1 तब याकूब ह अपन बेटामन ला बलाके कहिस: "ये मेर जूरव ताकि में तुमन ला बता सकंव कि अवइया दिन म तुम्हर ऊपर का होवइया हे।

2 "हे याकूब के बेटामन, ये मेर जूरव अऊ सुनव;

अपन ददा इसरायल के बात ला सुनव।

3 "रूबेन, तें मोर पहिले जनमे बेटा अस,

तें मोर सक्ति अऊ मोर ताकत के पहिली फर अस,

तें आदर के लईक, अऊ ताकत म उत्तम अस।

4 तें जो पानी के लहरा सहीं उफननेवाला अस, तें अब उत्तम नइं ठहिरबे,

काबरकि तें अपन ददा के बिछौना ऊपर चघे,

मोर खटिया ऊपर चघे अऊ ओला असुध करे।*

5 "सिमोन अऊ लेवी तो भाई-भाई अंय—

ओमन के तलवारमन हिंसा करे के हथियार अंय।

6 मोला ओमन के सभा म झन जाना पड़य,

मोला ओमन के संगत म झन रहना पड़य,

काबरकि ओमन अपन कोप म मनखेमन ला मार डारे हवंय

अऊ अपन खुसी बर बईलामन ला खोरवा कर दे हवंय।*

7 धिक्कार ए ओमन के कोप ला, जेह भयंकर रिहिस,

अऊ ओमन के कोरोध ला, जेह बहुंत निरदयी रिहिस!

मेंह ओमन ला याकूब म फईला दूहूं

अऊ इसरायल म तितिर-बितिर कर दूहूं।

8 "हे यहूदा,* तोर भाईमन तोर परसंसा करहीं;

तोर हांथ ह तोर बईरी के घेंच म होही;

तोर ददा के बेटामन तोला दंडवत करहीं।

9 हे यहूदा, तेंह सेर के पीला अस;

हे मोर बेटा, तें सिकार करके लहुंटे हस।

सेर के सहीं, ओह बरताव करके बईठ जाथे,

सेरनी के सहीं—कोन ह ओला छेड़े के हिम्मत करथे।

10 राजदंड ह यहूदा करा ले नइं जावय,

अऊ न ही सासन करइया के छड़ी ह ओकर बंस ले अलग होही,

जब तक कि ओह* नइं आ जाही, जेकर ये चीजमन अंय

अऊ जाति-जाति के मनखेमन ओकर बस म नइं हो जाहीं।

11 ओह अपन गदहा ला अंगूर के नार म,

अऊ अपन गदहा के पीला ला उत्तम नार म बांधही;

ओह अपन ओनहा ला अंगूर के मंद म,

अऊ अपन पहिरावा ला अंगूर के रस म धोही।

12 ओकर आंखीमन अंगूर के मंद ले जादा गहिरा रंग,

अऊ ओकर दांतमन दूध ले जादा सफेद होहीं।

13 "जबूलून ह समुंदर के तीर म निवास करही

अऊ पानी जहाजमन बर बंदरगाह के काम करही;

ओकर सीमना ह सीदोन कोति बढ़ही।

14 "इस्साकार एक बलवान गदहा अय,

जेह भेड़मन के भेड़साला म ढलंगे रहिथे।

15 जब ओह देखथे कि ओकर सुसताय के जगह ह कतेक बने हे

अऊ ओकर जमीन ह कतेक मनोहर हे,

त ओह बोझा ला लेय बर अपन कंधा ला नवाथे

अऊ बंधुवा मजदूर बन जाथे।

16 "दान* ह इसरायल के एक गोत्र के रूप म

अपन मनखेमन के नियाय करही।

17 दान ह सड़क के तीर म एक सांप,

रसता के तीर म एक जहरिला सांप सहीं होही,

जेह घोड़ा के एड़ी ला डसथे,

जेकर ले ओकर सवार ह पाछू कोति गिरथे।

18 "हे यहोवा, में तोर दुवारा छुटकारा पाय के बाट जोहत हंव।

19 "गाद* के ऊपर हमला करइयामन के एक दल ह चढ़ई तो करही,

पर ओह ओमन के पाछू कोति ले ओमन ऊपर हमला करही।

20 "आसेर के भोजन-बस्तु ह उत्तम होही;

अऊ ओह एक राजा के पसंद के सुवादवाला भोजन देय करही।

21 "नपताली ह खुले म घुमनेवाला एक हिरनी सहीं अय,

जऊन ह सुघर पीला जनथे।

22 "यूसुफ एक फलवंत अंगूर के नार सहीं ए,

ओह एक झरना के लकठा म एक फलवंत अंगूर के नार सहीं ए,

जेकर डालीमन भीथी ऊपर चघके बगर जाथें।

23 धनुसधारीमन दुखी होके ओकर ऊपर हमला करिन;

अऊ बईरता करके ओकर ऊपर तीर चलाईन।

24 पर ओकर धनुस इस्थिर रिहिस,

याकूब के सक्तिसाली परमेसर के हांथ के कारन,

ओ चरवाहा, इसरायल के चट्टान के कारन,

ओकर बाहांमन फुरतिला होईन,

25 काबरकि तोर ददा के परमेसर ह तोर मदद करथे,

काबरकि सर्वसक्तिमान ह तोला आसीस देथे,

ये आसीस ह अकास के ऊपर के अय,

ये आसीस ह गहिरा झरना के खाल्हे के अय,

अऊ ये आसीस ह छाती अऊ गरभ के आसीस अय।

26 तोर ददा के आसीसमन

पुराना पहाड़मन के आसीस ले,

पुराना पहाड़ीमन के दान ले घलो बड़े अंय।

ये जम्मो आसीस यूसुफ के मुड़ म आवय,

जऊन ह अपन भाईमन ले अलग होके राजा बन गीस, ओकर ललाट म आवय।

27 "बिनयामीन ह एक भूखा भेड़िया सहीं अय;

बिहनियां ओह सिकार ला मन भरके खाथे,

अऊ सांझ के लूट के सामान ला बांट लेथे।"

28 ये जम्मो इसरायल के बारह गोत्र अंय, अऊ ये ओ बातमन अंय, जेला ओमन के ददा ह ओमन ले कहिस जब ओह ओमन ला आसीस दीस; जइसने हर एक बर उचित रिहिस, वइसने ओह ओमन ला आसीस दीस।

29 तब याकूब ह ओमन ला हुकूम दीस: "बहुंत जल्दी मेंह मरके अपन पुरखामन संग मिलनेचवाला हंव। मोला हित्ती एपरोन के खेत के गुफा म मोर पुरखामन संग माटी दूहू, 30 याने कि ओ गुफा म जेह कनान देस म ममरे के लकठा म मकपेला के खेत म हवय, जेला अब्राहम ह हित्ती एपरोन ले खेत सहित एकरसेति बिसाय रिहिस कि ओला मरघटी बनावय। 31 उहां अब्राहम अऊ ओकर घरवाली सारा ला माटी देय गे रिहिस; उहां इसहाक अऊ ओकर घरवाली रिबका ला माटी देय गे रिहिस; अऊ उहां लिआ ला घलो माटी दे हंव। 32 ओ खेत अऊ ओमा के गुफा ला हित्तीमन ले बिसाय गे रिहिस।"

33 जब याकूब ह अपन बेटामन ला हुकूम दे डारिस, त ओह अपन गोड़ ला खटिया ऊपर करके अपन परान ला छोंड़ दीस अऊ अपन पुरखामन संग जा मिलिस।