1 हर एक काम बर एक तय समय हवय,

अऊ धरती म हर काम करे के एक समय होथे:

2 जनम लेय के एक समय अऊ मरे के एक समय,

बीजा या पऊधा लगाय के एक समय अऊ लगाय ला उखाने के एक समय,

3 मार डारे के एक समय अऊ चंगा करे के एक समय,

टोर-फोरके गिराय के एक समय अऊ बनाय के एक समय;

4 रोए के एक समय अऊ हंसे के एक समय,

सोक मनाय के एक समय अऊ नाचे के एक समय,

5 पथरामन ला बगराय के एक समय अऊ ओमन ला संकेले के एक समय,

कोनो ला पोटारे के एक समय अऊ नइं पोटारे के एक समय,

6 खोजे के एक समय अऊ छोंड़ देय के एक समय,

बचाके रखे के एक समय अऊ फटिक देय के एक समय,

7 चीरे के एक समय अऊ सीले के एक समय,

चुप रहे के एक समय अऊ गोठियाय के एक समय,

8 मया करे के एक समय अऊ नफरत करे के एक समय,

लड़ई करे के एक समय अऊ सांति के एक समय।