1 बिधाता बोलअ हारणा लै इहअ, "ज़ै पबित्र ज़ैगा किज़ै पाप-दोश होए सह पल़णअ ताह, तेरै शोहरू अर कहाती टोलीए सोभी लेबीए ज़िम्मैं, पर ज़ै प्रोहते काम-काज़ा दी किज़ै भूल-च़ूक होए सह पल़णअ ताह अर तेरै शोहरूए ज़िम्मैं।

2 "तेरै मूल़ मणछ लेबी गोत्रे ज़ेतरै बी आसा तिन्‍नां बी आणै आप्पू संघै पबित्र ज़ैगा च़ाकरी करदै, पर शाजतीए खिम्भा आजू एछै सिधै तूह अर तेरै शोहरू ई। 3 ज़िहअ तूह तिन्‍नां होरी लै ढेअ करे, मेल़-ज़ोल़े खिम्भा दी हणीं तिन्‍नें ज़िम्मैंबारी कि तिंयां तेऊ कामां करे, पर पबित्र ज़ैगा नां तिन्‍नां कहा पबित्र च़िज़ा छ़ुंहंणै दैई अर नां बेदी नेल़ दैई डेऊणैं, इहअ निं हआ कि तम्हैं सोभै मरे। 4 लेबीए ज़िम्मैंबारी आसा ताह संघै मेल़-ज़ोल़े खिम्भे सोभी च़िज़े फाज़त करनी, पर होरी गोत्रो मणछ निं तम्हां संघै एऊ कामां लै साझ़ू हई सकदअ।

5 "पबित्र ज़ैगा अर बेदीए च़ाकरी करै सिधअ तूह अर तेरै शोहरू ई, इहअ निं हआ कि एता पिछ़ू मेरअ कोप सोभी इज़राईली लै एछे।

6 "सोभै इज़राईली आसा मुंह बिधाता लै, पर मंऐं आसा आप्पै तिन्‍नां मांझ़ा का लेबी गोत्रे लोग आप्पू लै ज़ुदै किऐ दै ताकि तिंयां मेल़-ज़ोल़े खिम्भा दी ताह संघै मज़त करी मेरी च़ाकरी करे।✝ 7 पर बेदी दी अर मांझ़लै पल्दै पिछ़ू खास पबित्र ज़ैगा करै प्रोहतो काम-काज़ तूह अर तेरै शोहरू। अह प्रोहते पदबी आसा मुंह बाखा तम्हां लै दान अर तेरै खिंबा छ़ाडी ज़ै कुंण होर एऊ प्रोहते कामां करदअ फिरे, सह पाणअ मारी।"

8,9 तेखअ बोलअ बिधाता हारणा लै इहअ, "इज़राईली ज़ुंण बल़ीदान मुल्है करे अर ज़ुंण पबित्र च़िज़ा मुल्है भैंट करा, तेते ज़िम्मैंबारी सभाल़ी मंऐं ताखा। पाप बल़ी, नाज़ बल़ी अर दोश बल़ी* मांझ़ै ज़ुंण बेदी दी हूम नांईं किअ, आझ़ा पोर्ही हणअ सह भाग सदा तेरअ, तेरै शोहरूओ अर पोस्ती दर पोस्ती आजू तेरी आद-लुआदो भाग।✝ 10 इना च़िज़ा मनै पबित्र अर ईंयां लोल़ी तम्हैं पबित्र ज़ैगा तिधी खाई, पर एता खाऐ सिधै मर्ध ई मर्ध।

11 "एता का लाऊआ इज़राईली ज़ुंण खास भैंटा मुंह सेटा रगाओए सह भाग बी आसा तेरअ। सह भाग बी दैनअ मंऐं सदा ताल्है अर तेरै शोहरू-शोहरी लै। तेरै टबरा जैंदरी ज़ुंण बी शुचअ होए, सह सका तेता खाई।

12,13 "नऊंईं साला काढअ द, जैतूनो तेल, दाखो रस अर नाज़, ज़ेता इज़राईली आपणीं पज़ैआ मांझ़ै पैहलअ भाग मुंह बिधाता लै आणा, सह हणअ पठी तेरअ। तेरै टबरा जैंदरी ज़ुंण बी शुचअ होए, सह सका तेता खाई।

14 "इज़राईली ज़ुंण च़ीज़ बी आपणीं खुशी दी मुंह बिधाता लै दैए, सह बी हणीं तेरी।✝

15 "इज़राईली मणछा मांझ़ै ज़ेठै मर्ध अर डागै-चैणैं मांझ़ै ज़ेतरै बी पैहलै सोए नर पशू ज़ुंण मुंह बिधाता लै आसा, तिंयां बी आसा तेरै। पर ज़ेतरै बी ज़ेठै मणछ होए, तिन्‍नें बदल़ै ढाकै किम्मत अर ज़ुंण पशू छ़ोतलै आसा तिन्‍नें बदल़ै बी लऐ किज़ै होर ढाकी बापस फरेऊई। 16 ज़ेभै शोहरू एकी भिन्‍नैंओ होए, सह लोल़ी तेभै बदल़अ दैई बापस हेरअ फरेऊई। तेतो मोल आसा पबित्र ज़ैगे च़लणें साबै पांज़ च़ंदीए सिक्‍कै*।✝

