गणांई 28

हर धैल़ै हणैं आल़ै बल़ीदानो बधान

1 तेखअ बोलअ बिधाता मोसा लै इहअ, 2 "इज़राईली का खोज़ इहअ, ‘ज़ुंण तम्हैं मुंह बिधाता लै खास भैंट बल़ीदान करा, सह आसा मेरअ भोज़न अर तेऊ हूमा करै हआ हुंह खुश। तेता करै तेभै ई अर तिहअ ई ज़िहअ बधान मंऐं तम्हां का खोज़ी आसा डाहअ द।’

3 "तूह खोज़ै तिन्‍नां का इहअ, ‘हर धैल़ै करै मुंह बिधाता खुश करना लै एकी-एकी साले दूई मिम्मूं हूम बल़ी ज़ेथ किछ़ै खोट निं होए। 4 एक मिम्मूं करै दोत्ती अर दुजअ करै सान्हां बल़ीदान। 5 तिन्‍नां मिम्मूं संघै करै दोत्ती अर उडै दुही बगती दूई सेर*28:5 दूई सेर एक किलू तेल जैतूनो तेल राल़ी करै आधअ पाथअ*28:5 पाथअ एक किलू कणको पिठअ नाज़ बल़ी। 6 एऊ हूमा करै मुंह बिधाता खुश करना लै हर धैल़ै, ज़ुंण पैहली बारी सीनाई धारा नाज़ बल़ी किअ त। 7 खिरी दैऐ दोत्ती अर उडै इना दुही बल़ीदाना संघै मुंह बिधाता लै च़ार सेर दाखे रसो अर्घअ। 8 तेऊ दुजै मिम्मूं करै नाज़ बल़ी अर अर्घै संघी सान्हां तिहअ ई बल़ीदान ज़िहअ तम्हैं दोत्ती किअ। सह खुशबूदार हूम हणअ मुंह बिधाता खुश करना लै।

बशैघे धैल़ीओ बल़ीदान

9,10 "‘बशैघे धैल़ी करै हर धैल़ीए हूम बल़ी अर अर्घै का लाऊआ, मुंह खुश करना लै एकी-एकी साले दूई होर मिम्मूं बल़ीदान ज़ेथ किछ़ै खोट निं होए। तिन्‍नां संघै करै एक बडअ पाथअ जैतूनो तेल राल़अ द कणको पिठअ नाज़ बल़ी अर तेता संघै अर्घअ बी लऐ दैई।✝28:9-10 मोत्त. 12:5

साज़ै धैल़ै बल़ीदान

11 "‘हर भिन्‍नैं करै मुंह बिधाता खुश करना लै साज़ै धैल़ै हूम बल़ी। तेता लै आणै दूई बाछ़ू, एक गाभू अर एकी-एकी साले सात मिम्मूं ज़ेथ किछ़ै खोट निं होए। 12 दुही बाछ़ू संघै करै जैतूनो तेल राल़ी ढाई-ढाई पाथै पिठअ नाज़ बल़ी। एक पाथअ पिठअ करै जैतूनो तेल राल़ी करै गाभू संघै बल़ीदान। 13 तिन्‍नां सोभी साता मिम्मूं संघै करै जैतूनो तेल राल़ी करै ढाई-ढाई सेर कणको पिठअ नाज़ बल़ी। एऊ हूमा करै हआ हुंह बिधाता खुश।

14 "‘दुही बाछ़ू संघै दैऐ आठ-आठ सेर दाखे रसो अर्घअ, गाभू संघै दैऐ छ़ह सेर अर हरेकी मिम्मूं संघै दैऐ च़ार-च़ार सेर दाखे रसो अर्घअ।

15 "‘खिरी करै एक छ़ेल्हू पापो प्राश्त करना लै पाप बल़ी। ईंयां बल़ीदान करै मुंह बिधाता लै हर धैल़ै हणैं आल़ै हूम बल़ी अर अर्घै का लाऊआ।

