2 समूएल 19

* 19 इबरानी म 19:1-43 ला 19:2-44 गने गे हवय 1 तब योआब ला ये समाचार मिलिस, "राजा ह अबसालोम बर रोवत हवय अऊ बिलाप करत हवय।" 2 एकरसेति ओ दिन के बिजय ह सबो सेना बर बिलाप म बदल गीस, काबरकि ओ दिन सेना के मनखेमन ये सुनिन, "राजा ह अपन बेटा बर सोक मनात हे।" 3 एकरसेति ओ दिन आदमीमन अइसन मुहूं ला लुकाके महनैम नगर म घुसिन, जइसन मनखेमन लड़ई ले भागके आय ले लज्जित होके अपन मुहूं छुपाथें। 4 राजा ह अपन मुहूं ला ढांपके चिचिया-चिचियाके रोईस, "हाय मोर बेटा अबसालोम! हाय अबसालोम, मोर बेटा, मोर बेटा!"

5 तब योआब ह राजा के घर म जाके ओला कहिस, "आज तेंह ओ जम्मो आदमीमन ला लज्जित करे हस, जेमन अभी-अभी तोर परान अऊ तोर बेटा अऊ बेटीमन के परान अऊ तोर घरवाली अऊ रखैलमन के परान ला बचाय हवंय। 6 तेंह ओमन ले मया करथस, जेमन तोर ले घिन करथें अऊ ओमन ले घिन करथस, जेमन तोर ले मया करथें। तेंह आज ये बात ला साफ कर देय कि तोर नजर म सेनापति अऊ ओमन के आदमीमन के कोनो महत्व नइं ए। मेंह देखत हंव कि तेंह खुस होते, यदि आज अबसालोम ह जीयत रहितिस अऊ हमन जम्मो झन मारे जातेंन। 7 अब उठके बाहिर जा अऊ अपन आदमीमन ला उत्साहित कर। में यहोवा के सपथ खाके कहत हंव कि यदि तेंह बाहिर नइं जाबे, त आज रथिया तक एको झन भी तोर संग नइं रहंय। अऊ तोर लइकापन ले लेके अब तक जतेक बिपत्ति तोर ऊपर पड़े हवय, ओ सबो ले ये बिपत्ति ह बड़े होही।"

8 तब राजा ह उठिस अऊ दुवार म जाके बईठिस। जब आदमीमन ला ये बताय गीस, "राजा ह दुवार म बईठे हवय," त ओ जम्मो झन ओकर करा आईन।

इही बीच, इसरायलीमन अपन-अपन घर भाग गे रिहिन।

दाऊद के यरूसलेम लहुंटई

9 इसरायल के सबो गोत्र म, जम्मो मनखेमन आपस म ये कहिके बहस करत रिहिन, "राजा ह हमन ला हमर बईरीमन के हांथ ले बचाईस; ओह ओ मनखे अय, जऊन ह हमन ला पलिस्तीमन के हांथ ले छोंड़ाईस। पर अब ओह अबसालोम ले बचे बर देस छोंड़के भाग गीस; 10 अऊ अबसालोम, जऊन ला हमन हमर ऊपर राज करे बर अभिसेक करेंन, ओह लड़ई म मर गीस। त अब तुमन राजा ला वापिस लाय के बारे म काबर कुछू नइं कहत हव?"

11 राजा दाऊद ह सादोक अऊ अबियातार पुरोहितमन करा ये खबर भेजिस, "यहूदा के अगुवामन ले पुछव, ‘तुमन राजा ला ओकर महल म लाय बर सबले पाछू काबर होवत हव, जबकि जम्मो इसरायल म जऊन बात के चरचा होवत हे, ओकर खबर राजा ला ओकर भवन म मिल चुके हे? 12 तुमन त मोर रिस्तेदार, मोर खुद के मांस अऊ लहू अव। त तुमन राजा ला वापिस लाय म सबले पाछू काबर होवत हव?’ 13 अऊ अमासा ला ये कहव, ‘का तेंह मोर खुद के मांस अऊ लहू नो हस? यदि तेंह योआब के जगह म हमेसा बर मोर सेना के सेनापति नइं ठहिरबे, त परमेसर मोर ले बहुंत कड़ई से बरताव करय।’ "

14 ये किसम ले, ओह यहूदा के आदमीमन के मन ला अइसन अपन कोति कर लीस कि ओ जम्मो झन एके मन के हो गीन। ओमन राजा मेर ये खबर पठोईन, "तें अऊ तोर जम्मो आदमीमन वापिस आ जावव।" 15 तब राजा ह लहुंटके यरदन नदी तक आ गीस।

