गणांई 32

इज़राईले गोत्र ज़ुंण जरदण नदी पुर्बा बाखा बस्सै

1 रूबेन अर गाद गोत्रे इज़राईली का थिऐ खास्सै डागै-चैणैं, तिन्‍नैं भाल़अ इहअ कि ज़जार अर गलाद मुल्खै आसा खास्सी च़राई। 2 तिंयां डेऊऐ मोसा, एलीआजर प्रोहत अर होरी इज़राईली टोलीए सैणैं सेटा, संघा लागै इहअ बोल्दै, 3,4 "बिधाता किई हाम्हां इज़राईली टोली लै अतारोत, दबोन, ज़जार, निम्रा, हेशबोन, एलीला, सबाम, नेबो अर बोन नगरी फेरे ज़ैगा गिम्मणा लै मज़त। हाम्हां का आसा खास्सै डागै-चैणैं, 5 तै च़ाहा हाम्हैं इहअ कि हाम्हां बस्सणअ जरदण नदीए पुर्बा बाखा अर ऐहा ज़ैगा दैआ तम्हैं म्हारै नाओंऐं करी।"

6 मोसा बोलअ गाद अर रूबेन गोत्रे इज़राईली लै, "थारअ कै मतलब आसा कि तम्हां रहणअ इधी बस्सी अर थारै भाई-बंध होरी इज़राईली डेऊणअ आजू जुधा लै? 7 इहअ करै लाअ तम्हैं थारै भाई होरी इज़राईलीओ बी शाह चोल़ी, तिन्‍नां बी निं तेखअ जरदण नदी पार तैहा ज़ैगा लै डेऊणे हिम्मत रहणीं ज़ुंण बिधाता तिन्‍नां लै आसा दैनी दी! 8 तम्हैं आसा आझ़ तिहअ ई करदै लागै दै ज़िहअ खास्सी साला पैहलै थारै दादै-बाबै किअ त, तिंयां छ़ाडै तै मंऐं कादेश-बर्ना का एऊ देशा भाल़ै।✝32:8 गण. 13:17-33 9 ज़धू तिंयां एशकोल नाओंए खागा का एऊ देशा भाल़ी बापस हाम्हां होरी सेटा पुजै, तिन्‍नैं बी चोल़अ त इहअ बोली सोभी इज़राईलीओ शाह कि ज़ुंण ज़ैगा बिधाता हाम्हां लै आसा दैनी दी, तेथ निं हेरे डेऊई आथी!

10 "तैहा गल्‍ला लै आई ती बिधाता खास्सी रोश्शै अर तेऊ बोलअ त सोह खाई इहअ,✝32:10 14:26-35 11,12 ‘ज़ुंण इज़राईली मंऐं मिसर देशा का काढी आणै, तिन्‍नां मांझ़ै बिहा साले अमरा का उझै ज़ेतरै बी मणछ आसा, कनजी यपुन्‍नें शोहरू कालेब अर नूने शोहरू ज़ैहसू छ़ाडी निं कोही इज़राईली सह देश भाल़णअ भेटणअ ज़ेता दैणें करार मंऐं आबराम, इसहाक अर याकबा संघै आसा किई दी। किल्हैकि तिन्‍नां मांझ़ै निं कोही बी मुंह बिधाते बला दी भरोस्सअ किअ।’

13 "तिन्‍नां होरी इज़राईली लै पल़अ तेखअ बिधातो कोप अर तिंयां डाहै च़ाल़्ही साला तेभै तैणीं शुन्‍नैं रेगीस्तानै ठणाखदै लाई ज़ेभै तैणीं तैहा पोस्तीए तिंयां लोग सोभै निं मूंऐं ज़ुंणी बिधाता लै बूरअ सोठअ त।

