Gênesis 6

संसार म बुरई

1 जब मनखेमन धरती म गनती म बाढ़े लगिन अऊ ओमन के बेटीमन जनमिन, 2 त परमेसर के बेटामन*6:2 परमेसर के बेटामन इबरानी म स्वरगदूतमन; अयू 1:6; 2:1; भजन 29:1; 89:6; दानि 3:25 2 पत 2:4-5; यहू 6 देखिन कि मनखे के बेटीमन सुघर हें अऊ ओमन जे-जे ला पसंद करिन, तेमन ले बिहाव कर लीन। 3 तब यहोवा ह कहिस, "मोर आतमा ह मनखे संग सदाकाल बर नइं रहय, काबरकि मनखे ह अमर नो हय; ओमन के उमर एक सौ बीस बछर होही।"

4 ओ समय धरती म नेफिलीम*6:4 नेफिलीम के मतलब दानव या बड़े अऊ सक्तिसाली मनखेमन रहत रिहिन, अऊ एकर पाछू जब परमेसर के बेटामन मनखे के बेटीमन संग संबंध बनाईन, त ओमन के मेल से जऊन लइका जनमिन, ओमन ओ समय सूरबीर अऊ जाने-माने मनखे रिहिन।

5 यहोवा ह देखिस कि मनखेमन के बुरई धरती म बहुंत बढ़ गे हवय, अऊ ओमन के हिरदय के जम्मो बिचार ह हर समय सिरिप बुरई के ही होथे। 6 त यहोवा ह धरती म मनखे ला बनाके पछताईस, अऊ अपन मन म बहुंत दुखी होईस। 7 एकरसेति यहोवा ह कहिस, "मेंह मनखे ला, जेला मेंह बनाय हंव, धरती म ले नास कर दूहूं—अऊ ओमन के संग पसु, चिरई अऊ भुइयां म रेंगइया जन्तु, ओ जम्मो ला नास कर दूहूं—काबरकि मेंह ओमन ला बनाके पछतात हंव।" 8 पर यहोवा के दया-दिरिस्टी नूह ऊपर बने रिहिस।

नूह अऊ जल परलय

9 नूह अऊ ओकर परिवार के बिबरन ये अय।

नूह एक धरमी अऊ अपन समय के मनखेमन म निरदोस रिहिस, अऊ ओह ईमानदारी से परमेसर के संग चलिस।