गणांई 20

मोसा अर हारणे बैहण मिर्याम गई ज़ांऐं

1 च़ैत्रै पुजै सोभै इज़राईली टोली सीन नाओंए रेगीस्तानै, संघा पाऐ तिन्‍नैं तिधी कादेश नगरी नेल़ आपणैं डेरै। तैहा ज़ैगा गई हारण अर मोसे बैहण मिर्याम ज़ांऐं संघा डाही तिन्‍नैं सह तिधी घोरी दाबी।

टोल्हा का पाणीं काढणअ

2 तैहा ज़ैगा निस्सअ इज़राईली टोली झुटणा लै बी पाणीं भेटी अर तिंयां हुऐ मोसा अर हारणा फेर कठा।✝20:2 लुआ. 17:1-7 3 संघा लागै इहअ बोली मोसा लै बखर्दै, "एता का भलअ हणअ त सह ई ज़ै हाम्हैं बिधाता सम्हनै मेल़-ज़ोल़े खिम्भा आजू तिन्‍नां संघै सोभै मरदै ज़ुंण म्हारै भाई-बंध तिधी मूंऐं। 4 तंऐं किज़ू पजैल़ै हाम्हैं एऊ रेगीस्तानै? एते तैणीं कि हाम्हैं आपणैं डागै-चैणैं संघी नचिशै मरे? 5 ऐहा करबैऊंणीं ज़ैगा का थिअ मिसर देश ई राम्बल़अ! तिधी किछ़ निं किछ़ नाज़, फेडू, दाख अर नारदाणैं ता थिऐ खाणां लै। इधी निं झुटणा लै पाणीं बी आथी!"

6 मोसा अर हारण डेऊऐ मेल़-ज़ोल़े खिम्भे प्रऊल़ी आजू, संघा टेक्‍कअ तिधी धरनीं उटै पल़ी माथअ। तिधी शुझुअ तिन्‍नां का बिधाता प्रगट हणैंओ धुप्पअ।

7,8 बिधाता बोलअ तिन्‍नां लै इहअ, "मोसा, आपणीं हांढणे शोठी निंऊं, संघा कर तूह आपणैं भाई हारणा संघी सोभी इज़राईलीओ झाल़अ, तेखअ बोल बडी टोल्हा सेटा डेऊई कि तेता का लोल़ी पाणीं निखल़अ। तेता का निखल़णअ पाणीं कि सोभै इज़राईली अर तिन्‍नें डागै-चैणें हेल़्ही रज्ज़ी पाणीं झुटे।"

9 ज़िहअ बिधाता हुकम किअ, मोसा किअ तिहअ ई। तेऊ निंईं मेल़-ज़ोल़े खिम्भा भितरा का आपणीं शोठी। 10 तेखअ किअ तेऊ अर हारणै सोभी इज़राईलीओ बडी टोल्हा फेर झाल़अ संघा बोलअ मोसा इहअ, "द्रोही मणछो, राम्बल़ै करै भाल़ा, ऐबै हुअ हाम्हां ऐहा टोल्हा का तम्हां लै पाणीं काढणअ!"

11 तेखअ किई मोसा आपणीं शोठी उझै खल़ी संघा बाही तेता करै दूई बारी टोल्हा लै। ज़ेतरी सह बाही निं मुक्‍कअ, तेतरी गई पारा का पाणींए गाड निखल़ी अर सोभै इज़राईली अर डागै-चैणैं लागै पाणीं झुटदै।

12 पर बिधाता बोलअ मोसा अर हारणा लै, "ज़ुंण देश मंऐं इना इज़राईली लै दैनअ तिधी पजैल़णैं आल़ै निं ऐबै तम्हैं दूई रहणैं किल्हैकि तम्हैं निं इना इज़राईली सम्हनै मेरै बला दी इहअ भरोस्सअ किअ कि ईंयां मुंह पबित्र समझ़े।"

