1 तेखअ बोलअ बिधाता मोसा लै कि इज़राईली मणछा लै बोल इहअ, 2 "आप्पू मांझ़ा का काढा तिन्‍नां छ़ोतलै मणछा पोर्ही ज़हा कोहल़ होए, ज़सरै गुप्त आंगा का शेतू रहा चुहंदअ लागी अर ज़ुंणी मुल्दअ होए छ़ुंअ द। 3 इहै छ़ोतलै च़ाऐ मर्ध होए या बेटल़ी तिन्‍नां निं आप्पू मांझ़ै डाही, हुंह रहा आप्पू तम्हां मांझ़ै तैही लोल़ी तम्हैं शुचै रहै।"

4 ज़िहअ बिधाता मोसा का बोलअ त, इज़राईली किअ तिहअ ई, तिन्‍नैं काढै तिंयां लोग आप्पू जैंदरा का दूर ज़ुंण तिहै छ़ोतलै थिऐ।

5 तेखअ बोलअ बिधाता मोसा लै, 6 "इज़राईली मणछा लै बोल इहअ ज़ै तम्हैं मणछ कहा होरी लै ज़ुल्म करे, सह हणअ तम्हैं मुंह बिधाता लै धोखअ दैई पाप किअ द। 7 सह मांगै तेऊ पाप करना लै माफी अर ज़ुंण बी नकसान होए तेऊ भरै पोर्ही अर तेता प्रैंदै दैऐ एकी च़ंदीए सिक्‍कै साबै च़ुआन्‍नी हुआह। 8 ज़हा लै सह हुआह भरनअ, ज़ै तेऊ मणछो कोहै टबर निं होए, तै दैऐ तेता मुंह बिधाते नाओंऐं प्रोहता लै, तेता का लाऊआ आणै एक प्राश्तो गाभू प्रोहता सेटा बल़ी करना लै, तेखअ हणअ तेऊओ पाप माफ।✝

9 "ज़ुंण बी भैंट तम्हैं इज़राईली पबित्र ज़ैगा च़ढाऊए तिंयां सोभै गल्‍ला हणीं प्रोहते। 10 हर प्रोहत डाहै तिन्‍नां ढब्बै-धेल्‍लै आप्पू लै ज़ुंण तिन्‍नां लै दैए।"

11 तेखअ बोलअ बिधाता मोसा लै, 12 "इज़राईली मणछा लै बोल, ज़ै कसरी बेटल़ी होरी संघै रही धोखअ दैए, 13 अर ज़ै कुंण मर्ध तैहा संघै कदुष्ट काम करी छ़ोतली करे पर ऐहा गल्‍लो निं तेसे मर्धा का थोघै ई आथी होए, नां तेसे बारै कुंणी खोज़अ अर नां सह कहा संघै सुत्ती दी ढाकी। 14 ज़ै तेसे लाल़ै तैहा प्रैंदे बैहम होए अर मन्‍नैं रिश लागे पर तेसे बारै सबूत निं तेऊ का आथी कि सह होरी संघै आसा कि नांईं! 15 तै निंयैं सह मर्ध आपणीं बेटल़ी प्रोहता सेटा, संघा निंयैं एक किलू ज़ौओ पिठअ कारी बाहणां लै, पर तेथ निं जैतूनो तेल पाई अर नां लोवान पाई।

16 "प्रोहत करै तेखअ तैहा बेटल़ी बेदी नेल़ खल़ै, 17 संघा भरै प्रोहत माट्टे भांडै दी सुहो पाणीं, मेल़-ज़ोल़े खिम्भे पबित्र ज़ैगो माट्टअ पाऐ धख ज़िहअ तेऊ पाणीं दी। 18 तेखअ खोल्है प्रोहत तैहा बेटल़ीए मुंडे सारै शराल़, अर कारीए नाज़ बल़ी दैऐ तेसे हाथै, आपणैं हाथै लऐ तेऊ कल़ुऐ पाणीं ज़ेता करै फिटक लागा। 19 संघा बोलै प्रोहत तैहा लै इहअ, ‘ज़ै तूह आपणैं मर्धा लै शुची आसा, तै निं ताह एऊ पाणीं करै किछ़ै हान्‍नी हणीं। 20 पर ज़ै तूह शुची नांईं आथी, अर आपणैं मर्धा छ़ाडी कहा होरी संघै रही बस्सी होए, तै लागणअ ताह बिधातो फिटक 21 अर तै निं आजू तेरी आद-लुआद हणीं* अर सोभी दैणअ तेखअ तेरै नाओंआं लै फिटक।’ 22 तेखअ बोलै सह बेटल़ी आपणीं खाखा का इहअ, ‘ज़ै हुंह दोशी होए, मुल्है लोल़ी इहअ ई हुअ ज़िहअ तम्हैं बोलअ।’ एवमस्तू

23 "तेखअ लिखै प्रोहत तिन्‍नां फिटके बोला खास कताबा दी संघा मटाऊऐ तेता तेऊ कल़ुऐ पाणीं करै। 24 तैहा बेटल़ी का बी पणैऊंऐं तेऊ कल़ुऐ पाणीं तेसे पेटै डेऊंदी लागणअ तैहा फिटक ज़ै सह दोशी होए। 25 तेखअ ढाकै प्रोहत तैहा बेटल़ीए हाथा का कारीए नाज़ बल़ी पोर्ही, संघा च़ढाऊऐ मुंह बिधाता सेटा संघा डाहै मेरी बेदी दी। 26 तेखअ करै प्रोहत तेता का एक मुठ नाज़ बेदी दी पाई हूम, तेता बाद झुटै सह बेटल़ी तेऊ पाणीं।

27 "ज़ै तैहा बेटल़ी होरी संघै रही बस्सी धोखअ किअ होए, तै हणीं सह बेटल़ी तेऊ पाणीं झुटी करै बांढी* अर तेसे आपणैं लोगा बी दैणअ तैहा लै फिटक। 28 ज़ै सह बेटल़ी शुची होए, तै निं तैहा लै किछ़ हान्‍नी हणीं अर तेसे रहणीं आद-लुआद हंदी लागी।

29 "बैहम हणैं पिछ़ू रिशे झ़गल़ैओ नबारण करनैओ बधान आसा अह ई, च़ाऐ कुंण बेटल़ी आपणैं मर्धा छ़ाडी होरी संघै छ़ोतली होए, 30 च़ाऐ कहा बेटल़ी आपणैं मर्धा लै बैहम होए अर तैहा खास्सी रिश लागा होए, तिन्‍नां करै मुंह बिधाता सम्हनै खल़ै, संघा करै प्रोहत एऊ बधाना पूरै। 31 इहअ करै ज़ै कहा मर्धा गलती दी बैहम होए, तेऊ लै बी निं सज़ा हणीं। ज़ै कुंण बेटल़ी सच्च़ी होए छ़ोतली हुई दी, तैहा भेटणीं तेते सज़ा।"