गणांई 29

नर्शिंगै बाज़णैंओ थैर

1 बिधाता बोलअ इहअ, "साज़ै शऊजे धैल़ी लोल़ी तम्हां लै खास बशैघे धैल़ी हुई अर तैहा धैल़ी निं तम्हैं किछ़ै काम-काज़ करी, तैहा धैल़ी करै तम्हैं सोभै मुल्है पबित्र झाल़अ संघा बाज़ै तम्हैं मुल्है ज़ैकार करने नर्शिंगै।

2 "तेभै बी करै तम्हैं मुंह बिधाता खुश करना लै हूम बल़ी। तेता लै आणै एक बाछ़ू, एक गाभू अर एकी-एकी साले सात मिम्मूं ज़ेथ किछ़ै खोट निं होए। 3 बाछ़ू संघै करै ढाई पाथै जैतूनो तेल राल़अ द कणको पिठअ नाज़ बल़ी। जैतूनो तेल राल़अ द एक पाथअ पिठअ करै गाभू संघै नाज़ बल़ी भैंट। 4 तिन्‍नां सोभी साता मिम्मूं संघै करै जैतूनो तेल राल़ी करै ढाई-ढाई सेर कणको पिठअ नाज़ बल़ी।

5 "तेखअ करै सोभी लोगे पापो प्राश्त करना लै एक छ़ेल्हू पाप बल़ी।

6 "मुंह बिधाता खुश करना लै ईंयां हूम बल़ी लोल़ी हर धैल़ै दोत्ती-उडै हणैं आल़ै बल़ीदान, नाज़ बल़ी अर अर्घै का लाऊआ किऐ अर एता करै शऊजै साज़ै धैल़ै।

पापो प्राश्त करने महान धैल़ी

7 "दसा शऊजे धैल़ी आसा पापो प्राश्त करने महान धैल़ी, तैहा धैल़ी करै तम्हैं भुखै पेटै रही मुल्है पबित्र झाल़अ, तेभै करै तम्हैं आपणैं पापा लै शोग अर तैहा धैल़ी करै सोभी कामां का बशैघ।✝29:7 लेब. 16:29-34

8 "तेभै बी करै तम्हैं मुंह बिधाता खुश करना लै हूम बल़ी। तेता लै आणै एक बाछ़ू, एक गाभू अर एकी-एकी साले सात मिम्मूं ज़ेथ किछ़ै खोट निं होए।

9 "बाछ़ू संघै करै ढाई पाथै जैतूनो तेल राल़अ द कणको पिठअ नाज़ बल़ी। जैतूनो तेल राल़अ द एक पाथअ पिठअ करै गाभू संघै नाज़ बल़ी भैंट, 10 तिन्‍नां सोभी साता मिम्मूं संघै करै जैतूनो तेल राल़ी करै ढाई-ढाई सेर कणको पिठअ नाज़ बल़ी।

11 "सोभी लोगे पापो प्राश्त करना लै करै एक छ़ेल्हू पाप बल़ी। इना बल़ीदाना करै हर धैल़ै दोत्ती-उडै हणैं आल़ै हूम बल़ी, पाप बल़ी, नाज़ बल़ी अर अर्घै का लाऊआ।

छ़ानींओ थैर

12 "पंद्रा शऊजा पोर्ही मनाऊंऐं तम्हैं साता धैल़ी तैणीं मुंह बिधातो अदर करना लै छ़ानींओ थैर।✝29:12 लेब. 23:34; बधा. 16:13-15 13 एऊ थैरे पैहली धैल़ी बी निं तम्हैं किछ़ै काम-काज़ करी, ऐहा धैल़ी करै तम्हैं सोभै मुल्है पबित्र झाल़अ। तेखअ करै तम्हैं मुंह बिधाता खुश करना लै हूम बल़ी, तेता लै आणै तम्हैं तेर्हा बाछ़ू, दूई गाभू अर च़ौदा एकी-एकी साले मिम्मूं ज़ेथ किछ़ै खोट निं होए।

