गणांई 21

होर्मा नाओंए ज़ैगा ज़ितअ इज़राईली कनानी राज़ै का जुध

1 इज़राईली पुजै आजू हांढदी-हांढदी अथारीम नाओंए गराऊंऐं। अराद मुल्खो कनानी राज़अ रहा त कनान दखण रेगीस्तानै ज़ेता लै नगेब बोला। तेऊ शूणीं गल्‍ला कि ज़हा बाता तिंयां भेख लणैं आल़ै आऐ तै, तैहा ई बाता आऐ इज़राईली, तेऊ किअ तिधी इज़राईली संघै जुध संघा पाऐ कई इज़राईली कैद खानै दी।✝21:1 गण. 33:40

2 इज़राईली मनी बिधाता लै एही अरज़ करी मानत, "ज़ै तूह हाम्हां इना कनानी का जुध ज़ितणा लै मज़त करे, इने नगरी करनी अर तेते सारी च़िज़ा करनी हाम्हां खतम अर तिंयां सोभै हणीं ताह बिधाता लै।"

3 बिधाता किई इज़राईलीए मज़त, तिन्‍नैं किई कनानी लोगे सारी सैना अर नगरी पठी खतम। तैही पल़अ तिधी एकी नगरी नाअं "होर्मा" मतलब "बरैबाद किई दी ज़ैगा।"

मोसा बणाईं कांस्से दानअ

4 तेखअ लागै इज़राईली हूर धारा सेटा का आजू हांढदै। तिंयां डेऊऐ एदोम देशे सिऊंआं बागी-बागी लाल समुंदरे बाता। तैहा बाता चुटअ सोभी लोगो आजू हांढणेओ हैअ ई।✝21:4 बधा. 2:1 5 तिंयां लागै बिधाते खरी खोज़ी मोसा लै इहअ बोल्दै, "तंऐं आणै हाम्हैं मिसर देशा का एते तैणीं भाल़ी, कि हाम्हैं एऊ घोर रेगीस्तानै मरे! नां एथ रोटी आथी अर नां पाणीं! ज़ुंण हाम्हां का खाणां लै आसा बी एऊ च़िल़्हखरै खाणां खाई रुंझ़ुऐ हाम्हैं!"

6 बिधाता छ़ाडै तिन्‍नां मणछा जैंदरी झ़रीलै शपैल़ अर तिन्‍नैं शपैल़ै पाऐ तिन्‍नां मांझ़ै कई इज़राईली मारी।✝21:6 1 करि. 10:9

7 तेखअ डेऊऐ कई लोग मोसा सेटा संघा लागै इहअ बोल्दै, "ताल्है अर बिधाता लै बूरअ बोली किअ हाम्हैं पाप। ऐबै आसा म्हारी ताखा एही अरज़ कि तूह कर बिधाता संघै गल्‍ला कि इना शपैल़ा कर हाम्हां जैंदरा का दूर।"

तेखअ किई मोसा बिधाता सेटा अरज़, 8 बिधाता शूणीं मोसे गल्‍ला संघा बोलअ तेऊ लै इहअ, "तूह सैग एक कांस्सैओ शपैल़ संघा छ़ड़ाऊ तेता बडी टांघरी खल़ी करै तेते च़ुंडी। ज़हा मणछा लै शपैल़ चटाक बाहे, सह भाल़ै तेऊ कांस्से शपैल़ा बाखा, तेखअ निं सह मणछ मर्दअ।"

9 ज़िहअ बिधाता बोलअ, मोसा किअ तिहअ ई। तेऊ बणाअं एक कांस्सैओ शपैल़ संघा डाहअ सह लाम्मी टांघरीए च़ुंडी छ़ड़ाऊई। ज़ुंणी बी तेऊ कांस्से शपैल़ा बाखा भाल़अ, सह निं मूंअ आथी, च़ाऐ तेऊ लै किहै बी झ़रीलै शपैल़ै किल्है निं होए चटाक बाहअ द।✝21:9 2 राज़. 18:4; जोह. 3:4

