जकरयाह 10

यहोवा ह यहूदा के देखरेख करही

1 यहोवा ले बिनती करव कि ओह बसन्त रितु म बारिस पठोवय;

येह यहोवा ही अय, जऊन ह बादर गरजाथे अऊ गरेर लाथे।

ओह जम्मो मनखे ला बारिस देथे,

अऊ हर एक झन बर खेत म पऊधा उपजाथे।

2 मूरतीमन धोखा देवइया बात कहिथें,

अऊ सकुन-बिचार करइयामन लबारी दरसन देखथें;

ओमन लबारी सपना के बारे म बताथें,

अऊ ओमन बेकार म सांतवना देथें।

एकरसेति चरवाहा के कमी के कारन दुखी होके

मनखेमन भेड़ सहीं भटकथें।

3 "मोर कोरोध ह चरवाहामन ऊपर भड़कथे,

अऊ मेंह अगुवामन ला दंड दूहूं;

काबरकि सर्वसक्तिमान यहोवा ह अपन झुंड

यहूदा के मनखेमन के देखरेख करही,

अऊ ओह ओमन ला लड़ई म घमंड करइया घोड़ा सहीं बनाही।

4 यहूदा ले कोना के पथरा आही,

ओकर ले तम्बू के खूंटी,

ओकर ले लड़ई के धनुस,

अऊ ओकर ले ही हर एक सासन करइया आहीं।

5 ओमन एक संग लड़ई म ओ योद्धामन सहीं होहीं,

जऊन मन गली के चीखला म अपन बईरीमन ला गोड़ ले कुचरथें।

ओमन लड़हीं काबरकि यहोवा ओमन के संग हवय,

अऊ ओमन बईरीमन के घुड़सवारमन ला सरमिंदा करहीं।

6 "मेंह यहूदा के मनखेमन ला मजबूत करहूं

अऊ यूसुफ के गोत्र ला बचाहूं।

ओमन बर अपन करूना के कारन

मेंह ओमन ला पहिले के सहीं बने स्थिति म ले आहूं।

ओमन अइसे हो जाहीं

मानो मेंह ओमन ला कभू तियागे ही नइं रहेंव,

काबरकि मेंह ओमन के परमेसर यहोवा अंव

अऊ मेंह ओमन ला जबाब दूहूं।

7 एपरैमीमन योद्धा सहीं हो जाहीं,

अऊ ओमन के मन ह अइसे खुस होही, जइसे मंद पीये ले होथे।

ओमन के लइकामन येला देखके आनंदित होहीं;

अऊ ओमन के मन ह यहोवा म आनंदित होही।

8 मेंह ओमन ला इसारा करहूं

अऊ भीतर इकट्ठा करहूं।

खचित मेंह ओमन ला छोंड़ाहूं;

ओमन पहिली सहीं अनगिनत हो जाहीं।

9 हालाकि मेंह ओमन ला मनखेमन के बीच म तितिर-बितिर कर दे हंव,

तभो ले ओ दूरिहा के देसमन म ओमन मोला सुरता करहीं।

उहां ओमन अऊ ओमन के संतान बांचे रहिहीं,

अऊ ओमन लहुंट आहीं।

10 मेंह ओमन ला मिसर देस ले वापिस लहुंटा लाहूं

अऊ ओमन ला अस्सूर देस ले इकट्ठा करहूं।

मेंह ओमन ला गिलाद अऊ लबानोन के इलाका म ले आहूं,

अऊ ओमन ला अतेक बढ़ाहूं कि उहां ओमन बर परयाप्त जगह नइं होही।

11 ओमन समस्या के समुंदर म ले होके जाहीं,

उमड़त समुंदर ला सांत कर दिये जाही

अऊ नील नदी के जम्मो गहिरा पानी ह सूखा जाही।

अस्सूर देस के मनखेमन के घमंड ला टोर दिये जाही

अऊ मिसर देस के राजदंड ह चले जाही।

12 मेंह ओमन के बिसवास ला यहोवा ऊपर मजबूत करहूं

अऊ ओकर नांव म ओमन सुरकछित रहिहीं,"

यहोवा ह घोसना करत हे।