1 परमपरधान यहोवा ह मोला ये देखाईस: जब राजा के हिस्सा के फसल ह लुआ गे रिहिस अऊ बाद के फसल ह आवत रिहिस, तब ओह फांफामन के दल ला तियार करत रिहिस। 2 जब फांफामन सब फसल ला खाके खेत ला साफ कर दीन, तब मेंह पराथना म पुकारेंव, "हे परमपरधान यहोवा, छेमा कर! याकूब ह कइसे जीयत रह सकत हे? ओह बहुंत छोटे हवय!"

3 तब यहोवा ह नरम पड़िस अऊ कहिस, "अब अइसन नइं होवय।"

4 परमपरधान यहोवा ह मोला ये देखाईस: परमपरधान यहोवा ह आगी के दुवारा नियाय करे बर बलावत रिहिस; ओ आगी ह महासागर ला सूखा दीस अऊ भुइयां ला नास कर दीस। 5 तब मेंह पुकारके कहेंव, "हे परमपरधान यहोवा, मेंह तोर ले बिनती करत हंव, येला रोक दे! याकूब ह कइसे जीयत रह सकत हे? ओह बहुंत छोटे हवय!"

6 तब यहोवा ह नरम पड़िस।

"अब येह घलो नइं होवय," परमपरधान यहोवा ह कहिस।

7 ओह मोला ये देखाईस: परभू ह एक ठन भीथी के तीर म ठाढ़े रिहिस, जऊन ह साहुल के भार सहीं बनाय गे रिहिस, अऊ ओकर हांथ म एक ठन साहुल रिहिस। 8 अऊ यहोवा ह मोर ले पुछिस, "हे आमोस, तोला का दिखत हवय?"

मेंह जबाब देंव, "एक ठन साहुल।"

तब परभू ह कहिस, "देख, मेंह अपन मनखे इसरायलीमन के बीच एक साहुल लगावत हंव; मेंह ओमन ला अब नइं छोड़ंव।

9 "इसहाक के ऊंचहा ठऊरमन ला नास करे जाही

अऊ इसरायल के पबितर-स्थानमन खंडहर करे जाहीं;

मेंह अपन तलवार लेके राजा यरोबाम के घराना के बिरूध ठाढ़ होहूं।"

10 तब बेतेल के पुरोहित अमसयाह ह इसरायल के राजा यरोबाम करा एक संदेस पठोईस: "आमोस ह इसरायल के बीच म तोर बिरूध एक सडयंत्र करत हे। ये देस ह ओकर बातमन ला सहे नइं सकय। 11 काबरकि आमोस ह ये कहत हे:

" ‘यरोबाम ह तलवार ले मारे जाही,

अऊ इसरायल ह अपन जनम भुइयां ले दूरिहा,

जरूर बंधुवई म चले जाही।’ "

12 तब अमसयाह ह आमोस ले कहिस, "हे अगम-दरसी, इहां ले निकल जा! यहूदा प्रदेस ला वापिस चले जा। उहां कमाके खा अऊ उहां अपन अगमबानी कर। 13 बेतेल म फेर कभू अगमबानी झन करबे, काबरकि येह राजा के पबितर-स्थान अऊ राज के मंदिर अय।"

14 आमोस ह अमसयाह ला उत्तर दीस, "मेंह न तो अगमजानी रहेंव अऊ न ही कोनो अगमजानी के बेटा, पर मेंह तो एक चरवाहा रहेंव, अऊ मेंह डूमर रूखमन के देखरेख घलो करेंव। 15 पर यहोवा ह मोला पसुमन ला चराय के काम बर बलाईस अऊ मोला कहिस, ‘जा, मोर मनखे इसरायलीमन ला अगमबानी कर।’ 16 एकरसेति अब यहोवा के बचन ला सुन। तेंह कहिथस,

" ‘इसरायल के बिरूध म अगमबानी झन कर,

अऊ इसहाक के संतानमन के बिरूध म परचार करई ला बंद कर।’

17 "एकरसेति यहोवा ह ये कहत हे:

" ‘तोर घरवाली ह सहर म एक बेस्या हो जाही,

अऊ तोर बेटा अऊ बेटीमन तलवार ले मारे जाहीं।

तोर भुइयां ला नापे जाही अऊ बांट दिये जाही,

अऊ तेंह खुद मूरती-पूजा करइयामन* के एक देस म मरबे।

अऊ इसरायल ह अपन जनम भुइयां वाले देस ले दूरिहा,

जरूर बंधुवई म चले जाही।’ "