हूर धारा का मोआबा लै डेऊणअ

10 इज़राईली रहै कनान देशा लै आजू हांढदै लागी अर बाता पाऐ तिन्‍नैं ओबोत नाओंए ज़ैगा आपणैं डेरै। 11 तिधा का आजू डेऊई पाऐ तिन्‍नैं लेई-अबरीम नाओंए ज़ैगा डेरै ज़ुंण मोआब देशा सम्हनै पुर्बा बाखा रेगीस्तानै थिई। 12 तिधा का आजू हांढी पाऐ तिन्‍नैं जेरेद नाओंए गाडा डेरै, 13 तिधा का आजू हांढी टपी तिन्‍नैं अर्नोन नदी संघा पाऐ तिन्‍नैं तेते उतर दिशा बाखा मोआब रेगीस्तानै आपणैं डेरै ज़िधी अमोरी देशे सिअं थिई। अर्नोन थिअ मोआबी अर अमोरीए सिऊंआं मांझ़ै।

14 तैही आसा "बिधाते जुध" नाओंए एकी कताबा दी इहअ लिखअ द,

"सुपा मुल्खै बहाब नगरी,

अर अर्नोन नदीओ सह खाग।

15 तेऊ खागो ढल़ान आसा

तैहा एर नाओंए नगरी तैणीं

ज़ुंण मोआब देशे सिऊंआं दी आसा।"

16 अर्नोन खागा का आजू हांढी पुजै आजू तिंयां बेर नगरी नेल़ एकी कुहै सेटा ज़ेते बारै बिधाता मोसा का इहअ त खोज़अ द, "इना लोगो कर झाल़अ, हुंह दैंऊं इना लै झुटणा लै पाणीं।"

17 तैही गांठी इज़राईली एऊ कुहे बारै एही न्हैणीं,

"ओ डुघै पाणींए कुहैआ,

उझै छ़ाड पाणींए छ़ाल्‍ली,

सोभै बोला आरो खुशीए न्हैणीं,

18 धन-धन तैहा देई लै, धन म्हारै सैणैं

ज़ुंणी अह शोठी-डाहूल़ी करै खण्हीं।"

तिधा का लागै तेखअ इज़राईली आजू हांढदै संघा पाऐ तिन्‍नैं मतान नगरी नेल़ आपणैं डेरै। 19 तिधा का पुजै तिंयां नहलीएल अर तिधा का आजू हांढी पुजै तिंयां बामोत। 20 खिरी पुजै इज़राईली मोआब मुल्खै, तिधी पाऐ तिन्‍नैं पिसगा धारा नेल़ आपणैं डेरै तेऊ खागै ज़िधा का उंधै लाल समुंदरो रेगीस्तान शुझिआ।

इज़राईली ज़ितै अमोरीए राज़ै सिहोना का

21 इज़राईली छ़ाडै आपणैं दूत अमोरी राज़ै सिहोना सेटा, संघा दैनअ इहअ समाद, 22 "हे राज़अ, हाम्हां दै तेरै मुल्खा बाती आजू डेऊणैं। म्हारी रही ताल्है ज़बान कि हाम्हैं निं तेरै देशै कहा दाखे बागा अर खेचा-खहल़ा बाती डेऊंदै, नां हाम्हां तेरै कहा कुहै का पाणीं झुटणअ। ज़ेभै तैणीं हाम्हैं तेरै मुल्खे सिऊंआं का बागै निं निखल़े, तेभै तैणीं रहणअ हाम्हां बातो-बात एकी लगैगा हांढदै लागी।"