14 "ऐबै ज़ुंण तम्हैं रूबेन अर गाद गोत्रा आल़ै आसा, तम्हैं बेठै ऐबै आपणैं दादा-बाबे ज़ैगा पाप करदै अर तम्हैं लाअ ऐबै ऐहा पोस्ती लै बिधातो होर खास्सअ कोप पाई ज़ेते मार इज़राईली पैहलै ई आसा पल़ी गई दी। 15 ज़ै तम्हैं अज़ी बी बिधाता बाखा नांईं फिरे, बिधाता डाहणैं हाम्हैं इज़राईली भिई शुन्‍नैं रेगीस्तानै ठणाखदै लाई अर तेते ज़िम्मैंबार हणैं तम्हैं रूबेन अर गाद गोत्रा आल़ै।"

16 तेखअ लागै रूबेन अर गाद गोत्रा का आऐ दै तिंयां सैणैं बोल्दै, "हाम्हां दै आपणैं डागै लै खुढ अर भेडा बाकरीए हेल़्ही डाहणां शाल़ा बणाणैं अर आपणैं बेटल़ी-माठै लै दै हाम्हां नगरी बणाणैं ज़ेथ फेर-फिरदअ गहल़ होए च़िणअ द, 17 ज़ेथ रही तिंयां राज्ज़ी-राम्बल़ै रहे। आप्पू डेऊणअ हाम्हां तेखअ शस्त्र पाई जुधा लै होरी इज़राईली का आजू-आजू। 18 तेखअ निं हाम्हां तेभै तैणीं पिछ़ू हटणअ ज़ेभै तैणीं इज़राईले सोभै गोत्र आपणीं-आपणीं ज़ैगे बांड भेटी बस्सी निं जाए। 19 जरदण नदी पुर्बा दी एथ बाखा ज़ैगा हुई हाम्हां लै अर तेखअ निं हाम्हां पार बाखा किछ़ै हेस्सअ लोल़ी।"

20 तेखअ बोलअ मोसा तिन्‍नां लै, "ज़िहअ तम्हैं बोलअ, ज़ै थारअ इहअ ई बच़ार आसा कि तम्हां डेऊणअ बिधाते तैणीं जुधा लै, 21 तम्हैं दैनी ज़बान कि थारै जुधा करनै आल़ै मर्ध डेऊणैं जरदण नदी पार अर तिंयां निं तेभै तैणीं पिछ़ू हटणैं ज़ेभै तैणीं बिधाता म्हारै दुशमणा ऐहा ज़ैगा का पोर्ही निं हेरे काढी। ज़ै तम्हैं इना सोभी गल्‍ला करे, 22 तेखअ ज़ांऊं बिधाता हाम्हां लै एऊ सारै देशा म्हारै बशै हेरे करी, तेखअ सका तम्हैं बापस फिरी। किल्हैकि तम्हैं मुक्‍कै तेखअ बिधाता अर होरी इज़राईली लै आपणीं ज़िम्मैंबारी नभाऊई। जरदण नदीए पुर्बा बाखा अह ज़ैगा हणीं तेखअ बिधाता तम्हां लै दैनी दी जदी ज़ैगा।

23 "पर ज़ै तम्हैं आपणीं ज़बान पूरी निं करे, तेतो लागणअ हेरे तम्हां बिधाता लै पाप अर सह निं तेते सज़ा दैणैं का पिछ़ू हटदअ। 24 तम्हैं लागा इधी आपणैं डागै लै खुढ अर भेडा बाकरीए हेल़्ही डाहणां शाल़ा अर आपणैं बेटल़ी-माठै लै फेर-फिरदै उछ़टै गहल़ा आल़ी नगरी बणाऊंदै, पर ज़ुंण तम्हैं ज़बान दैनी, तैहा करै पूरी।"

25 तेखअ लागै गाद अर रूबेन गोत्रे सैणैं लोग मोसा लै बोल्दै, "ज़िहअ तूह म्हारअ मालक हुकम करा, हाम्हां करनअ तिहअ ई। 26 म्हारै डागै-चैणैं अर बेटल़ी-माठै रहणैं इधी गलाद नगरी, 27 पर म्हारै मालक, आप्पू डेऊणैं हाम्हैं सोभै शस्त्र बिद्या ज़ाणनै आल़ै जरदण नदी पार, संघा करनअ हाम्हां बिधाता लै जुध, ज़िहअ तंऐं हाम्हां लै बोलअ।"