ऊवार्णैओ थैर अर आखरै रोट लुच़ी

16 "‘तम्हैं मनाऊंऐं मुंह बिधातो अदर करना लै ऊवार्णैओ थैर, एऊ पबित्र थैरा मनाऊंऐं हर साल च़ौदा च़ैत्रै।✝28:16 लुआ. 12:1-13; बधा. 16:1 17 पंद्रा च़ैत्रा पोर्ही मनाऊंऐं तम्हैं साता धैल़ी तैणीं आखरै रोट-लुच़ीओ थैर बी, तिन्‍नां तेतरै धैल़ै खाऐ तम्हैं बाझ़ी सज़ेल़े बणाऐं दै आखरै रोट-लुच़ी।✝28:17 लुआ. 12:14-20; 23:15; 34:18; बधा. 16:3-8

18 "‘एऊ थैरे पैहली धैल़ी करै तम्हैं सोभी कामां-काज़ा का बशैघ, संघा करै तम्हैं मुंह बिधाता लै पबित्र झाल़अ। 19 संघा करै तम्हैं एऊ थैरा दी हर धैल़ै मुंह बिधाता लै हूम बल़ी, तेता लै बी आणै दूई बाछ़ू, एक गाभू अर एकी-एकी साले सात मिम्मूं ज़ेथ किछ़ै खोट निं होए। 20 दुही बाछ़ू संघै करै ढाई-ढाई पाथै कणको पिठअ जैतूनो तेल राल़ी करै नाज़ बल़ी। गाभू संघै करै जैतूनो तेल राल़अ द एक पाथअ कणको पिठअ नाज़ बल़ी अर 21 तिन्‍नां सोभी साता मिम्मूं संघै करै जैतूनो तेल राल़ी करै ढाई-ढाई सेर कणको पिठअ नाज़ बल़ी। एऊ हूमा करै हआ हुंह बिधाता खुश। 22 तेखअ लऐ लोगे पापो प्राश्त करना लै एक छ़ेल्हू पाप बल़ी करी। 23 ईंयां बल़ीदान करै हर धैल़ै दोत्ती-उडै हणैं आल़ै हूम बल़ी अर अर्घै का लाऊआ।

24 "‘एऊ साबै करै तम्हैं तिन्‍नां साता धैल़ै मुंह बिधाता लै बल़ीदानो भोज़न छ़ाडी। इना बल़ीदाने हूमा करै हआ हुंह बिधाता खुश। ईंयां बल़ीदान करै हर धैल़ै दोत्ती-उडै हणैं आल़ै बल़ीदान अर अर्घै का लाऊआ।

25 "‘तेखअ लोल़ी तम्हैं एऊ थैरे सातुई धैल़ी भिई सोभी कामां का बशैघ करी मुंह बिधाता सेटा पबित्र झाल़अ किअ।

नऊंईं साल-फसलो थैर

26 "‘ज़हा धैल़ी तम्हैं मुंह बिधाता सेटा नऊंईं साला का हुई दी पज़ैआ मांझ़ै भाग नाज़ बल़ी भैंट करे, तेभै बी लोल़ी तम्हैं सोभी कामां का बशैघ करी मुंह सेटा पबित्र झाल़अ किअ।✝28:26 लुआ. 23:16; 34:22; बधा. 16:9-12 27 तेभै करै मुंह बिधाता खुश करना लै हूम बल़ी। तेता लै आणै दूई बाछ़ू, एक गाभू अर एकी-एकी साले सात मिम्मूं ज़ेथ किछ़ै खोट निं होए। 28 दुही बाछ़ू संघै करै ढाई-ढाई पाथै कणको पिठअ जैतूनो तेल राल़ी करै नाज़ बल़ी। गाभू संघै करै जैतूनो तेल राल़अ द एक पाथअ कणको पिठअ नाज़ बल़ी 29 अर तिन्‍नां सोभी साता मिम्मूं संघै करै जैतूनो तेल राल़ी करै ढाई-ढाई सेर कणको पिठअ नाज़ बल़ी।

30 "‘तेखअ करै तम्हां सोभिए पापो प्राश्त करना लै एक छ़ेल्हू बी पाप बल़ी। 31 बल़ीदाने ईंयां सोभै पशू लोल़ी इहै ज़ेथ किछ़ै खोट निं होए। एता करै हर धैल़ै दोत्ती-उडै हणैं आल़ै हूम बल़ी अर अर्घै का लाऊआ बल़ीदान।’"