नीतिबचन 4

कोनो भी कीमत म बुद्धि ला ले

1 हे मोर बेटामन, अपन ददा के सिकछा ला सुनव,

अऊ समझ के बात ला जाने बर मन लगावव।

2 मेंह तुमन ला उत्तम सिकछा देथंव,

एकरसेति मोर सिकछा ला झन छोंड़व।

3 जब मेंह घलो अपन ददा के बेटा रहेंव,

सुकुमार, अऊ अपन दाई के दुलारा रहेंव;

4 त मोर ददा ह ये कहिके मोला सिखावय,

"तोर पूरा मन मोर बचन म लगे रहय;

मोर हुकूममन ला मान अऊ जीयत रह।

5 तोला बुद्धि मिलय अऊ समझ घलो मिलय;

मोर बातमन ला झन भुलाबे या ओमन ला झन छोंड़बे।

6 बुद्धि ला झन छोंड़बे, अऊ ओह तोर रकछा करही;

ओकर ले मया कर, अऊ ओह तोर रखवारी करही।