28 तेखअ बोलअ मोसा एलीआजर प्रोहत, नूने शोहरू ज़ैहसू अर इज़राईली गोत्रे सैणैं लै,✝32:28 ज़ैह. 1:12-15 29 "ज़ै गाद अर रूबेन गोत्रे शस्त्र बिद्या ज़ाणनै आल़ै सोभै आदमी तम्हां संघै जरदण नदी पार जुधा लै डेओए, अर तिंयां एऊ सारै देशा गिम्मी तम्हां तेते मालक बणाईं हेरे, तेखअ दैऐ एऊ सारै गलाद मुल्खे ज़ैगा इने नाओंऐं करी अर सह हणीं इने जदी ज़ैगा। 30 पर ज़ै ईंयां जरदण नदी पार टपी तम्हां संघै जुधा लै नांईं डेओए, तै दैऐ इना लै बी होरी इज़राईली ज़ेही जरदण नदी पार कनान देशै हेस्सअ।"

31 गाद अर रूबेन गोत्रा आल़ै लागै तेखअ बोल्दै, "हाम्हैं आसा तेरै दास अर हाम्हां करनअ तिहअ ई ज़िहअ बिधाता हुकम आसा किअ द। 32 हाम्हैं ज़ेतरै बी शस्त्र बिद्या ज़ाणनै आल़ै आसा, हाम्हां सोभी डेऊणअ पार बिधाता आजू-आजू कनानी संघै जुधा लै। पर म्हारअ हेस्सअ लोल़ी जरदण नदी एथ बाखा अह ई ज़ैगा हुई।"

33 तेखअ ज़हा मुल्खे नगरी अमोरी राज़ै सिहोनो राज़ थिअ, अर ज़हा मुल्खे नगरी बाशान मुल्खो राज़अ ओग राज़ करा त, तिन्‍नां मुल्खे नगरी अर तेता फेरे सारी ज़ैगा दैनी मोसा गाद, रूबेन अर युसुफे शोहरू मनिश्शे गोत्रा मांझ़ै आधै लोगा लै।

34 गाद गोत्रे लोग बस्सै तेखअ दबोन, अतारोत, अरोर, 35 अतारोत शोपान, ज़जार, जोगबाह, 36 बेथ-निम्रा अर बेथ-हारन नगरी दी। तिन्‍नैं बसाऊई तिंयां नगरी फेर-फिरदै गहल़ च़िणीं भिई अर आपणैं डागै लै खुढ अर भेडा बाकरीए हेल़्ही डाहणां शाल़ा बी बणाईं तेता भितरी।

37 रूबेन गोत्रा आल़ै बसाऊई फेर-फिरदै गहल़ च़िणीं हेशबोन, एलीला, किर्यातैम नगरी भिई। 38 नेबो अर बाल-मिऊन नगरी नाअं डाहअ तिन्‍नैं सिबमा। इहअ करै ज़ुंण नगरी तिन्‍नैं फेर-फिरदै गहल़ च़िणीं भिई बणाईं तेते डाहै तिन्‍नैं आपणैं साबै नाअं।

39 मनिश्शे गोत्रा का माकीरे खिंबे टोलीए लोग डेऊऐ गलाद मुल्खै अर तिन्‍नैं गिम्मी तिधे सोभी नगरी आप्पू लै अर तिधी बस्सै दै अमोरी काढै तिन्‍नैं ज़ोरा-ज़ोरी पोर्ही।

40 मोसा दैनअ सह सारअ गलाद मुल्ख मनिश्शे गोत्रा का माकीरे खिंबे टोली लै अर तिंयां बस्सै तेखअ तिधी। 41 याईर ज़ुंण मनिश्शे गोत्रा का थिअ, तेऊ गिम्मी आप्पू लै गलाद मुल्खै कई बसती अर तेतो नाअं बदल़ी डाहअ तेऊ, "याईरे गराअं।"

42 नोबाहै गिम्मै कनात नगरी अर तेता ओर्ही-पोर्ही सोभै गराअं, संघा डाहअ तेऊ तेता नाअं आपणैं नाओंऐं "नोबाह।"