23 पर सिहोनै निं इज़राईली लै आपणैं मुल्खा बाती डेऊणे ज़ाज़त दैनी। तेऊ झाल़ी आपणीं सारी सैना पै, संघा निखल़अ जहास नगरी नेल़ रेगीस्तानै इज़राईली संघै जुधा लै। 24 पर इज़राईली पाऐ तेऊ जुधा दी अमोरीए खास्सी सैना मारी संघा गिम्मअ तिन्‍नैं अर्नोन नदी पोर्ही उतर दिशा बाखा ज़बोग नदी तैणीं अमोरी लोगो सारअ देश। ज़बोग गाडा आजू थिअ अमोनी लोगो मुल्ख अर तिन्‍नें सिऊंआं भितरी डेऊणैं जोगी बल नांई त इज़राईली का आथी।

25 इज़राईली गिम्मी अमोरी लोगे देशे राज़धानी हेशबोन नगरी अर तेता ओरी-पोरीए नगरी अर गराअं बी गिम्मै पठी। 26 अमोरीओ राज़अ सिहोन करा त आपणअ राज़ हेशबोन नगरी का, तेऊ थिई मोआबे पिछ़लै राज़ै का जुध करी सह सारी ज़ैगा अर्नोन नदी तैणीं गिम्मी दी। 27 तैही आसा अमोरी हेशबोने बारै एही गिह गांठी दी,

"एछा, हेशबोन नगरी करनी भिई खल़ी,

सह बणाणीं राज़ै सिहोने राज़धानी!

28 तेऊए सैना निखल़ी प्लुशदी आगी ज़ेही,

उंधै किई तिन्‍नैं मोआब देशै एर नगरी बरैबाद

अर अर्नोन नदी उझै किऐ तिन्‍नें राज़ करनै आल़ै*21:28 राज़ करनै आल़ै उछ़टी ज़ैगा खतम।✝21:28 जेर. 48:45,46

29 मोआब देशा लै भाल़ केही आफ़त पल़ी!

कमोश देअऐ दैनी आपणैं लोगे बरैबादी हणैं,

तिन्‍नें मर्ध ठुर्है अर तिन्‍नें बेटल़ी बणाईं

अमोरी राज़ै सिहोनै गलाम।

30 हाम्हैं शोटअ मोआब पठी हारी।

हेशबोन नगरी पोर्ही दबोन तैणीं,

अर नोपाह पोर्ही मेदबा तैणीं हुऐ तिंयां पठी बरैबाद।"

31 इहअ करै लागै इज़राईली अमोरी लोगे देशै रहंदै, 32 मोसा छ़ाडै आपणैं आदमी मांझ़ै ज़जार नगरीए भेख लणा लै। बादा का गिम्मै इज़राईली तैहा नगरी ओरी-पोरीए सोभै गराअं अर ज़ुंण अमोरी लोग तेथ बस्सै दै थिऐ, तिंयां काढै तिन्‍नैं तेऊ देशा का पोर्ही।

बाशानो राज़अ ओग बी निं इज़राईली का जुध ज़िती सकअ

33 तेखअ डेऊऐ तिधा का इज़राईली बाशान मुल्खा बाखा ज़िधी राज़अ ओग राज़ करा त। सह आअ आपणीं सारी सैना लई अद्रोई नाओंए ज़ैगा इज़राईली संघै जुधा लै।

34 बिधाता बोलअ मोसा लै इहअ, "ओग राज़ै का निं डरी आथी, तेऊ अर तेऊए सैना का ज़ितणा लै करूं हुंह आप्पै थारी मज़त, ज़िहअ तम्हैं हेशबोन नगरी राज़ करनै आल़ै अमोरीए राज़ै सिहोना संघै किअ। ऐबै ज़िधी ओग राज़ करा, एऊ मुल्खे मालक हणैं ऐबै तम्हैं।"

35 इहअ करै किऐ इज़राईली राज़अ ओग, तेऊए शोहरू, सोभ लोग अर सारी सैना एही खतम कि तिधी निं कोहै रहअ अर इज़राईली गिम्मअ सह सारअ देश आप्पू लै।