1 तेखअ बोलअ बिधाता मोसा का इहअ, 2 "इज़राईली लै बोल इहअ कि, ज़ै तम्हां मांझ़ै मर्ध या बेटल़ी मुंह खुश करने मानत मने मतलब बिधाता लै आप्पू ज़ुदै करने मानत मने, 3 तेभै रहै सह दाखो रस अर शराबा का दूर। नां दाखो रस झुटी अर नां शराब झुटी अर नां दाख खाई च़ाऐ सह शुक्‍की होए या हरी।✝ 4 ज़ेतरै धैल़ै तैणीं तिंयां ज़ुदै रहे तेतरै धैल़ै तैणीं निं तेतो बेज़अ बी खाई या शल़ेफल़ै बी खाई।

5 "ज़ेतरै धैल़ै तैणीं ज़ुदै रहणें मानत होए मनी दी तेभै तैणीं निं आपणअ मूंड बी छाम्बी अर ज़ेभै तैणीं मानते धैल़ै पूरै निं होए तेभै तैणीं रहै सह ज़ुदअ, तै रहणअ सह पबित्र।✝

6 "ज़ेभै तैणीं सह मुंह बिधाता लै ज़ुदअ रहे तेभै तैणीं मुल्दै सेटा बी निं डेऊई। 7 च़ाऐ तेऊओ बाब, ईज, दाई, भाऊ बी मरे तिन्‍नां करै बी निं छ़ोतलअ हई। किल्हैकि तेऊए मुंडे शराल़ हणैं एतो नछ़ैण कि सह आसा बिधाता लै ज़ुदअ रहअ द। 8 ज़ेतरै धैल़ै बी सह ज़ुदअ रहे तिन्‍नां सारै धैल़ै रहै सह बिधाता लै पबित्र।

9 "ज़ै तेऊ सेटा कुंण हेरा-हेरी मरे तेता करै लागणीं तेऊए मुंडे शराल़ा दी छ़ोत, सह छाम्बै आपणअ मूंड सातुऐ धैल़ै, ज़ुंण शुचै हणें धैल़ी आसा। 10 आठुऐ धैल़ै आणै सह दूई पालल़ी या दूई कबूतर मेल़-ज़ोल़े खिम्भा आजू प्रोहता सेटा, 11 एकी करै प्रोहत हूम बल़ी अर दुजै करै पाप बल़ी लै प्राश्त, किल्हैकि सह हुअ मुल्दै करै पापी अर तैहा ई धैल़ी करै प्रोहत तेऊओ मूंड पबित्र। 12 तेखअ मनै सह मणछ बिधाता लै ज़ुदै रहणा लै भिई मानत अर एकी सालो गाभू आणै दोश बल़ी करना लै। ज़ुंण धैल़ै तेऊए पैहलै बितै, तिंयां गणनै बरैबाद हुऐ दै, किल्हैकि तेऊए ज़ुदै रहणें नछ़ैणा लागी छ़ोत।

13 "ज़ांऊं तेऊ सह मानत पूरी हेरी करी, तेता लै बी आसा बधान, मतलब सह एछै मेल़-ज़ोल़े खिम्भे दुआरै।✝ 14 संघा आणै सह बिधाता लै हूम बल़ी करना लै एकी सालो गाभू ज़ेथ किछ़ै खोट निं होए, एकी साले गाभी पाप बल़ी लै अर एक गाभू मेल़-ज़ोल़े बल़ी लै, 15 संघा आणै एकी च़ठै दी आखरै रोट, तेला करै बणाऐं दै कणके पिठे फुलकै, जैतूने तेला करै ल्हुशी दी आखरी लुच़ी। तिन्‍नां नाज़ बल़ी अर अर्घै आणै प्रोहता सेटा।

16 "संघा च़ढाऊऐ प्रोहत इना पाप बल़ी अर हूम बल़ी मुंह बिधाता लै। 17 आखरै रोटे च़ठी छ़ाडै प्रोहत मुंह बिधाता लै मेल़-ज़ोल़े बल़ी अर तेते नाज़ बल़ी अर अर्घअ बी च़ढाऊऐ। 18 तेखअ छाम्बै सह मानत मनणै आल़अ आपणअ मूंड मेल़-ज़ोल़े खिम्भे दुआरै संघा पाऐ आपणैं तिन्‍नां मुंडे शराल़ा तैहा आगी दी ज़ुंण मेल़-ज़ोल़े बल़ी हेठै हणीं।

19 "ज़ांऊं सह मुंडे शराल़ छाम्बी मुक्‍के तेखअ दैऐ प्रोहत गाभूओ सटेऊअ द फल़ाठ अर च़ठी का एक आखरअ रोट अर एक लुच़ी तेऊ मानत मनणै आल़ेए हाथै। 20 तेखअ च़ढाऊए सह मणछ उझै रगाऊई करै मुंह बिधाता लै भैंट, संघा दैऐ सह मणछ तेता भिई प्रोहते हाथै ईंयां सोभै च़िज़ा हणीं प्रोहता लै पबित्र, तेखअ सका सह मानत मनणै आल़अ मणछ बी तेता का मास्स खाई, किल्हैकि सह आसा बल़ीदाना दी तेऊओ भाग तेखअ हणैं तेऊए मानते धैल़ै पूरै।

21 "अह आसा मुंह बिधाता लै मानत मनणै आल़ैओ बधान, एऊ च़ढाबै च़ढाऊआ सह आपणीं गांठीए साबै, एता का लाऊआ सह ज़ेही मानत मने तेता करै तेऊ साबै पूरअ।"

22 तेखअ बोलअ बिधाता मोसा लै इहअ, 23 "हारण अर तेऊए शोहरू लै बोल इहअ कि तम्हैं दैऐ इज़राईली लै इहै बैण बोली बर्गत,

24 ‘हुंह करा बिधाता का एही अरज़ कि

सह दैए ताल्है बर्गत अर

तेऊ लोल़ी सदा तेरी फाज़त किई,

25 बिधाता लोल़ी ताल्है आपणीं झींण

अर जश रहैऊअ।

26 ताह लोल़ी सुख-शांती भेटी अर

मेरी आसा बिधाता का एही अरज़ कि तेऊ निं लोल़ी

ताह बाखा कधि पिठ फरेऊई।’

27 "इहअ करै ज़ै हारण अर तेऊए शोहरू मेरै नाओंऐं इज़राईली लै बर्गत दैए, मुंह बिधाता दैणीं तिन्‍नां लै बर्गत।"