उतपत्ती 22

अब्राहम के परिछा

1 कुछू समय बाद, परमेसर ह अब्राहम के परिछा लीस। ओह अब्राहम ला कहिस, "हे अब्राहम!"

अब्राहम ह कहिस, "में इहां हंव।"

2 तब परमेसर ह कहिस, "अपन बेटा याने अपन एकलऊता बेटा इसहाक ला, जेला तें मया करथस, अपन संग लेके मोरियाह छेत्र म जा। उहां ओला एक पहाड़ ऊपर होम-बलिदान करके चघा, जेला में तोला देखाहूं।"

3 अब्राहम बड़े बिहनियां उठिस अऊ अपन गदहा ऊपर सामान लादिस। ओह अपन संग म दू झन सेवक अऊ अपन बेटा इसहाक ला लीस। जब ओह होम-बलिदान बर लकरी फोर लीस, त ओह ओ जगह बर रवाना होईस, जेकर बारे म परमेसर ह ओला बताय रिहिस। 4 तीसर दिन अब्राहम ह आंखी उठाके ओ जगह ला दूरिहा ले देखिस, 5 अऊ ओह अपन सेवकमन ला कहिस, "गदहा के संग इहां ठाढ़े रहव; ये लड़का अऊ में उहां जावत हन। हमन अराधना करके तुम्हर करा लहुंट आबो।"

6 तब अब्राहम ह होम-बलिदान बर लकरी ला लीस अऊ अपन बेटा इसहाक के कंधा म रखिस, अऊ अपन खुद आगी अऊ छुरी ला धरिस। जब ओ दूनों एक संग जावत रिहिन, 7 त इसहाक ह अपन ददा अब्राहम ला कहिस, "हे ददा?"

अब्राहम ह कहिस, "का बात ए, बेटा?"

त इसहाक ह कहिस, "देख, आगी अऊ लकरी तो हमर करा हवय, पर होम-बलिदान बर मेढ़ा-पीला कहां हे?"

8 अब्राहम ह कहिस, "होम-बलिदान बर मेढ़ा-पीला के उपाय परमेसर ह खुद करही, बेटा।" अऊ ओ दूनों संगे-संग आघू बढ़त गीन।

9 जब ओमन ओ जगह म हबरिन, जेकर बारे म परमेसर ह ओला बताय रिहिस, तब अब्राहम ह उहां एक बेदी बनाके ओकर ऊपर लकरी ला छांट-छांटके रखिस, अऊ अपन बेटा इसहाक ला बांधके बेदी के लकरी ऊपर लेटा दीस। 10 तब ओह अपन बेटा ला बलि करे बर अपन हांथ म छुरी ला धरिस। 11 पर यहोवा के स्वरगदूत ह स्वरग ले ओला नरियाके कहिस, "हे अब्राहम! हे अब्राहम!"

ओह कहिस, "में इहां हंव।"

12 परमेसर के दूत ह कहिस, "ओ लड़का ऊपर हांथ झन बढ़ा; ओला कुछू झन कर। अब में जानत हंव कि तें परमेसर के भय मानथस, काबरकि तें मोर बर अपन बेटा याने अपन एकलऊता बेटा ला घलो नइं छोंड़े।"

13 तब अब्राहम ह आंखी उठाके देखिस, त ओकर पाछू म एक मेढ़ा रहय, जेकर सींग झाड़ी म फंसे रहय। अब्राहम ह जाके ओ मेढ़ा ला लानिस अऊ अपन बेटा के बदला म, ओला होम-बलिदान के रूप म चघाईस। 14 एकरसेति अब्राहम ओ जगह के नांव, "यहोवा ह दीही" रखिस। अऊ आज घलो ये कहे जाथे, "यहोवा के पहाड़ ऊपर परबंध होही।"

15 यहोवा के स्वरगदूत ह दूसर बेर स्वरग ले अब्राहम ला नरियाके कहिस, 16 "यहोवा के ये बचन अय कि में अपनेच ही किरिया खावत हंव कि तें जो ये काम करे कि अपन बेटा याने अपन एकलऊता बेटा ला घलो नइं छोंड़य, 17 एकर कारन मेंह तोला जरूर आसीस दूहूं अऊ तोर संतानमन ला अकास के तारामन अऊ समुंदर तीर के बालू सहीं अनगिनत करहूं। तोर संतानमन अपन बईरीमन के सहरमन ला अपन अधिकार म ले लीहीं, 18 अऊ तोर संतान के जरिये धरती के जम्मो जाति के मनखेमन आसीस पाहीं, काबरकि तें मोर बात ला माने हस।"

19 तब अब्राहम अपन सेवकमन करा लहुंट आईस अऊ ओमन एक संग बेरसेबा गीन। अऊ अब्राहम ह बेरसेबा म रहत रिहिस।

नाहोर के बेटामन

20 कुछू समय के बाद, अब्राहम ला ये संदेस मिलिस, "मिलका ह घलो दाई बने हे; ओह तोर भाई नाहोर कोति ले लइकामन ला जनमे हे।

21 ओकर बड़खा बेटा ऊस अऊ ओकर भाई बूज,

कमूएल (जऊन ह अराम के ददा होईस),

22 केसेद, हजो, पिलदास, यिदलाप अऊ बतूएल।"

23 ये आठों बेटामन ला मिलका ह अब्राहम के भाई नाहोर कोति ले जनम दीस।

अऊ बतूएल ह रिबका के ददा होईस।

24 नाहोर के रूमा नांव के एक रखैल रिहिस;

जेकर ले तेबह, गहम, तहस अऊ माका पईदा होईन।