17 "पर गाऊई, भेडा अर बाकरीए पैहलै सोए नर पशू, ज़ेता मुंह सेटा रगाओए, तिंयां आसा मेरै, तिन्‍नां निं बापस फरेऊई सकदै। तिन्‍नें लोहू छ़ल़िकै बेदी दी अर तेते च़र्बी करै मुंह बिधाता खुश करना लै बेदी दी हूम। 18 तेऊ बल़ीदाने शिखा आसा तेरी, ज़िहअ मुंह सेटा रगाऊअ द छ़ल़्हअ अर खास भैंटा का दैहणीं बाखो गुल़छ़ू बी आसा तेरअ भाग।

19 "इज़राईली ज़ुंण पबित्र च़िज़ा मुंह बिधाता लै भैंट करा, तेथ आसा आझ़ा पोर्ही ताह अर तेरै शोहरू-शोहरीओ हक। अह आसा ताह अर तेरी आद-लुआदा संघै अटल़ करार अर अह लूंणो बधान रहणअ पोस्ती दर पोस्ती इहअ ई अटल़। 20 पर इज़राईली मांझ़ै निं ज़िम्मीं-ज़ैगा तेरअ किछ़ै हक हणअ अर नां तूह किज़ू ज़ैदातो मालक हणअ। तेरी ज़ैदात आसा हुंह बिधाता ज़ुंण सोभै गल्‍ला दैआ।"

21 बिधाता बोलअ इहअ, "इज़राईली ज़ुंण आपणीं पज़ैआ मांझ़ै दसुअ निसब अर डागै-चैणैं मांझ़ै पैहलै सोए नर पशू आणा, तिंयां आसा मेरै। पर तिंयां सोभै दैनै मंऐं मेल़-ज़ोल़े खिम्भा दी च़ाकरी करने बदल़ै लेबी लै मज़दूरी।✝

22,23 "मेल़-ज़ोल़े खिम्भा दी सका सिधै तिंयां ई च़ाकरी करी, होरी इज़राईली निं तेता नेल़ एछणैं दैई, इहअ निं हआ कि तिन्‍नां दोश लागे अर तिंयां मरे अर एते सज़ा लेबी बी पल़े भुगतणी। अह काईदअ रहणअ सदा लै इहअ ई।

"इज़राईली मांझ़ै निं लेबी ज़िम्मीं ज़ैगे मालक हणैं, 24 किल्हैकि इज़राईली ज़ुंण आपणीं पज़ैआ मांझ़ै दसुअ निसब अर डागै-चैणैं मांझ़ै पैहलै सोए नर पशू मुंह बिधाता लै भैंट करा, सह भाग आसा पठी लेबी लै।"

25 तेखअ बोलअ बिधाता मोसा का इहअ, 26 तूह खोज़ लेबी गोत्रे सोभी मणछा का इहअ कि ज़ेभै तम्हैं इज़राईली का तिन्‍नें पज़ैआ मांझ़ै दसुअ निसब अर डागै-चैणैं मांझ़ै पैहलै सोए नर पशू ढाके, तेता मांझ़ै दैऐ तम्हैं बी मुंह बिधाता लै दसुअ निसब। 27 ज़िहअ इज़राईली मुल्है खहल़ा का नाज़, दाखो रस ज़ुदै डाही भैंट करा, तम्हैं बी डाहै तेता का इहअ ई मुल्है ज़ुदअ ज़ुंण इज़राईली 28 तम्हां सेटा मुंह बिधाता लै भैंट आणे। सह ज़ुदअ डाहअ द भाग ज़ुंण तम्हैं मुल्है रगाऊअ, तेता डाहै हारण प्रोहता सेटा सभाल़ी। 29 ज़ेतरी बी च़िज़ा तम्हां दान भेटे, तेता मांझ़ै डाहै सोभी का बधिया भाग मुंह बिधाता लै।

30 "खहल़ा का मुल्है पैहलअ अर बधिया भाग ज़ुदअ डाही करै सका तम्हैं बाकी तिहअ ई खाई, ज़िहै इज़राईली नाज़ा अर दाखे रसा मांझ़ै मुंह बिधाता लै दैई लणैं बाद खाआ। 31 ज़ुंण सह थारअ भाग रहअ, तेता सका तम्हैं अर थारै टबर कज़िधल़ी खाई, किल्हैकि अह हणीं थारी मेल़-ज़ोल़े खिम्भा दी च़ाकरी करने मज़दूरी।✝ 32 ज़ै तम्हैं तेता खाणैं का आजी मुंह बिधाता लै प्रोहते हाथै दैई हेरे, तेखअ निं तम्हां तेता कज़िधल़ी खाई करै किछ़ै दोश लागदअ। पर इज़राईली ज़ुंण भैंट अर बल़ीदान होए आणै दै, तिन्‍नां पबित्र च़िज़ा निं एऊ साबै खाई छ़ोत लाई इहअ निं हआ कि तम्हैं मरे।"