7 परमेशरै आसा हाम्हां सोभी लै किज़ै नां किज़ै गूण सह रहैऊआ हाम्हां का कि पबित्र आत्मां आसा हाम्हां संघै ताकि हाम्हैं आपणैं साथी विश्वासी भाईए मज़त करी सके। 8 परमेशरे आत्मां एकी मणछा लै इहअ प्रच़ार करनैओ गूण ज़ेथ अक्लीए गल्‍ला आसा अर सह ई आत्मां दैआ दुजै मणछा लै इहअ प्रच़ार करनैओ गूण ज़ेथ खास्सअ ज्ञैन आसा।

9 कोई लै दैआ पबित्र आत्मां मसीहा दी पाक्‍कअ विश्वास डाहणेंओ गूण अर दुजै मणछा लै दैआ सह ई आत्मां बमार मणछा ठीक करनैओ बरदान। 10 पबित्र आत्मां दैआ एकी मणछा लै च़मत्कार करने शगती अर दुजै लै दैआ परमेशरो समाद खोज़णेंओ बरदान अर एकी होरी लै दैआ ऐहा गल्‍ला परखणैंओ बरदान कि ज़ुंण बरदान आसा, सह पबित्र आत्मां बाखा आसा कि कदुष्ट आत्मां बाखा आसा? कोई लै दैआ सह कई रंगे भाषा-बोली बोल़णैंओ बरदान ज़ुंण तेऊ कधि निं होए शिखल़ी दी, अर कोई लै दैआ सह तैहा भाषा-बोलीओ मतलब खोज़णेंओ बरदान ज़ुंण तेऊ कधि निं शिखल़ी।

11 ईंयां सोभै बरदान आसा एकी ई पबित्र आत्में काम। पबित्र आत्मां दैआ हर विश्वासी लै बरदान ज़िहअ पबित्र आत्मां दैणअ च़ाहा।