गणांई 4

कहाती टोलीए ज़िम्मैंबारी

1 तेखअ बोलअ बिधाता मोसा अर हारणा का, 2 "ऐबै करा तम्हैं इहअ कि लेबी मांझ़ै कहातीए च़ऊ टोली दी गणा तिहा का पज़ाह साला तैणीं अमरे सिधै तिन्‍नां मणछा 3 ज़ुंण मेल़-ज़ोल़े खिम्भा दी काम-काज़ करी सके।

4 "कहातीए हणीं मेल़-ज़ोल़े खिम्भा दी पूज़ा करने पबित्र समाने ज़िम्मैंबारी। 5 ज़ेभै-ज़ेभै इज़राईलीए सोभी टोलीओ दल आजू हांढणा लै तैर्हिए, तेभै-तेभै डेओऐ हारण मेल़-ज़ोल़े खिम्भा भितरी काढै मांझ़लै बुदरने पल्दै उंधै अर तेखअ ढोपै तेता करै शाजतीओ मणशू। 6 संघा पाऐ तेथ बाकरे खाल संघा ढोपै तेता पटाघै निलै झिकल़ै करै संघा लाऐ तेथ च़कणा लै लोहल़ी।✝4:6 लुआ. 25:5

7 "तेखअ छ़ैऐ भोज़ने पलगा दी पटाघै निलै रंगो झिकल़अ, तेता प्रैंदै डाहै डबरी, सोभी धनैरै अर तरैल़णें कऊली अर हर धैल़ै रोटी बी डाहै तेथ प्रैंदै। 8 तेखअ ढोपै तिंयां तेथ प्रैंदै पटाघै लाला रंगो झिकल़अ पाई संघा पाऐ बाकरे खाल तेखअ लाऐ तेथ च़कणा लै लोहल़ी।

9 "तेखअ लऐ एक होर निलै रंगो झिकल़अ संघा ढोपै तेता करै दीअदानी, सदीऐ, धनैरै, दीऐ ज़ाल़णा लै अर तेले शिंगी। 10 इना सोभी ढोपै बाकरे खाला करै संघा बान्हैं इना च़कणें चकठा दी।

11 "तेखअ छ़ैऐ सुन्‍नें बेदी दी एक निलै रंगो झिकल़अ संघा ढोपै तेता बाकरे खाला करै तेखअ बान्हैं तेता लोहल़ी दी।

12 "एता बाद पल़ेटै हारण अर तेऊए शोहरू पबित्र ज़ैगा पूज़ा करने सारै समाना एकी निलै झिकल़ै दी। इना बी ढोपै बाकरे खाला दी संघा बान्हैं तिन्‍नां च़कणें लोहल़ी दी।

13 "तेखअ काढै बेदी का सारअ छ़ार पोर्ही संघा छ़ैऐ तेथ बैंज़णीं रंगो झिकल़अ, 14 तेखअ बेदी दी च़ाकरी करनैओ सारअ समान ज़िहअ कि धनैरै, च़िमटै, पल़ैंज़ै, लोहदी प्रैंदै ढोपै बाकरे खाला करै संघा बान्हैं तिन्‍नां लोहल़ी दी।

15 "ज़ांऊं हारण अर तेऊए शोहरू सोभी लोगा आजू हांढणे बगती मेल़-ज़ोल़े खिम्भे सारै समाना ढोपी मुक्‍के, तेखअ आसा कहाती मणछे ज़िम्मैंबारी तेता च़कणें, पर इना च़िज़ा छ़ाडी होरी पबित्र च़िज़ा निं तिंयां छ़ुंहीं, इहअ निं हआ कि तिंयां मरे।

16 "ज़ुंण च़िज़ा हारण प्रोहते शोहरू एलीआजरे ज़िम्मैंबारी दी सभाल़णीं, तिंयां आसा दीऐ लै तेल, शोभली बास्सो धूप, बल़ीदाना लै नाज़, अभिषेक करना लै जैतूनो तेल, पबित्र खिम्भ, तेते सोभ च़िज़ा अर सारै समाने हेर-सभाल़ करने ज़िम्मैंबारी बी आसा तेऊए।"