यहूदा के आदमीमन गिलगाल सहर तक गे रिहिन ताकि ओमन जाके राजा ले मिलंय अऊ ओला यरदन के ये पार ले आवंय। 16 यहूदा के आदमीमन के संग बहूरीम नगर के निवासी बिनयामीनी, गेरा के बेटा सिमी ह घलो जल्दी करके राजा दाऊद ले भेंट करे बर गीस। 17 ओकर संग एक हजार बिनयामीनी मनखे अऊ साऊल के घराना के परबंधक सीबा अऊ ओकर पंदरह बेटा अऊ बीस सेवकमन घलो रिहिन। ओमन जल्दी करके यरदन नदी करा गीन, जिहां राजा ह रिहिस। 18 ओमन राजा के घराना ला लाने बर अऊ राजा के हर ईछा ला पूरा करे बर नदी के ओ पार गीन।

जब गेरा के बेटा सिमी ह यरदन के ओ पार गीस, त ओह राजा ला सास्टांग दंडवत करिस 19 अऊ राजा ला कहिस, "मोर मालिक ह मोला दोसी झन ठहिरावय। जऊन दिन मोर मालिक राजा ह यरूसलेम ला छोंड़ आईस, ओ दिन तोर सेवक ह जऊन गलती करिस, ओला तें सुरता झन कर। राजा ह ओ बात ला अपन मन ले निकाल देय। 20 काबरकि में, तोर सेवक ह जानत हंव कि मेंह पाप करे हंव, पर आज अपन मालिक राजा ले भेंट करे बर, यूसुफ के गोत्र ले में ही पहिले आय हंव।"

21 तब सरूयाह के बेटा अबीसै ह कहिस, "का सिमी ला ओकर काम के कारन मिरतू-दंड नइं मिलना चाही? ओह यहोवा के अभिसिक्त जन ला सराप देय रिहिस।"

22 दाऊद ह जबाब दीस, "हे सरूयाह के बेटामन, एकर से तुम्हर का लेना-देना हे? येमा दखल देय के तुम्हर का अधिकार हे? का आज इसरायल म कोनो ला मिरतू-दंड मिलना चाही? का मेंह नइं जानत हंव कि आज मेंह इसरायल के ऊपर राजा अंव?" 23 तब राजा ह सिमी ले कहिस, "तोला मिरतू-दंड नइं दिये जावय।" अऊ राजा ह ओकर ले सपथ खाके वायदा करिस।

24 साऊल के पोता मपीबोसेत ह घलो राजा ले भेंट करे बर गे रिहिस। राजा के चले जाय के दिन ले लेके ओकर सुरकछित वापिस लहुंटके आवत तक, ओह न तो अपन गोड़मन के खियाल रखिस अऊ न ही अपन दाढ़ी-मूछ ला काटे रिहिस अऊ न ही अपन ओनहामन ला धोय रिहिस। 25 जब ओह यरूसलेम ले राजा ले मिले बर आईस, त राजा ह ओकर ले पुछिस, "हे मपीबोसेत, तेंह मोर संग म काबर नइं गेय रहय?"

26 ओह कहिस, "हे मोर मालिक राजा, में तोर सेवक ह लंगड़ा अंव, त मेंह कहेंव, ‘में अपन गदहा म काठी कसवाहूं अऊ ओमा सवार होके राजा के संग चले जाहूं।’ पर सीबा, मोर सेवक ह मोला धोखा दीस। 27 अऊ ओह मोर मालिक राजा करा मोर चुगली करे हवय। मोर मालिक राजा ह परमेसर के स्वरगदूत के असन अय; अब तोला जऊन कुछू बने लगय, ओला तें कर। 28 मोर डोकरा-बबा*19:28 डोकरा-बबा या दादा के जम्मो संतानमन मोर मालिक राजा ले मिरतू-दंड पाय के लईक रिहिन, पर तेंह अपन सेवक ला ओमन के बीच जगह देय, जेमन तोर मेज म खाथें। मोला अऊ कोनो हक नइं ए कि मेंह राजा ले अऊ बिनती करंव?"

