यरमियाह 3

14 "हे बिसवासहीन मनखेमन मोर करा लहुंट आवव," यहोवा ह ये घोसना करत हे, "काबरकि मेंह तुम्हर घरवाला अंव। मेंह तुमन ला चुनहूं—एक नगर ले एक झन अऊ एक बंस ले दू झन—अऊ तुमन ला सियोन म लानहूं। 15 तब मेंह अपन मन मुताबिक तुमन ला चरवाहा दूहूं, जऊन मन गियान अऊ समझ के संग तुम्हर अगुवई करहीं। 16 ओ दिनमन म, जब तुम्हर गनती ह देस म बढ़ जाही," यहोवा ह ये घोसना करत हे, "मनखेमन फेर ये नइं कहिहीं, ‘यहोवा के करार के सन्दूक।’ ये बात ह ओमन के मन म कभू नइं आही या येला ओमन कभू सुरता नइं करहीं; ओकर कमी महसूस नइं होही, अऊ न ही दूसरा बनाय जाही।