17 तेखअ बोलअ बिधाता मोसा अर हारणा लै, 18 "ज़ेभै तैणीं हारण अर तेऊए शोहरू पबित्र ज़ैगे च़िज़ा ढोपी निं लए तेभै तैणीं निं लेबी मांझ़ै कहाती टोलीए मणछा एकी घल़ी लै बी तिन्‍नां च़िज़ा नेल़ डेऊई अर नां तिन्‍नां भाल़ी, 19 किधी इहअ निं हआ कि तिंयां मरे, 20 एता लै खोज़ै पबित्र ज़ैगा हारण अर तेऊए शोहरू पबित्र ज़ैगा तिन्‍नां संघै भितरी डेऊई तिन्‍नां का कि तिन्‍नां किज़ै च़कणअ।"

गर्शोनी टोलीए ज़िम्मैंबारी

21 तेखअ बोलअ बिधाता मोसा लै, 22 "लेबी गोत्रे गर्शोनी दूई टोलीए बी गण तिहा साला उझै पज़ाह साला तैणीं मर्धा 23 ज़ुंण मेल़-ज़ोल़े खिम्भा दी काम करी सके।

24 "गर्शोनी टोलीए ज़िम्मैंबारी हणीं 25 पबित्र खिम्भे च़ादरा, अर तेते बाघली च़ादरा अर तेता प्रैंदे बाकरे खाला ढोपणें च़ादरा अर मेल़-ज़ोल़े खिम्भे दुआरे पल्दै, 26 ताटीए तिंयां पल्दै ज़ुंण पबित्र खिम्भ अर बेदी फेर आसा लागै दै, ताटीए प्रऊल़ीए पल्दै अर तिन्‍नें ज़ेऊल़ै संघा तेते कामैं एछणैं आल़ै सारै समाना च़कै तिंयां अर इना सोभी दी ज़ुंण काम लागा करनअ तेता बी करै तिंयां ई। 27 हारण अर तेऊए शोहरू तिन्‍नां लै इना च़िज़ा ज़िधा लै बी निंणां लै बोले तेता निंयैं तिंयां तिधा लै। 28 मेल़-ज़ोल़े खिम्भा दी आसा गर्शोनी खिंबे अह ई ज़िम्मैंबारी। हारण प्रोहतो शोहरू ईतामार करै तिन्‍नें कामें हेर-भाल़।"

मरारीए टोलीए ज़िम्मैंबारी

29 बिधाता बोलअ, "मोसा, लेबी खिंबा दी मरारीए दूई टोली दी भाल़ तिहा साला का पज़ाह साला तैणीं केतरै मणछ आसा। 30 पर गणै सिधै तिन्‍नां ई ज़ुंण मेल़-ज़ोल़े खिम्भा दी काम सका करी।

31 "मरारी खिंबे ज़िम्मैंबारी हणीं, मेरै मेल़-ज़ोल़े खिम्भे फल़्है, भ्रैहणू, थाम्ह, खुर्शी, 32 ताटी फेर फिरदै थाम्ह अर तेते खुर्शी, खुंढै, राश्शी अर भांती-भांतीओ समान बुल़्हणअ। इना च़िज़ा गण हरेकी च़िज़ो नाअं लई करै। 33 मेल़-ज़ोल़े खिम्भा दी मरारी टोली आल़ै ज़ुंण काम करनअ सह आसा अह ई अर हारण प्रोहतो शोहरू ईतामार करै तिन्‍नें कामें हेर-भाल़।"

लेबी गोत्रे मणछ गणै दुजी बारी भिई

34-49 मोसा हारण अर होरी सोभी इज़राईली सैणैं किअ तिहअ, ज़िहअ बिधाता तिन्‍नां लै बोलअ त। तिन्‍नैं गणै लेबी गोत्रे मणछ तिन्‍नें खिंब अर टोलीए साबै ऐहा गल्‍लो थोघ लाणा लै कि तिंयां तिहा का पज़ाह साला तैणीं केतरै मर्ध आसा ज़ुंण पबित्र खिम्भा दी काम सका करी तिंयां थिऐ 2,750 कहाती, गर्शोनी थिऐ 2,630, मरारी थिऐ 3,200, इना सोभिओ ज़ोल़ करी थिऐ सोभै 8,580, संघा सभाल़ी तिन्‍नां सोभी लै मेल़-ज़ोल़े खिम्भा दी कामां करने ज़िम्मैंबारी।