नीतिबचन 25

1 येमन सुलेमान के अऊ नीतिबचन अंय, जऊन ला यहूदा के राजा हिजकियाह के मनखेमन संकेलके रखे हवंय:

2 परमेसर के महिमा कोनो बात ला छुपाके रखे म होथे;

राजामन के महिमा कोनो बात के पता लगाय म होथे।

3 जइसने अकासमन ऊंच अऊ धरती ह गहिरा हवय,

वइसने राजा के मन के थाह ला नइं पाय जा सकय।

4 चांदी ले मईल ला हटावव,

अऊ सुनार ह ओकर ले बने चीज बना सकथे;

5 राजा के आघू ले दुस्ट करमचारीमन ला निकाल दव,

अऊ ओकर सिंघासन ह धरमीपन के दुवारा बने रहिही।

6 राजा के आघू म अपन बड़ई झन करबे,

अऊ ओकर बड़े मनखेमन के बीच म अपन जगह के दावा झन करबे;

7 येह जादा बने बात होही कि ओह तोला कहय, "इहां ऊपर आ,"

येकर बदले कि ओह अपन बड़े मनखेमन के आघू म तोर अपमान करय।

जऊन कुछू तेंह अपन आंखी ले देखे हस

8 ओला जल्दबाजी म अदालत झन ले जाबे,

नइं तो आखिरी म, तेंह का करबे

जब तोर परोसी ह तोर बेजत्ती करही?

9 यदि तेंह अपन परोसी ला अदालत म ले जाथस,

त दूसर के भरोसा ला झन टोरबे,

10 नइं तो जऊन ह येला सुनही, ओह तोर निन्दा करही

अऊ तेंह दोसी गने जाबे।

11 सही बात ला कहई ह

चांदी के टुकनी म सोन के सेव फर सहीं अय।

12 जइसने कि सोन के कनफूली या सुध सोन के जेवर होथे

वइसने ही बुद्धिमान नियायधीस के डांट ह सुनइया ला बने लगथे।

13 जइसने फसल लुवई के बेरा बरफ के ठंडा पानी होथे

वइसने ही बिसवासयोग्य दूत ह अपन भेजइया बर होथे;

ओह अपन मालिक के आतमा ला ताजा करथे।

14 जइसने बिगर बारिस के बादर अऊ हवा होथे

वइसने ओह होथे, जऊन ह ओ ईनाम के बड़ई करथे, जेला ओह कभू नइं दीस।

15 धीरज के जरिये एक सासन करइया ला मनाय जा सकथे,

अऊ नरम बचन ह कठोर मनखे ला घलो नरम कर सकथे।

16 यदि तोला मंधरस मिलथे, त जतेक जरूरत हे, ओतेक खाबे—

जादा खाबे, त तोला उछरना पड़ही।

17 अपन परोसी के घर म कभू-कभू जाबे—

ओकर इहां बहुंत जादा जाबे, त ओमन तोर ले घिन करहीं।

18 जऊन ह अपन परोसी के बिरूध म लबरा गवाही देथे,

ओह गदा या तलवार या नुकीला तीर सहीं अय।

19 बिपत्ति के बेरा बिसवासघाती ऊपर भरोसा करई ह

टूटहा दांत या खोरवा गोड़ सहीं अय।

20 जइसने जाड़ा के दिन म काकरो कपड़ा ला ले लेवई,

या काकरो घाव म सिरका रितोई,

वइसने ही कोनो दुखी मनखे के आघू म गीत गवई होथे।

21 यदि तोर बईरी ह भूखा हवय, त ओला खाय बर जेवन दे;

यदि ओह पीयासन हवय, त ओला पीये बर पानी दे।

22 अइसने करे ले, ओह लज्जित होही*25:22 या अइसने करके तेंह ओकर मुड़ ऊपर लज्जा के बरत कोइला के ढेर लगाबे

अऊ यहोवा ह तोला ईनाम दीही।

23 जइसने कि उत्तरी हवा ह बिगर आसा के बारिस लानथे,

वइसने ही चुगली करई ह मनखे के गुस्सा ला बढ़ाथे।

24 झगरा करइया घरवाली के संग घर म रहई के बदले

छानी के कोनटा म रहई ह बने अय।

25 जइसने कि थके-हारे मनखे बर ठंडा पानी होथे,

वइसने ही दूरिहा देस ले आय सुघर संदेस होथे।

26 जइसने कि चीखलावाले झरना या गंदा कुआं होथे,

वइसने ही ओ धरमी होथे, जऊन ह दुस्ट मनखे के बात मानथे।

27 जादा मंधरस खवई ह बने नो हय,

जादा गहिरा बात के खोज करई घलो आदर के बात नो हय।

28 जऊन मनखे म संयम के कमी होथे,

ओह ओ सहर के सहीं होथे, जेकर सुरकछा के दीवारमन ला टोर दिये गे हवय।