अयूब 14

1 "मनखेमन माईलोगन ले जनमथें,

ओमन थोरकन दिन के अंय अऊ ओमन के जिनगी ह दुख ले भरे रहिथे।

2 ओमन फूल कस फूलथें, अऊ फेर मुरझा जाथें;

ओमन तेजी ले ढरत छइहां कस अंय, अऊ टिके नइं रहंय।

3 का तेंह ओमन ऊपर अपन नजर डारबे?

का तेंह ओमन ला नियाय बर अपन आघू म लानबे?

4 कोन ह असुध चीज म ले सुध चीज ला निकाल सकत हे?

कोनो नइं!

5 मनखे के उमर के दिनमन ला निस्चित करे गे हवय;

तेंह ओकर महिनामन के संखिया के फैसला कर डारे हस

अऊ ओकर सिवाना ठहिराय हस जेकर आगे ओह नइं जा सकय।

6 एकरसेति जब तक ओह बनिहार कस अपन समय ला पूरा नइं कर लेवय,

ओकर ऊपर ले अपन नजर ला हटा ले अऊ ओला अकेला रहन दे।

7 "एक रूख बर कम से कम ये आसा रहिथे:

यदि येह काटे जावय, त येह फेर उलहोही,

अऊ येकर नवां पीका निकलई बंद नइं होही।

8 चाहे येकर जरीमन भुइयां म जुन्ना हो जावंय

अऊ येकर ठुड़गा ह माटी म सूखा जावय,

9 तभो ले पानी के गंध पाके येह उलहोही

अऊ एक पऊधा कस पीका निकालही।

10 पर मनखे ह मर जाथे अऊ खाल्हे म परे रहिथे;

ओकर परान निकल जाय के बाद ओह इहां नइं रहय।

11 जइसने झील के पानी ह घट जाथे

या नदी ह गरमी म सूखा जाथे,

12 वइसने ही मनखे ह लेटथे अऊ फेर नइं उठय;

जब तक अकासमन खतम नइं हो जाहीं, मनखे ह नइं जागही

या ओला नींद ले जगाय नइं जाही।

13 "कास! तेंह मोला कबर म लुकाके रखते

अऊ तब तक लुकाय रखते, जब तक कि तोर गुस्सा ह सांत नइं हो जातिस!

कास! तेंह मोर बर एक समय ठहिरा देते

अऊ तब मोला सुरता करते!

14 कहूं कोनो मनखे ह मर जावय, त का ओह फेर जीही?

अपन कठिन सेवा के जम्मो दिन म

जब तक मोर छुटकारा नइं हो जावय, मेंह अगोरत रहिहूं।

15 तेंह मोला बलाबे अऊ मेंह तोला जबाब दूहूं;

तेंह अपन हांथ ले रचे परानीमन के लालसा करबे।

16 खचित तब तेंह मोर कदम ला गनबे

पर मोर पाप के हिसाब नइं रखबे।

17 मोर अपराधमन थैली म मुहरबंद करे जाहीं;

तेंह मोर पाप ला ढांप देबे।

18 "पर जइसे पहाड़ ह गिरथे अऊ चूर-चूर हो जाथे

अऊ जइसे चट्टान ह अपन जगह ले हट जाथे,

19 जइसे पानी ह पथरामन ला घीस डारथे

अऊ पानी के धारा ह माटी ला बोहाके ले जाथे,

वइसे तेंह मनखे के आसा ला नास कर देथस।

20 तेंह ओमन ला हमेसा बर हरा देथस, अऊ ओमन चल देथें;

तेंह ओमन के चेहरा ला बदल देथस अऊ ओमन ला निकाल देथस।

21 यदि ओमन के लइकामन के सम्मान करे जाथे, त ओमन येला नइं जानंय;

यदि ओमन के संतानमन के बेजत्ती होथे, त ओमन येला नइं देख पावंय।

22 ओमन पीरा के अनुभव तो करथें पर सिरिप अपन देहें के पीरा,

अऊ ओमन सिरिप अपन बर सोक मनाथें।"