उतपत्ती 12

अब्राम ला परमेसर के बुलावा

1 यहोवा ह अब्राम ला कहिस, "अपन देस, अपन मनखे अऊ अपन ददा के परिवार ला छोंड़के ओ देस म चले जा, जेला मेंह तोला देखाहूं।

2 "मेंह तोर ले एक बड़े जाति बनाहूं

अऊ मेंह तोला आसीस दूहूं;

मेंह तोर नांव ला बहुंत बड़े करहूं

अऊ तेंह आसीस के कारन होबे।

3 जऊन मन तोला आसीस दीहीं, ओमन ला में आसीस दूहूं

अऊ जऊन ह तोला सराप दीही, ओला मेंह सराप दूहूं;

अऊ ये धरती के जम्मो मनखेमन

तोर जरिये आसीस पाहीं।"*12:3 या मनखेमन आसीस देय म तोर नांव के उपयोग करहीं (देखव 48:20)