1 इतिहास 11

दाऊद ह इसरायल के राजा बनथे

1 ओकर बाद जम्मो इसरायलीमन हेबरोन म दाऊद मेर आके कहिन, "सुन, हमन तोर खुद के मांस अऊ लहू अन। 2 पहिले, जब साऊल ह राजा रिहिस, तब तेंहीच ह सैनिक अभियान म इसरायल के अगुवई करत रहय। अऊ यहोवा तोर परमेसर ह तोला कहे रिहिस, ‘तेंह मोर मनखे इसरायल के चरवाहा होबे, अऊ तेंह ओमन ऊपर सासन करबे।’ "

3 जब इसरायल के जम्मो अगुवामन हेबरोन म राजा दाऊद करा आ गीन, त ओह हेबरोन म ओमन के संग यहोवा के आघू म एक करार करिस, अऊ समूएल के जरिये यहोवा के करे गय वायदा के मुताबिक, ओमन इसरायल ऊपर दाऊद ला राजा के रूप म अभिसेक करिन।

दाऊद ह यरूसलेम ऊपर जय पाथे

4 तब दाऊद ह जम्मो इसरायलीमन के संग यरूसलेम सहर गीस, (यरूसलेम ला यबूस घलो कहे जाथे)। जऊन यबूसीमन उहां रहत रिहिन, 5 ओमन दाऊद ले कहिन, "तेंह इहां नइं आय पाबे।" तभो ले, दाऊद ह सियोन के गढ़ ऊपर कब्जा कर लीस—जऊन ह दाऊद के नगर अय।

6 दाऊद ह कहे रिहिस, "जऊन ह यबूसीमन ऊपर हमला करे म अगुवई करही, ओह मुखिया सेनापति होही।" तब सरूयाह के बेटा योआब ह सबले पहिले उहां गीस, अऊ ये किसम ले ओला सेनापति के पद दिये गीस।

7 तब दाऊद ह ओ गढ़ म रहे लगिस, अऊ ओकर खातिर ओला दाऊद के सहर कहे गीस। 8 ओह एकर चारों कोति सहर ला बनाईस, छत ले लेके चारों कोति दीवार ला बनवाईस, जबकि योआब ह सहर के बाकि काम ला पूरा करिस। 9 अऊ दाऊद ह अऊ जादा सक्तिसाली होवत गीस, काबरकि सर्वसक्तिमान यहोवा ह ओकर संग रिहिस।

दाऊद के बड़े सूरबीरमन

10 येमन दाऊद के बड़े सूरबीरमन के मुखिया रिहिन—यहोवा के वायदा के मुताबिक येमन जम्मो इसरायल के संग दाऊद के राज ला पूरा देस म फईलाय बर बहुंत सहयोग करिन— 11 येह दाऊद के बड़े सूरबीरमन के सूची अय:

एक हकमोनी के बेटा यासोबाम ह अधिकारीमन के मुखिया रिहिस; ओह तीन सौ आदमीमन ऊपर अपन बरछी उठाईस, अऊ ओमन ला एकेच मुकाबला म मार डारिस।

12 ओकर बाद अहोही दोदै के बेटा एलिआजर रिहिस, जऊन ह तीन बड़े योद्धा म ले एक झन रिहिस। 13 ओह पस-दमीम म दाऊद के संग रिहिस, जब पलिस्तीमन उहां लड़ई बर जूरे रिहिन। ओ जगह जिहां जौ के फसल ले भरे एक खेत रिहिस, अऊ सेना ह पलिस्तीमन ले डरके भाग गीस। 14 पर ओमन ओ खेत के बीच म ठाढ़ होके ओमन के सामना करिन। ओमन लड़िन अऊ पलिस्तीमन ला मार डारिन, अऊ यहोवा ह एक बड़े जीत देवाईस।

15 तीस मुखियामन ले तीन झन दाऊद करा चट्टान म आईन, जऊन ह अदुल्लाम के गुफा म रिहिस, जबकि पलिस्तीमन के एक दल ह रपाईम के घाटी म डेरा डाले रहय। 16 ओ बेरा दाऊद ह गढ़ म रिहिस, अऊ पलिस्तीमन के गढ़ के सेना ह बैतलहम म रिहिस। 17 दाऊद ला बहुंत पीयास लगिस, त ओह कहिस, "हाय, कोनो मोला बैतलहम के दुवार के लकठा के कुआं ले पानी लानके पीयावव!" 18 तब ओ तीनों झन पलिस्तीमन के कतार ला टोरके बैतलहम के दुवार के लकठा के कुआं ले पानी निकालिन अऊ ओ पानी ला लेके दाऊद करा वापिस आ गीन। पर ओह ओ पानी ला पीये ले मना करिस; अऊ ओह ओ पानी ला यहोवा के आघू म ढार दीस। 19 ओह कहिस, "परमेसर ह मोला अइसन काम करई ले दूरिहा रखय। का में ये आदमीमन के लहू पीयंव, जऊन मन अपन परान ला जोखिम म डालके उहां गे रिहिन?" काबरकि ओमन अपन परान ला जोखिम म डालके ओ पानी ला लाने रिहिन, एकरसेति ओह ओला नइं पीईस।

