1 यहोवा के ये बचन मोर मेर आईस: 2 "हे मनखे के बेटा, सूर सहर के बिसय म एक ठन बिलापगीत ले। 3 सूर ले कह, जऊन ह समुंदर के मुंहटा म बसे हवय, अऊ बहुंत अकन समुंदर तीर के मनखेमन के बेपारी अय, ‘परमपरधान यहोवा ह ये कहत हे:

" ‘हे सूर, तेंह कहिथस,

"मेंह बहुंत सुघर हंव।"

4 तोर इलाका ह ऊंच समुंदर म रिहिस;

तोर बनइयामन तोला एकदम सुघर बनाईन।

5 ओमन तोर जम्मो इमारती लकरी

सनीर* के सनोवर के लकरी ले लीन;

तोर बर पतवार बनाय बर

ओमन लबानोन के देवदार के लकरी लीन।

6 ओमन तोर पतवारमन ला

बासान के बलूत रूखमन ले बनाईन;

कित्ती के समुंदर तीर के गोपेर लकरी ले

ओमन तोर पानी जहाज के छत ला बनाईन अऊ हाथी-दांत ले सजाईन।

7 तोर जहाज के तिरपाल ह मिसर देस के कसीदा करे गय मलमल कपड़ा ले बने रिहिस

अऊ येह तोर बर झंडा के काम करय;

तोर तिरपालमन एलीसाह* के समुंदर तीर के

नीला अऊ बैंगनी कपड़ा के बने रिहिन।

8 तोर पतवार चलानेवालामन सीदोन अऊ अरवद सहरमन के आदमी रिहिन;

हे सूर, तोर कुसल आदमीमन नाविक के रूप म जहाज म रिहिन।

9 गबाल के अनुभवी कारीगरमन

जहाज के मरम्मत करे बर जहाज म रिहिन।

समुंदर के जम्मो जहाज अऊ ओमन के चलइयामन

तोर बेपार के सामान के लेन-देन करे बर संग-संग आ गे रिहिन।

10 " ‘फारसी, लूदी अऊ पूती मनखेमन

तोर सेना म सैनिक के रूप म रिहिन।

ओमन अपन ढाल अऊ टोप ला

तोर सोभा बढ़ात तोर दीवारमन म टांग दीन।

11 अरवद सहर अऊ हेलेक इलाका के आदमीमन

चारों कोति ले तोर दीवारमन के पहरेदारी करिन;

गमाद नगर के आदमीमन

तोर मीनारमन म रिहिन।

ओमन अपन ढाल चारों कोति तोर दीवारमन म टांग दीन;

ओमन तोर सुघरता बहुंत बढ़ाईन।

12 " ‘जम्मो किसम के सामान के बहुंतायत के कारन तरसीस सहर के मनखेमन तोर संग बेपार करिन; ओमन चांदी, लोहा, टीन अऊ सीसा ला देके तोर माल ला बिसाईन।

13 " ‘यूनान, तूबल अऊ मेसेक देस के मनखेमन तोर संग बेपार करिन; ओमन तोर बेपारी सामान के बदला म दास-दासी अऊ कांसा के चीजमन ला दीन।

14 " ‘बेत-तोगरमा इलाका के आदमीमन तोर बेपार के सामान के बदला म रथवाला घोड़ा, सेना के घोड़ा अऊ खच्चरमन ला दीन।

15 " ‘रूदुस* के आदमीमन तोर संग बेपार करिन, अऊ बहुंत अकन समुंदर तीर के मनखेमन तोर खरीददार रिहिन; ओमन तोर सामान के बदले हाथी-दांत अऊ तेंदू के कठवा देवत रिहिन।

16 " ‘तोर मेर बहुंत सामान होय के कारन अराम के मनखेमन तोर ले बेपार करिन; ओमन तोर सामान के बदले हरा लालमनि, बैंगनी रंग के ओनहा, कसीदाकारी करे गय ओनहा, बढ़िया मलमल के ओनहा, मूंगा अऊ लालमनि देवत रिहिन।

17 " ‘यहूदा अऊ इसरायल घलो तोर ले बेपार करत रिहिन; ओमन तोर सामान के बदले मिन्नीत के गहूं, मिठई, मंधरस, जैतून तेल, अऊ मलहम देवत रिहिन।

