ntuk, nte mme unam ikọt emi ekemande, ekem emum ewot, mmọ emiom se mmọ midiọñọke. Eyesobo mmọ nte mme unam ikọt.

13 Eyeda ukut ekpe mmọ utib ke mme ukut emi mmọ edade enọ mme owo. Se mmọ ekotde inemesit edi mmọ ndinam etime etime ido uwem ke uwemeyo, ndiyuhọ idiọk udọñ obukidem mmọ. Mmọ edi ñkpọ obut ye esuene kadaña emi mmọ ebuanade ubọk udia kiet ye mbufo; ke ofuri ini emi mmọ ke eka iso ndidara ke mme usuñ abiaña mmọ. 14 Mmọ iyomke ndise baba ñkpọ ndomokiet efen ke ebede mme iban use; mmọ iyuhọke ke idiọk itọñ unam idiọkñkpọ mmọ. Mmọ etap mme mbon mmemidem esin ke afia. Mmọ ebeñe esit mmọ enim enọ idiọk itọñ. Mmọ edu ke idak isuñi Abasi. 15 Mmọ ekpọñ nnen nnen afañ ndien esop usuñ. Mmọ etiene afañ emi Balam eyen Bua akasañade, emi akamade udori emi enye edinyenede ke edinam idiọkñkpọ, 16 ndien ema esua enọ enye ke idiọkñkpọ esie. Enañ mbiomo esie ama etiñ ikọ ke uyo owo, onyuñ etre edinam mbeibuot asiak uduak Abasi oro.

17 Mme mmọ emi ebiet idim emi ama akasat, nte obubit enyọñ emi oyobio ọkpọride asaña. Abasi ama etim itie ọnọ mmọ ke ata ntotuño itie ekim. 18 Mmọ etiñ mme ikọ unana ibuot ye eke ntañidem, ndien mmọ eda idiọk udọñ obukidem use etap mme mmọ emi esuk etọñọde tọñọ ndibọhọ ke otu mme mmọ emi edude uwem ndudue.

19 Mmọ eñwọñọ ndisio mmọ ke ufin, ke ini mmọ ke idem mmọ edude ke ufin ido uwem nsobo koro owo edi ofin ọnọ ñkpọ kiet ekededi emi akarade uwem esie. 20 Edieke mme owo ema ekebọhọ ke mbiara odudu ererimbot emi, oto koro mmọ ema ekenyene ifiọk ebaña Ọbọñ ye Andinyaña ñnyin Jisọs Kraist, ndien mme odudu emi etọñọ ntak emum mmọ enyuñ ekara mmọ, mme utọ mbon oro edu ke ata idiọk idaha ke utit ekan nte mmọ ekedide ke editọñọ. 21 Ọkpọfọn ye mmọ akan, edieke mmọ mikpediọñọke diọñọ usuñ akpanikọ emi, akan mmọ ndidiọñọ, ndien mmọ ewọñọrede ekpọñ edisana ewuhọ emi ekenọde mmọ. 22 Se itibede ye mmọ owut ete ke ikọ mme ñke emi edi akpanikọ, "Ebua ọtọñọntak afiak edem akatañ se enye ọkọkpọhide adia, ndien, edi emi ema ekeyet asana ọtọñọ ntak ọkọduọ ewere ke mbat."