1 युसुफे खिंबा दी थिअ आजू मनिश्शेओ पोचअ अर माकीरो शोहरू गलाद। एकी धैल़ै डेऊऐ तैहा टोलीए सैणैं मणछ मोसा अर होरी इज़राईली टोलीए सैणैं सेटा लै, 2 संघा लागै तिन्‍नां सोभी नदरी मोसा लै इहअ बोल्दै, "हे म्हारै मालक, बिधाता बोलअ त ताल्है इहअ कि परच़ी पाई दैऐ सोभी इज़राईली लै बांड। बिधाता किअ त तधू भाल़ इहअ हुकम बी, कि म्हारै ई गोत्रे सलफोदे सोभी शोहरी लै बी दैऐ तेतरअ हेस्सअ, ज़ेतरअ तिन्‍नें बाबा भेटणअ त।✝

3 "पर एथ पल़अ धख क्साब इहअ कि, ज़ै ईंयां शोहरी इज़राईले होरी गोत्रा संघै बैह करे, तेखअ च़ाल्‍ली सह ज़ैगा बी तिन्‍नें गोत्रे हेस्सै दी डेऊई अर तेथ निं तेखअ म्हारअ हक हणअ! 4 होर ता होर, ज़ेभै इज़राईलीए पज़ाहुई साले बर्शगांठै लै ज़िम्मीं तेते असली मालका बापस भेटा, तेभै बी निं सलफोदे ज़िम्मीं हाम्हां च़ाल्‍ली भेटी! सह हणीं सदा लै तेऊ गोत्रे मणछे ज़हा-ज़हा संघै तिन्‍नैं शोहरी बैह किअ!"

5 मोसा पुछ़अ ऐहा गल्‍ला लै बिधाता, संघा बोलअ इज़राईली लै, "युसुफे शोहरू मनिश्शे गोत्रा का आऐ दै ईंयां सैणैं आसा ठीक लागै दै बोल्दै।

6 "सलफोदे शोहरीए बारै खोज़अ बिधाता मुखा इहअ कि सलफोदे शोहरी ज़ुंण गम्मे तिंयां सका तेऊ संघै बैह करी। पर सह मणछ लोल़ी इने आपणैं ई मूल़ गोत्रे कहा टोली मांझ़ै हुअ। 7 इज़राईलीए एकी गोत्रे ज़ैगा निं दुजै गोत्रा लै लोल़ी डेऊई, ज़हा गोत्रा ज़ुंण ज़ैगा आसा भेटी दी, सह लोल़ी सदा तेऊ ई गोत्रे रही।

8,9 "आजू बी ज़ै कहा शोहरी आपणैं बाबे बरासत भेटे, सह करै आपणैं ई गोत्रे कहा टोली दी बैह। ताकि इज़राईलीए ज़िम्मीं एकी गोत्रे हेस्सै मांझ़ै दुजै गोत्रा लै कधि नां डेओए।"

10,11 सलफोदे शोहरी मेहला, तिर्सा, होग्ला, मिल्का अर नोहा किअ तिहअ ई ज़िहअ बिधाता मोसा का हुकम किअ त। तिन्‍नैं किअ तेखअ आपणैं च़ाच़ूए शोहरू संघै बैह। 12 इहअ करै रही तिंयां आपणैं मूल़ मणछ युसुफे शोहरू मनिश्शे गोत्रा दी अर तिन्‍नें हेस्से आई दी ज़ैगा बी रही तिन्‍नें आपणीं टोली दी।

13 ईंयां बधान आसा बिधाता मोसा का तधू खोज़ै दै ज़धू इज़राईली जरदण नदीए बाढै आर बाखा मोआब जेरिहो नगरी नेल़ रेगीस्तानै थिऐ आपणैं डेरै पाऐ दै।