ये तीनों बड़े सूरबीरमन के बीरता के काम अइसने रिहिस।

20 योआब के भाई अबीसै ह ओ तीनों झन के मुखिया रिहिस। ओह तीन सौ आदमीमन के बिरूध अपन बरछी उठाके ओमन ला मार डारिस, अऊ ये किसम ले ओह ओ तीनों के सहीं नामी हो गीस। 21 ओला ओ तीनों ले दू गुना आदर मिलिस, अऊ ओह ओमन के सेनापति बनिस, हालाकि ओला ओ तीनों के बीच सामिल नइं करे गीस।

22 यहोयादा के बेटा बनायाह ह कबसेल सहर के एक बड़े बीर रिहिस, अऊ ओह बहुंत बीरता देखाईस। ओह मोआब के दू झन सबले बड़े योद्धामन ला मार गिराईस। बरफ गिरे के दिन म, ओह खाल्हे एक खंचवा म उतरके एक सिंह ला घलो मार डारिस। 23 अऊ ओह एक मिसरी मनखे ला मार डारिस, जऊन ह पांच क्यूबीट*11:23 लगभग 7 फीट 6 ईंच ऊंच रिहिस। हालाकि ओ मिसरी ह अपन हांथ म बुनकर के डोंगी असन एक ठन बरछी धरे रिहिस, पर बनायाह एक ठन बड़े लउठी लेके ओकर बिरूध गीस। ओह ओ मिसरी के हांथ ले बरछी ला छीन लीस अऊ ओकरेच बरछी ले ही ओला मार डारिस। 24 यहोयादा के बेटा बनायाह के बीरता के काम अइसने रिहिस; ओह घलो ओ तीनों बड़े सूरबीरमन सहीं नामी रिहिस। 25 ओला ओ तीस सूरबीरमन ले जादा आदर मिलिस, पर ओला ओ तीनों म सामिल नइं करे गीस। अऊ दाऊद ह ओला अपन अंग रकछकमन के मुखिया ठहिराईस।

26 बड़े सूरबीरमन ये रिहिन:

योआब के भाई असाहेल,

बैतलहम के दोदो के बेटा एल्हानान,

27 हरोरी सम्मोत,

पलोनी हेलेस,

28 तकोआ ले इक्केस के बेटा ईरा,

अनातोत ले अबिएजेर,

29 हूसाती सिब्बकै,

अहोही ईलै,

30 नतोपाती महरै,

नतोपाती बाना के बेटा हेलेद,

31 बिनयामीन म गिबा ले रीबै के बेटा इतै,

पिरातोनी बनायाह,

32 गास के घाटीमन ले हूरै,

अरबात के अबीएल,

33 बहरूमी अजमावेत,

सालबोनी एल्यहबा,

34 गीजोनी हसेम के बेटामन,

हरारी सागे के बेटा योनातन,

35 हरारी साकार के बेटा अहीआम,

ऊर के बेटा एलीपाल,

36 मकेराती हेपेर,

पलोनी अहियाह,

37 करमेली हेसरो,

एजबै के बेटा नारै,

38 नातान के भाई योएल,

हगरी के बेटा मिभार,

39 अमोनी सेलेक,

बेरोती नहरै, जऊन ह सरूयाह के बेटा योआब के हथियार ढोवइया रिहिस,

40 येतेरी ईरा

येतेरी गारेब,

41 हित्ती उरियाह,

अहलै के बेटा जाबाद,

42 रूबेनी सीजा के बेटा अदीना, जऊन ह रूबेनीमन के मुखिया रिहिस, अऊ ये तीस झन ओकर संग रिहिन,

43 माका के बेटा हानान,

मितनी योसापात,

44 असतरोती उजियाह,

अरोएरी होताम के बेटा सामा अऊ येइल,

45 सिमरी के बेटा यदीएल

अऊ ओकर भाई तीसी योहा,

46 महवी के एलीएल,

एलनाम के बेटा यरीबै अऊ योसब्याह,

मोआबी यितमा,

47 एलीएल, ओबेद अऊ मसोबाई यासीएल।