अयूब 28

12 पर बुद्धि ह कहां मिल सकथे?

ओ जगह कहां हवय, जिहां समझ ह रहिथे।

13 कोनो मरनहार मनखे येकर कीमत नइं जान सकय;

येह जीयत परानीमन के लोक म नइं मिलय।

14 समुंदर के गहरई ह कहिथे, "बुद्धि ह मोर म नइं ए";

समुंदर ह कहिथे, "बुद्धि ह मोर करा नइं ए।"

15 चोखा सोन ले येला बिसाय नइं जा सकय,

अऊ न ही येकर कीमत बर चांदी ला तऊले जा सकथे।

16 येला ओपीर के सोन ले बिसाय नइं जा सकय,

येला कीमती गोमेदक या नीलमनि ले घलो बिसाय नइं जा सकय।

17 न सोन, न कांच के तुलना येकर संग करे जा सकथे,

न ही सोन के जेवर के बलदा म येह मिल सकथे।

18 मूंगा अऊ मनि के येकर आघू म चरचा करई ह बेकार अय;

बुद्धि के कीमत ह मानिक ले घलो बढ़के अय।

19 कूस*28:19 या इथोपिया देस के पुखराज के तुलना येकर संग करे नइं जा सकय;

येला चोखा सोन ले बिसाय नइं जा सकय।

20 त फेर बुद्धि ह कहां ले आथे?

समझ ह कहां रहिथे?

21 येह हर एक जीयत चीज के आंखी ले छुपे हवय,

अऊ त अऊ अकास के चिरईमन के आंखी घलो येला नइं देख सकंय।

22 बिनास अऊ मिरतू कहिथें,

"सिरिप येकर अफवाह ला हमन सुने हवन।"