14 "तिन्‍नां सोभी बाछ़ू संघै करै ढाई-ढाई पाथै जैतूनो तेल राल़अ द कणको पिठअ नाज़ बल़ी। जैतूनो तेल राल़अ द एक-एक पाथअ पिठअ करै गाभू संघै नाज़ बल़ी भैंट, 15 तिन्‍नां सोभी एकी-एकी साले च़ौदा मिम्मूं संघै करै जैतूनो तेल राल़ी करै ढाई-ढाई सेर कणको पिठअ नाज़ बल़ी। 16 तेखअ लऐ लोगे पापो प्राश्त करना लै एक छ़ेल्हू पाप बल़ी करी। एता करै हर धैल़ै दोत्ती-उडै हणैं आल़ै हूम बल़ी अर अर्घै का लाऊआ।

17-34 "दुजी धैल़ी करै बारा बाछ़ू बल़ीदान, चिऊथी धैल़ी करै गैरा, च़ौथी दस, पांज़ूई नौ, छ़हुई आठ बाछ़ू बल़ीदान अर सातुई धैल़ी हणैं सात बाछ़ू बल़ीदान। बाकी बल़ीदान अर भैंट छ़ाडै तिन्‍नां बाछ़ू संघै हर धैल़ै तेचल़ी, मतलब दूई गाभू अर एकी-एकी साले च़ौदा मिम्मूं करै तेता संघै बल़ीदान ज़ेथ किछ़ै खोट निं होए।

"नाज़ बल़ी बी करै धैल़ तेचल़ी, मतलब तिन्‍नां सोभी बाछ़ू संघै करै ढाई-ढाई पाथै जैतूनो तेल राल़अ द कणको पिठअ नाज़ बल़ी। जैतूनो तेल राल़अ द एक-एक पाथअ पिठअ करै गाभू संघै नाज़ बल़ी, एकी-एकी साले तिन्‍नां च़ौदा मिम्मूं संघै करै हर धैल़ै जैतूनो तेल राल़ी करै ढाई-ढाई सेर कणको पिठअ नाज़ बल़ी। संघा लऐ लोगे पापो प्राश्त करना लै धैल़ एक छ़ेल्हू पाप बल़ी करी।

"एता करै हर धैल़ै दोत्ती-उडै हणैं आल़ै हूम बल़ी अर अर्घै का लाऊआ।

35 "साता धैल़ी तैणीं रहै तम्हैं मुंह बिधाता खुश करना लै हूम बल़ी करदै लागी, अर आठुई करै तम्हैं भिई सोभै पबित्र झाल़अ, सह हणअ बडअ झाल़अ अर तैहा धैल़ी करै हूम अर होर काम काज़ निं तैहा धैल़ी बी किछ़ै करी।

36 "तेता लै आणै तम्हैं एक बाछ़ू, एक गाभू अर एकी-एकी साले सात मिम्मूं ज़ेथ किछ़ै खोट निं होए संघा करै तिन्‍नां मुंह बिधाता खुश करना लै हूम बल़ी। 37 बाछ़ू संघै करै ढाई पाथै, गाभू संघै एक पाथअ, मिम्मूं संघै करै ढाई-ढाई सेर जैतूनो तेल राल़अ द कणको पिठअ नाज़ बल़ी। हरेकी बाछ़ू संघै आठ-आठ सेर, गाभू संघै छ़ह सेर अर हरेकी मिम्मूं संघै दैऐ च़ार-च़ार सेर दाखे रसो अर्घअ ज़रूर।

38 "संघा लऐ लोगे पापो प्राश्त करना लै धैल़ एक छ़ेल्हू पाप बल़ी करी। इना बल़ीदाना करै हर धैल़ै दोत्ती-उडै हणैं आल़ै हूम बल़ी अर अर्घै का लाऊआ।

39 "इना हूम बल़ी, मेल़-ज़ोल़े बल़ी, नाज़ बल़ी अर अर्घै दैऐ तिन्‍नां खास थैरे धैल़ै बिधी-बधाने साबै मुंह बिधाता लै ज़रूर। ईंयां आसा थारै मुल्है मानत या मुल्है डाहै दै बांधै का लाऊआ।"

40 बिधाता बल़ीदान करने ज़िहै-ज़िहै हुकम मोसा लै किऐ, तेऊ खोज़ी तिंयां सोभै गल्‍ला इज़राईली का बाढै।