18 " ‘तोर बहुंत अकन सामान अऊ बहुंत धन-संपत्ति के कारन दमिस्क ह तोर संग बेपार करिस। ओमन तोला हेलबोन नगर के अंगूर के मंद, अऊ जाहर नगर के ऊन दीन। 19 अऊ ईजाल ले लकरी के पीपा म भरे अंगूर के मंद के बदला बनाय गय लोहा, दालचीनी अऊ तेजपान दीन।

20 " ‘घोड़ा के पीठ म बिछाय के कम्बल बर ददान ह तोर संग बेपार करिस।

21 " ‘अरब के मनखे अऊ केदार के जम्मो राजकुमारमन तोर सामान के खरीददार रिहिन; ओमन मेढ़ा-पीला, मेढ़ा, अऊ बोकरा देके तोर संग लेन-देन करत रिहिन।

22 " ‘सेबा राज अऊ रामा सहर के बेपारीमन तोर संग बेपार करिन; तोर सामान के बदले म ओमन तोला सबले बने किसम के मसाला अऊ कीमती रत्न, अऊ सोन देवत रिहिन।

23 " ‘हारान, कन्ने, अऊ एदेन अऊ सेबा, अस्सूर अऊ किलमद सहरमन के बेपारीमन तोर संग बेपार करिन। 24 तोर बजार के जगह म ओमन तोर सामान के बदले सुघर ओनहा, नीला कपड़ा, बूटावाले ओनहा अऊ बंटे अऊ कसके बंधे डोरी वाले रंग-बिरंगा गलीचा देवत रिहिन।

25 " ‘तोर बेपारी सामान के ढोवई

तरसीस के पानी जहाजमन ले होथे।

जब तें समुंदर के यातरा म जाथस

त जहाज म भारी सामान भरे रहिथे।

26 तोर जहाज के खेवइयामन

तोला गहिला समुंदर म ले जाथें।

पर पूरब के हवा ह दूरिहा समुंदर म

तोर जहाज के कुटा-कुटा कर दीही।

27 तोर संपत्ति, बेपारी सामान अऊ आने सामान,

तोर नाविकमन, जहाज खेवइयामन अऊ जहाज ला मरम्मत करइयामन,

तोर बेपारी अऊ तोर सैनिकमन,

अऊ जहाज म के हर एक चीज

ओ दिन समुंदर के बीच डूब जाहीं

जब तोर जहाज ह टूट जाही।

28 जब तोर जहाज खेवइयामन चिचियाहीं

त समुंदर तीर के भुइयां ह कांप उठही।

29 पतवार चलइया जम्मो झन

अपन जहाजमन ला छोंड़ दीहीं;

नाविक अऊ जहाज खेवइया जम्मो झन

जहाज ले उतरके समुंदर तीर म ठाढ़ हो जाहीं।

30 ओमन तोर ऊपर चिचियाहीं

अऊ फूट-फूटके रोहीं;

ओमन अपन मुड़ म धुर्रा छिंचके

राख म घुंडलहीं।

31 ओमन तोर कारन अपन मुड़ ला मुड़ा लीहीं

अऊ बोरा के कपड़ा पहिरहीं।

ओमन अपन मन म भारी दुख

अऊ भारी सोक ले तोर बर रोहीं।

32 जब ओमन तोर बिसय म रोहीं अऊ सोक मनाहीं,

त ओमन तोर बारे म एक बिलापगीत गाहीं:

"कोन ह समुंदर ले घिरे के बाद घलो

सूर के सहीं चुपेचाप रिहिस?"

33 जब तोर बेपार के माल ह समुंदर म जावय,

त तेंह बहुंते जाति के मनखेमन ला संतुस्ट करय;

अपन बहुंत धन अऊ बेपार के माल ले

तेंह धरती के राजामन ला धनी कर देय।

34 अब तें गहिला पानी म

समुंदर के दुवारा चकनाचूर हो गे हस;

तोर जहाज के माल अऊ तोर पूरा झुंड

तोर संग डूब गे हवय।

35 समुंदर तीर म रहइया जम्मो झन

तोर दसा देखके डर गे हवंय;

ओमन के राजामन डर के मारे कांपथें

अऊ डर के मारे ओमन के चेहरा के रंग उड़ गे हवय।

36 जाति-जाति के बीच बेपारीमन तोर हंसी उड़ाथें;

तोर एक भयंकर अन्त हो गे हवय

अऊ तोर नामोनिसान नइं रहय।’ "