एजरा 10

मनखेमन के पाप स्वीकार करई

1 जब एजरा ह परमेसर के भवन के आघू म रोवत, मुहूं-भरसा गिरके पराथना करत अऊ पाप ला मानत रिहिस, तब इसरायली आदमी, माईलोगन अऊ लइकामन के एक बड़े भीड़ ओकर चारों कोति जमा हो गीस, अऊ मनखेमन घलो बिलख-बिलखके रोवन लगिन। 2 तब यहीएल के बेटा सेकनयाह, जऊन ह एलाम के संतान म ले रिहिस, एजरा ले कहिस, "हमन हमर आसपास के मनखेमन ले परदेसी माईलोगनमन ले बिहाव करके अपन परमेसर के संग बिसवासघात करे हन। पर अतेक होय के बाद घलो, अभी भी इसरायल बर आसा हवय। 3 अब हमन हमर परमेसर के आघू म ये करार बांधन कि हमन हमर मालिक अऊ जेमन हमर परमेसर के हुकूम के भय मानथें, ओमन के सलाह मुताबिक ये जम्मो माईलोगन अऊ ओमन के लइकामन ला दूरिहा कर देवन। ये काम कानून के मुताबिक करे जावय। 4 उठ; ये बात ह तोर हांथ म हवय। हमन तोर संग हवन, एकरसेति हिम्मत बांधके ये काम ला कर।"

5 तब एजरा ह उठिस, अऊ अगुवा पुरोहित अऊ लेवी अऊ जम्मो इसरायलीमन ला दिये गय सलाह के मुताबिक काम करे बर सपथ खवाईस। अऊ ओमन सपथ खाईन। 6 तब एजरा ह परमेसर के भवन के आघू ले उठिस अऊ एलियासीब के बेटा यहोहानान के कमरा म गीस। जब तक ओह उहां रिहिस, ओह न तो रोटी खाईस, अऊ न पानी पीईस, काबरकि ओह बंधुवई म ले आय मनखेमन के बिसवासघात के कारन सोक मनात रिहिस।

7 तब ओमन यहूदा अऊ यरूसलेम म रहइया बंधुवई म ले आय जम्मो मनखेमन बर एक घोसना करवाईन कि ओमन यरूसलेम म जूरंय। 8 जऊन कोनो तीन दिन के भीतर नइं आही, ओकर पूरा संपत्ति ला अधिकारी अऊ अगुवामन के फैसला के मुताबिक जपत कर लिये जाही अऊ ओला बंधुवई ले आय सभा ले निकाल दिये जाही।

9 तब तीन दिन के भीतर, यहूदा अऊ बिनयामीन के जम्मो आदमीमन यरूसलेम म जूर गीन। अऊ नौवां महिना के बीसवां दिन, जम्मो मनखेमन परमेसर के भवन के आघू, चऊक म ओ बिसय के कारन अऊ बारिस के कारन बहुंत दुखी बईठे रिहिन। 10 तब एजरा पुरोहित ह ठाढ़ होके ओमन ले कहन लगिस, "तुमन बिसवासघात करे हवव; तुमन परदेसी माईलोगनमन ले बिहाव करे हव, अऊ इसरायल के दोस ला बढ़ाय हव। 11 एकरसेति अब यहोवा, अपन पुरखामन के परमेसर के आदर करव,*10:11 या अपन पाप ला मान लेवव अऊ ओकर ईछा ला पूरा करव। अपन आसपास के आनजात मनखेमन ले अऊ अपन परदेसी घरवालीमन ले अपनआप ला अलग करव।"

12 तब पूरा सभा के मनखेमन चिचियाके जबाब दीन: "तेंह सही कहत हस! तेंह जइसने कहत हस, हमन ला वइसने करना जरूरी ए। 13 पर इहां बहुंत मनखेमन हवंय अऊ येह बारिस के बेरा अय; एकरसेति हमन बाहिर ठाढ़ नइं रह सकन। एकर अलावा, ये काम ला एक या दू दिन म नइं करे जा सकय, काबरकि हमन ये बात म बड़े पाप करे हवन। 14 जम्मो सभा के सेति हमर अधिकारीमन काम करंय। तब हमर नगरमन के हर ओ आदमी, जऊन ह कोनो परदेसी माईलोगन ले बिहाव करे हवय, हर नगर के अगुवा अऊ नियायीमन के संग ठहिराय गय समय म आवय, जब तक हमर परमेसर के भड़के कोरोध ह ये बिसय म हमर ले दूरिहा नइं हो जावय।" 15 सिरिप असाहेल के बेटा योनातन अऊ तिकवा के बेटा यहजयाह अऊ संग म मसुल्लाम अऊ सब्बतै लेवी ये बात के बिरोध करिन।

