गणांई 12

हारण अर मिर्यामे मोसा लै ज़ल़ण

1 ज़धू तिंयां हसेरोत नगरी थिऐ, मोसा थिई कूश देशे एक होर शोहरी बी बैही दी। ऐहा गल्‍ला लै लागै हारण अर तेऊए बैहण मिर्याम मोसे लाल़ी लै तान्हैं दैंदै। 2 तिन्‍नैं बोलअ इहअ, "बिधाता कै सिधअ मोसा संघै करा गल्‍ला? तेऊ किई हाम्हां संघै बी गल्‍ला।" तिन्‍नें ईंयां गल्‍ला शूणीं बिधाता। 3 मोसा थिअ सारी धरती रहणैं आल़ै सोभी मणछा का मानदार अर भोल़ै सभाबो।

4 बिधाता बोलअ तेभी मोसा, हारण अर मिर्यामा लै, "तम्हैं चिहै एछा मेल़-ज़ोल़े खिम्भा सेटा।" तेखअ डेऊऐ तिंयां चिहै तिधा लै। 5 बिधाता हुअ बादल़ा दी प्रगट, संघा बोलअ हारण अर मिर्यामा लै नेल़ ज़िहै एछणा लै। तिंयां दुहै डेऊऐ नेल़ ज़िहै।

6 बिधाता बोलअ,

"मेरी गल्‍ला शूणां, ज़ै तम्हां मांझ़ै कुंण गूर आसा,

तेऊ लै हणअ हुंह धैना दी प्रगट,

संघा करनी मुंह तेऊ संघै धैनै-सुपनै गल्‍ला।

7 पर मेरअ दास मोसा आसा मानदार,

तेऊ दी आसा मुंह इना सोभी का खास्सअ भरोस्सअ।✝12:7 इब्रा. 3:2

8 मोसा सम्हनै निं मुंह धैनै-सुपनै गल्‍ला करनी,

पर तेऊ संघै करा स्मुखी मुंहां सम्हनै गल्‍ला

तेऊ संघै करा हुंह स्मुखअ शुझुई गल्‍ला।

सह हेरा मुंह बिधाता भाल़ी कि हुंह किहअ आसा।"

9 बिधाता आई तिन्‍नां लै रोश्शै संघा डेऊअ तिधा का। 10 तेखअ उझ़ुअ सह बादल़ खिम्भा का उझै, अर मिर्यामा निखल़ी कोहल़ अर सह हुई हिंऊंआं ज़ेही शेती, अर हारणै भाल़ी मिर्याम कि तैहा निखल़ी कोहल़।

11 तेखअ बोलअ हारणै मोसा लै, "हे मेरै मालक, हाम्हैं दुही ज़ुंण ऐडी गल्‍ला अर पाप किअ, एऊ पापा निं हाम्हां लै लागणै दैई। 12 मिर्यामा निं तेऊ मूंऐं दै शोहरू ज़िहअ रहणैं दैई ज़ुंण पेटा हंदी आधअ चिजअ द हआ निखल़अ द।"

13 मोसा पाई इहअ बोली बिधाता सेटा लेरा, "हे परमेशर, ऐहा कर कोहल़ा का नरोगी।" 14 बिधाता बोलअ मोसा लै इहअ, "ज़ै एसे बाबै एसे मुंहैं थुक्‍की सज़ा दैनी हंदी, तैबी रहणीं ती अह साता धैल़ी तैणीं छ़ोतली, ऐहा डाहै साता धैल़ी तैणीं डेरै का बागै किधी गोटी, तेखअ आणै ऐहा भितरा लै।"✝12:14 गण. 5:2,3

15 तेखअ डाही साता धैल़ै तैणीं मिर्याम डेरै का बागै गोटी अर ज़ेभै तैणीं मिर्याम भिई भितरी निं आई तेभै तैणीं निं तिंयां तिधा का आजू निखल़ै। 16 तेखअ निखल़ै तिंयां हसेरोत बणां का आजू हांढी परान रेगीस्ताना लै संघा पाऐ आपणैं खिम्भे डेरै तिधी।