1 फिरौन* दुवारा गाजा सहर ऊपर हमला करे के पहिली, यरमियाह अगमजानी करा पलिस्तीमन के बारे म यहोवा के ये बचन आईस:

2 यहोवा ह ये कहत हे:

"देख, उत्तर दिग म पानी ह कइसे बढ़त हे;

ओह उछरत बोहाय लगही।

ओह देस अऊ ओमा के जम्मो चीज ला डुबो दीही,

नगरमन ला अऊ ओमा रहइया जम्मो झन ला डुबो दीही।

मनखेमन चिचियाहीं;

देस म रहइया जम्मो झन बिलाप करहीं

3 सरपट भागत मजबूत घोड़ामन के खुर के अवाज सुनके,

बईरी के रथमन के अवाज सुनके

अऊ ओमन के चक्का के गड़गड़ाहट के अवाज सुनके।

दाई-ददामन अपन लइकामन के मदद करे बर नइं मुड़हीं;

ओमन के हांथमन अपंग हो जाहीं।

4 काबरकि जम्मो पलिस्तीमन ला नास करे के

अऊ ओ जम्मो बांचे मनखे

जऊन मन सूर अऊ सीदोन सहर के मदद कर सकत रिहिन,

ओमन ला हटाय के दिन आ गे हवय।

काबरकि यहोवा ह कपतोर* के समुंदर तीर के

बांचे पलिस्तीमन ला नास करनेचवाला हे।

5 गाजा सहर के मनखेमन सोक म अपन मुड़ मुड़ाहीं;

अस्कलोन के मनखेमन ला चुप करा दिये जाही।

हे समतल जगह म बांचे मनखेमन,

तुमन कब तक अपनआप ला चीरत रहिहू?

6 " ‘आह, हे यहोवा के तलवार,

तेंह कब सांत होबे?

अपन मियान म लहुंट जा;

सांत हो अऊ थम जा।’

7 पर येह कइसे सांत हो सकथे

जब यहोवा ह येला हुकूम दे हवय,

जब ओह अस्कलोन अऊ समुंदर तीर ऊपर

हमला करे के हुकूम दे हवय?"