1 Ese utọ ima emi Ete amade ñnyin, emi anamde ñnyin ikere nditọ Abasi. Ndien se ñnyin inyuñ idide edi oro. Ntak emi ererimbot midiọñọke ñnyin, edi sia mmọ mikediọñọke Enye. 2 Mme ndima ufan, idahaemi ñnyin idi nditọ Abasi, edi iyarakede kaña nte ñnyin iditiede. Edi ñnyin imọfiọk ite ke ini Enye ediwọrọde iwut idem, ñnyin iyebiet Enye, koro iyekut nte Enye etiede. 3 Ndien kpukpru mme mmọ emi enyenede idorenyin emi ke Enye, ana enam idem mmọ asana, kpa nte Enye asanade.

4 Kpukpru owo emi enamde idiọkñkpọ ebiat ibet. Ndien idiọkñkpọ edi edibiat ibet. 5 Edi mbufo emefiọk ete ke Enye ekedi man Enye emen mme idiọkñkpọ ñnyin efep, ndien baba ntọi idiọkñkpọ ndomokiet iduhọ Enye ke idem. 6 Owo kiet ekededi emi oduñde ke Enye, inamke idiọkñkpọ, owo ekededi emi akade iso ndinam idiọkñkpọ ikwe Enye inyuñ idiọñọke Enye.

7 Ndima nditọ, ekuyak baba owo ndomokiet ada mbufo awaha ọkpọñ usuñ. Owo eke anamde edinen ido edi edinen, kpa nte Enye edide edinen. 8 Edi edieke mbufo esuk ekade iso enam idiọkñkpọ, oro owut ete ke mbufo edi eke Setan, koro Setan ọkọtọñọ ndinam idiọkñkpọ toto ke editọñọ. Edi Eyen Abasi ekedi man Enye akpabiat mme utom Setan. 9 Owo emi ama akamana oduk ubon Abasi ikaha aba iso ndinam idiọkñkpọ, koro mfri emi Abasi akadade obon enye odude enye ke idem, enye inyuñ ikemeke ndinam idiọkñkpọ, koro edi Abasi okobon enye.

10 Ñnyin ida emi idiọñọ nditọ Abasi, ye mme mmọ emi edide nditọ Setan. Owo ekededi emi minamke edinen ido idighe eyen Abasi, mme owo ekededi emi mimaha eyen ete esie. 11 Etop emi mbufo ekekopde toto ke editọñọ edi, ñnyin inyene ndima kiet eken.

12 Ñnyin inyeneke ndibiet Ken, emi ekedide eke andidiọk, okonyuñ owotde eyen eka esie. Nsidi ntak emi enye okowotde enye? Koro mme edinam esie ekediọkde, edi eke eyen eka esie ekenende. 13 Ntre ekuyik nditọ ete, edieke ererimbot esuade mbufo.

14 Ñnyin imọfiọk ite ñnyin ima iwọrọ ke ñkpa ibe iduk ke uwem; koro ñnyin imade nditọ ete ñnyin. Owo kiet ekededi emi minyeneke ima osuk odu ke ñkpa. 15 Owo eke asuade eyen ete esie, ke akpanikọ, enye edi ata owot owo, ndien mbufo emefiọk ete, baba owot owo ndomokiet inyeneke nsinsi uwem. 16 Ñnyin ida emi idiọñọ ima oto ke uwutñkpọ emi Kraist okowutde ke Enye ndikpa nnọ ñnyin. Ndien ntre ñnyin ñko ikpenyene ndiyak uwem ñnyin nduọk nnọ nditọ ete ñnyin.

17 Edieke owo enyenede inyene ererimbot emi, onyuñ okut eyen ete esie ke unana, edi etre nditua enye mbọm, ima Abasi ekeme didie ndidu ke esit esie! 18 Mme ndima ñkpri nditọ, eyak ñnyin ikuma ke ikọ inua, mme ke edeme, edi eyak ñnyin ima ke edinanam ye ke akpanikọ. 19 Ke ntre, ke ñnyin idida idiọñọ ite ke ñnyin ida inọ akpanikọ. Ke usuñ emi ke esit ñnyin edinyene emem ke iso Abasi. 20 Edieke esit ñnyin obiomde ñnyin ikpe, ñnyin imọ diọñọ ite ke Abasi okpon akan esit ñnyin, ndien ke Enye ọdiọñọ kpukpru ñkpọ.

21 Mme ndima ufan, edieke esit ñnyin mibiomke ñnyin ikpe, imekeme ndisaña ntiene ọbọñ ke ata uko ye mbuọtidem. 22 Iyenyuñ ibọ se ededi emi ñnyin ibeñede Enye, koro ñnyin imenim mbet Esie, imenyuñ inam se inemde Enye esit. 23 Ndien mbet esie edi ntem, ete, ñnyin ibuot idem ke enyiñ Eyen Imọ Jisọs Kraist, inyuñ ima kiet eken nte Enye ọkọnọde ñnyin item. 24 Owo eke enimde mbet Abasi, odu ke Enye, Enye onyuñ oduñ ke esit esie, oto ke Spirit emi Enye ọkọnọde ñnyin, anam ñnyin ifiọk ite ke Enye odu ke esit ñnyin.