16 तब बंधुवई ले आय मनखेमन वइसे करिन, जइसे एजरा ह सलाह देय रिहिस। तब एजरा पुरोहित ह ओ आदमीमन ला चुनिस, जेमन परिवार के मुखिया रिहिन, हर एक परिवार के दल ले एक झन, अऊ ओ जम्मो झन ला नांव के दुवारा ठहिराय गीस। दसवां महिना के पहिला दिन, ओमन ये मामला के जांच-पड़ताल करे बर बईठिन, 17 अऊ पहिला महिना के पहिला दिन तक, ओमन ओ जम्मो मनखेमन के जांच पूरा कर लीन, जेमन ह परदेसी माईलोगनमन ले बिहाव करे रिहिन।

अंतर-जात बिहाव के दोसी आदमीमन

18 पुरोहितमन के संतानमन ले, येमन परदेसी माईलोगनमन ले बिहाव करे रिहिन:

योसादाक के बेटा यहोसू के संतानमन ले, अऊ ओकर भाईमन ले:

मासेयाह, एलिएजेर, यारीब अऊ गदलयाह। 19 (ओमन अपन हांथ देके अपन घरवालीमन ला छोंड़ देय के सपथ खाईन, अऊ अपन दोस बर ओमन बरदी म ले एक-एक ठन मेढ़ा दोस-बलिदान के रूप म चघाईन।)

20 इम्मेर के संतान म ले:

हनानी अऊ जबदयाह।

21 हारीम के संतान म ले:

मासेयाह, एलियाह, समायाह, यहीएल अऊ उजियाह।

22 पसहूर के संतान म ले:

एलयोएनै, मासेयाह, इसमायल, नतनेल, योजाबाद अऊ एलासा।

23 लेवीमन म ले:

योजाबाद, सिमी, केलायाह (जऊन ह कलीता कहाथे), पतहियाह, यहूदा अऊ एलिएजेर।

24 संगीतकारमन ले:

एलियासीब।

दुवारपालमन ले:

सल्लूम, तेलेम अऊ ऊरी।

25 अऊ आने इसरायलीमन ले:

परोस के संतान म ले:

रमयाह, यिजियाह, मलकियाह, मियामीन, एलिआजर, मलकियाह अऊ बनायाह।

26 एलाम के संतान म ले:

मतनयाह, जकरयाह, यहीएल, अब्दी, यरेमोत अऊ एलियाह।

27 जत्तू के संतान म ले:

एलयोएनै, एलियासीब, मतनयाह, यरेमोत, जाबाद अऊ अजीजा।

28 बेबै के संतान म ले:

यहोहानान, हननयाह, जब्बै अऊ अतलै।

29 बानी के संतान म ले:

मसुल्लाम, मल्लूक, अदायाह, यासूब, साल अऊ यरेमोत।

30 पहत-मोआब के संतान म ले:

अदना, कलाल, बनायाह, मासेयाह, मतनयाह, बसलेल, बिन्नूई अऊ मनस्से।

31 हारीम के संतान म ले:

एलिएजेर, यिसियाह, मलकियाह, समायाह, सिमोन, 32 बिनयामीन, मल्लूक अऊ समरयाह।

33 हासूम के संतान म ले:

मत्तनै, मतता, जाबाद, एलीपेलेत, यरेमै, मनस्से अऊ सिमी।

34 बानी के संतान म ले:

मादै, अमराम, ऊएल, 35 बनायाह, बेदयाह, कलूही, 36 वनियाह, मरेमोत, एलियासीब, 37 मतनयाह, मत्तनै, यासू;

38 बानी बिन्नूई के संतान म ले:

सिमी, 39 सेलेमियाह, नातान, अदायाह, 40 मकनदबै, सासै, सारै, 41 अजरेल, सेलेमियाह, समरयाह, 42 सल्लूम, अमरयाह अऊ यूसुफ।

43 नबो के संतान म ले:

येइल, मत्तितियाह, जाबाद, जबीना, यद्दई, योएल अऊ बनायाह।

44 ये जम्मो झन परदेसी माईलोगनमन ले बिहाव करे रिहिन, अऊ ओमा के कुछू झन के ये घरवालीमन ले लइकामन घलो पईदा होय रिहिन।