गणांई 8

सदीऐ ज़ाल़णे बिधी

1 तेखअ बोलअ बिधाता मोसा का इहअ,✝8:1 लुआ. 25:31; 37:17-24 2 "हारणा का खोज़ राम्बल़ै करै इहअ ज़ेभै तूह सदीऐ ज़ाल़े तेभै-तेभै लोल़ी सोभी साता सदीऐओ प्रैश्शअ सदीऐ सम्हनै हुअ।" 3 हारणै बी किअ तिहअ ई ज़िहअ बिधाता मोसा लै हुकम किअ त, तेऊ ज़ाल़ै सदीऐ कि तिंयां सदीऐ सम्हनै प्रैश्शअ करी सके। 4 ज़ेऊ साबै बिधाता मोसा लै सदीअ बणाणां लै बोलअ त सह थिई तिहअ ई तोल़ा उझै उपर तैणीं सुन्‍नेंओ गल़ाऊई-ढल़ाऊई करै कपींड बणाअं द। 5 तेखअ बोलअ भिई बिधाता मोसा लै, 6 "इज़राईली मांझ़ा का कर लेबी लोगा ज़ुदै संघा कर तिन्‍नां शुचै। 7 तिन्‍नां शुचै करना लै कर तूह इहअ कि तिन्‍नां लै छ़ल़िक शुचै करनै आल़अ पाणीं संघा बोल तिन्‍नां लै तिन्‍नें सारी देहीए शराल़ पोर्ही छाम्बणा लै, संघा धोऐ झिकल़ै, तेखअ हणअ तिन्‍नों शुचै हणैंओ बधान पूरअ।

8 "तेखअ आणै तिंयां जैतूने तेला करै मुछ़अ द कणको पिठअ नाज़ बल़ी संघै एक बाछ़ू अर पाप बल़ी लै दुजअ बाछ़ू। 9 तेखअ करै लेबी सोभी इज़राईली टोलीओ मेल़-ज़ोल़े खिम्भा आजू झाल़अ। 10 तिधी बोलै बिधाता सम्हनै सोभी इज़राईली लै तिंयां इहअ कि तिंयां लाऐ आपणैं-आपणैं हाथ लेबीए मुंडै। 11 तेखअ दैऐ हारण लेबी गोत्रे लोगा इज़राईली बाखा मुंह बिधाता लै रगाऊई दी भैंटा ज़िहै कि तिंयां मेरी च़ाकरी करनै आल़ै होए।

12 "तेखअ डाहै लेबी आपणैं-आपणैं हाथ तिन्‍नां बाछ़ूए मुंडा प्रैंदै, तेखअ च़ढाऊऐ तूह लेबी लै प्राश्त करना लै एक बाछ़ू पाप बल़ी अर दुजअ हूम बल़ी बिधाता लै। 13 सोभी लेबी करै हारण अर तेऊए शोहरू सम्हनै खल़ै अर तिन्‍नां दैऐ मुंह बिधाता लै रगाऊई दी खास भैंटा ज़िहै।

14 "लेबी करै तूह इहअ करै तिन्‍नां इज़राईली का ज़ुदै अर तिंयां हणैं सिधै मेरी तैणीं। 15 ज़ांऊं तूह लेबी शुचै करी मुल्है रगाऊई दी भैंटा ज़िहै अर्पण मुक्‍के करी, तेखअ सका तिंयां मेल़-ज़ोल़े खिम्भा भितरी तेते च़ाकरी करना लै एछी। 16 किल्हैकि तिंयां आसा इज़राईली मांझ़ै मुल्है सोभी साबै पूरै अर्पण किऐ दै, मंऐं आसा तिंयां इज़राईली मांझ़ै हरेकी बेटल़ीए ज़ेठे बदल़ै मनै दै। 17 इज़राईलीए ज़ेठै च़ाऐ मणछ होए या डागै-धणा मांझ़ै पैहलै सोए नर पशू, तिंयां सोभै आसा मेरै किल्हैकि तिंयां आसा मंऐं तधू हेरै दै शुचै करी ज़धू मंऐं मिसर देशे लोगे सोभै ज़ेठै पाऐ तै मारी।✝8:17 लुआ. 13:2 18 इज़राईलीए सोभी ज़ेठे बदल़ै आसा मंऐं आप्पू लै लेबी मनै दै। 19 मंऐं दैनै लेबी हारण अर तेऊए शोहरू लै भैंट ताकि तिंयां मेल़-ज़ोल़े खिम्भा दी च़ाकरी करे। मंऐं दैनी तिन्‍नां लै अह ज़िम्मैंबारी कि होरी इज़राईली निं दैई पबित्र ज़ैगा खास्सै नेल़ एछणैं, ताकि तिन्‍नां लै घोर आफ़त नां पल़े।"

लेबी आसा बिधाता लै अर्पण किऐ दै

20 ज़िहअ लेबीए बारै बिधाता करना लै बोलअ त, मोसा, हारण अर सोभी इज़राईली टोली किअ तिहअ ई। 21 लेबी किई आपणैं पापे शुधी, तिन्‍नैं धोऐ आपणैं झिकल़ै, अर हारणै किऐ तिंयां बिधाता लै रगाऊई दी भैंटा ज़िहै अर्पण, अर तिन्‍नां शुचै करना लै किअ प्राश्त बी। 22 तेखअ डेऊऐ लेबी अर हारणे शोहरू मेल़-ज़ोल़े खिम्भा दी आपणीं-आपणीं च़ाकरी करदै ज़िहअ बिधाता मोसा का खोज़अ त।

23 तेखअ बोलअ बिधाता मोसा लै इहअ, 24 "ज़ुंण काम मंऐं लेबी लै लाअ खोज़ी, सह आसा इहअ कि तिन्‍नां मांझ़ै ज़ुंण पच्‍ची साला उझै अमरे जाए हई, तिंयां एछै मेल़-ज़ोल़े खिम्भा भितरी च़ाकरी करदै। 25 तेखअ ज़ांऊं तिंयां पज़ाह साले जाए हई, तेखअ निं तिंयां च़ाकरी लै एछी नां तिंयां काम करी।

26 "पर आपणैं भाई-बंधा संघै सका तिंयां मेल़-ज़ोल़े खिम्भा नेल़ हेर-सभाल़ करनैओ काम करी, पर होर निं किछ़ै काम करी। ईंयां ई आसा लेबी लै सभाल़ै दै काम अर इना करै एऊ ई साबै।"