1 जइसे मरे माछीमन खुसबू ला बदबू म बदल देथें,

वइसे ही थोरकन मुरूखता ह बुद्धि अऊ आदर ऊपर भारी पड़थे।

2 बुद्धिमान के हिरदय ह ओला सही रसता म ले जाथे,

पर मुरूख के हिरदय ह ओला गलत रसता म ले जाथे।

3 जब मुरूखमन रसता म चलत रहिथें,

त ओमन म समझ के कमी होथे

अऊ हर एक जन ला देखाथें कि ओमन कतेक मुरूख अंय।

4 यदि एक हाकिम के कोरोध ह तोर ऊपर भड़कथे,

त अपन पद ला झन छोंड़बे;

चुप रहई ह बड़े-बड़े अपराध ला सांत कर सकथे।

5 धरती म मेंह एक बुरई देखे हंव,

एक किसम के गलती, जऊन ह हाकिम के दुवारा होथे:

6 मुरूखमन ला बहुंत ऊंच पद दिये जाथे,

जबकि धनीमन छोटे पद म होथें।

7 मेंह गुलाममन ला घोड़ा के सवारी करत,

पर राजकुमारमन ला गुलाममन सहीं रेंगत देखे हंव।

8 जऊन ह खंचवा कोड़थे, ओह ओमा गिर सकथे;

जऊन ह दीवार म सेंध लगाथे, ओला सांप ह चाब सकथे।

9 जऊन ह खदान ले पथरा निकालथे, ओला पथरा से चोट लग सकथे;

जऊन ह लकरी चीरथे, ओला लकरी ले खतरा हो सकथे।

10 यदि टांगा म धार नइं ए

अऊ येकर किनारे ला तेज नइं करे गे हवय,

त जादा ताकत के जरूरत पड़थे,

पर कोनो काम म कुसलता ह सफलता देवाथे।

11 यदि सांप ह बस म करे के पहिले कोनो ला काट लेथे,

त बस म करइया ला कोनो फायदा नइं होवय।

12 बुद्धिमान मनखे के बात म अनुग्रह होथे,

पर मुरूखमन अपन खुद के बात के दुवारा नास हो जाथें।

13 सुरू म ओमन के बातमन मुरूखता के होथें;

अन्त म ओमन दुस्ट पागलपन होथें—

14 अऊ मुरूखमन बहुंत बात करथें।

कोनो नइं जानय कि का होवइया हे—

कोन ह कोनो अऊ ला बता सकथे कि ओमन के बाद का होवइया हे?

15 मुरूखमन के मेहनत ह ओमन ला थका देथे;

ओमन नगर के रसता ला घलो नइं जानंय।

16 ओ देस के ऊपर हाय, जेकर राजा ह एक सेवक रिहिस*

अऊ जेकर हाकिममन बिहनियां मऊज-मस्ती म लग जाथें।

17 धइन अय ओ देस, जेकर राजा ह उत्तम बंस के होथे

अऊ जेकर हाकिममन सही समय म जेवन करथें—

ओमन के जेवन ह ताकत बर होथे, मतवारपन बर नइं।

18 आलसीपन ले छत के कड़ीमन झुक जाथें;

निठल्लापन के कारन घर के छत ले पानी चूहथे।

19 जेवनार ला हंसी-खुसी बर तियार करे जाथे,

अंगूर के मंद ह जिनगी ला आनंदित कर देथे,

अऊ पईसा के दुवारा हर चीज हो सकथे।

20 अपन मन के बिचार म घलो राजा ला गाली झन देबे,

या न ही अपन सोये के कमरा म कोनो धनी मनखे ला सराप देबे,

काबरकि अकास के कोनो चिरई ह तोर बातमन ला ले जा सकथे,

अऊ कोनो उड़नेवाला चिरई ह तोर कहे बात ला बता सकथे।