29 राजा ह ओकर ले कहिस, "अऊ बातमन के चरचा करे के का मतलब? मेंह तोला अऊ सीबा ला हुकूम देवत हंव कि ओ भुइयां ला तुमन दूनों आपस म बांट लेवव।"

30 तब मपीबोसेत ह राजा ले कहिस, "सीबा ह जम्मो कुछू ला लेय ले, मोर बर ये काफी ए कि मोर मालिक राजा ह सुरकछित घर लहुंट आय हे।"

31 गिलादी बरजिलै ह घलो रोगलीम ले आय रिहिस कि ओह राजा के संग यरदन नदी पार जावय अऊ उहां ले राजा ला ओकर रसता बर बिदा करय। 32 बरजिलै बहुंत डोकरा हो गे रिहिस; ओकर उमर ह अस्सी बछर रिहिस। जब राजा ह महनैम म रिहिस, तब ओ दौरान बरजिलै ही ओकर देखरेख करत रिहिस, काबरकि ओह एक बहुंत धनी मनखे रिहिस। 33 राजा ह बरजिलै ले कहिस, "मोर संग ओ पार चल अऊ यरूसलेम म मोर संग रूक, अऊ मेंह तोर देखरेख करहूं।"

34 पर बरजिलै ह राजा ला जबाब दीस, "मोला अऊ कतेक साल जीयत रहना हे कि मेंह राजा के संग यरूसलेम जावंव? 35 मेंह अब अस्सी बछर के हो गे हंव। का मेंह ये बात म अंतर बता सकत हंव कि का चीज के आनंद उठाय जावय अऊ का चीज के नइं? जऊन कुछू तोर सेवक ह खाथे-पीथे, का ओह ओकर सुवाद ला पहिचान सकत हे? का में अब पुरूस अऊ महिला गायकमन के अवाज ला सुन सकत हंव? तोर सेवक ह अपन मालिक राजा ऊपर काबर एक अतकिहा बोझ बनय? 36 तोर सेवक ह राजा के संग म यरदन के पार थोरकन दूरिहा तक जाही, पर राजा ह काबर मोला ये किसम के ईनाम देवय? 37 अपन सेवक ला वापिस लहुंटन दे कि मेंह अपन ही नगर म अपन दाई-ददा के कबर के लकठा म मरंव। पर इहां तोर दास किमहाम हवय। ओला मोर मालिक राजा के संग ओ पार जावन दे। अऊ जइसने तोला भावय, वइसने ओकर बर करबे।"

38 राजा ह कहिस, "हव, किमहाम ह मोर संग ओ पार चलही, अऊ जइसने तोला बने लगय, वइसने मेंह ओकर बर करहूं। अऊ कोनो चीज तेंह मोर ले चाहत हस, त मेंह ओला तोर बर करहूं।"

39 तब जम्मो मनखेमन यरदन के ओ पार गीन, अऊ राजा ह घलो ओ पार गीस। तब राजा ह बरजिलै ला चूमिस अऊ ओला बिदा करिस, अऊ बरजिलै ह अपन घर लहुंट गीस।

40 जब राजा ह पार होके गिलगाल करा आईस, त ओकर संग किमहाम घलो पार होईस। यहूदा के जम्मो सेना अऊ इसरायल के आधा सेना के मनखेमन राजा ला ओ पार ले गीन।

41 तब जल्दी ही इसरायल के जम्मो आदमीमन राजा करा आके ओला ये कहे लगिन, "का कारन ए कि हमर भाई, यहूदा के आदमीमन राजा ला चोर सहीं चुपेचाप ले जावत हें अऊ ओला अऊ ओकर घराना ला ओकर जम्मो आदमीमन के संग यरदन के ये पार लावत हें?"

42 यहूदा के जम्मो आदमीमन इसरायल के आदमीमन ला जबाब दीन, "हमन अइसने करेंन काबरकि राजा के हमर ले नजदीकी रिस्ता हवय। तुमन एकर बारे म, काबर गुस्सा करत हव? का हमन राजा के कुछू जेवन-पानी ला खाय हवन? या का ओमा के कुछू चीज ला हमन लेय हवन?"

43 तब इसरायली आदमीमन यहूदी आदमीमन ला जबाब दीन, "राजा म दस भाग हमर हवय; एकरसेति दाऊद ऊपर तुम्हर ले जादा हमर अधिकार हवय। त फेर तुमन काबर हमन ला अपमानित करत हव? का हमन अपन राजा ला वापिस लाय के चरचा सबले पहिले नइं करे रहेंन?"

पर यहूदी आदमीमन इसरायली आदमीमन ले अऊ जादा मजबूती से दावा करे लगिन।