13 तैहा ज़ैगा नाअं पल़अ "मरीबा*20:13 मरीबा मतलब "बखर्नअ"" किल्हैकि इज़राईली तै तिधी बिधाता लै बखर्दै लागै दै अर बिधाता रहैऊई टोल्हा का पाणीं काढी अह गल्‍ल कि सह आसा पबित्र।

एदोमी लोग निस्सै इज़राईली आपणीं ज़ैगा बाती छ़ाडी

14 मोसा छ़ाडै आपणैं दला मांझ़ै कादेश ज़ैगा का आपणैं दूत संघा दैनअ तिन्‍नां का एदोमे राज़ै लै इहअ समाद, "हाम्हैं आसा थारै भाई-बंध इज़राईली, ताखा आसा हणअ थोघ कि हाम्हां तेरै भाई-बंधा लै केही-केही खरी अहुकी बिति। 15 म्हारै दाद-बाब थिऐ मिसर देशै बस्सै दै अर तिधी रहै तिंयां खास्सी साला। बादा का हुअ मिसर देशे लोगो बभार म्हारै दाद-बाब अर हाम्हां लै खास्सअ बूरअ, 16 पर ज़ांऊं हाम्हैं ईंयां सोभै गल्‍ला बिधाता सेटा डाही, बिधाता शूणीं म्हारी लेर-पकार अर तेऊ काढै हाम्हैं मिसर देशा का आपणअ दूत छ़ाडी संघा किई इधी पजैल़णैं तैणीं म्हारी मज़त। ऐबै आसा हाम्हैं कादेश नगरी नेल़ पुजै दै, तिधा आजू आसा तेरै मुल्खो बान्‍नअ। 17 म्हारी आसा ताखा एही अरज़ कि हाम्हां दै तेरै मुल्खा बाती आजू डेऊणैं। हाम्हैं निं तेरै खेचा, दाखे बागा बाती डेऊंदै नां तेरै कहा कुहैओ पाणीं झुटणअ, हाम्हां लागणअ बातो-बात हांढदै, ज़ेभै तैणीं हाम्हैं तेरै देशे बान्‍नै का बागै निं निखल़े तेभै तैणीं निं हाम्हां ओर्ही-पोर्ही बी भाल़णअ।"

18 पर एदोमे राज़ै दैनअ इहअ ज़बाब, "हुंह निं तम्हां आपणैं देशा बाती डेऊणैं दैंदअ, ज़ै तम्हैं इज़राईली आजू एछणें कोशिश बी करे, मुंह एछणअ तम्हां लै सैना लई संघा गोटणैं मुंह तम्हैं फेरा-फेर।"

19 मोसा दैनअ तेऊ लै भिई समाद, "म्हारअ रहअ ताल्है बाहिदअ कि हाम्हां लागणअ बातो-बात हांढदै, ज़ै म्हारै डागै-चैणैं मांझ़ै कुंण तेरै देशो पाणीं बी झुटे, तेते बी दैंऊं हाम्हैं किम्मत! हाम्हां दै सिधअ बाता-बाती आजू निखल़णैं।"

20 पर एदोमे राज़ै दैनअ भिई काठअ समाद, "मंऐं हेरअ बोली, हुंह निं तम्हां आपणैं देशा बाती डेऊणैं दैंदअ।"

तेखअ आअ एदोमो राज़अ बलबान सैना लई कि इज़राईली तेऊए सिऊंआं भितरी निं एछे। 21 इहअ करै निं इज़राईली एदोम देशे बाता डेऊई सकै अर तिंयां फिरै पिछ़ू संघा लागै होरी बाता आजू हांढदै।

बाता गअ हारण ज़ांऐं

22 कादेश नगरी नेल़ा का आजू हांढदी-हांढदी पुजै सोभै इज़राईली टोलीए लोग हूर नाओंए धारे गोधै, तिधी बी थिअ एदोम देशो बान्‍नअ।✝20:22 गण. 21:4; 33:37 23 बिधाता बोलअ तेखअ एदोम देशे सिऊंआं नेल़ हूर धारा मोसा अर हारणा लै इहअ, 24 "हारण, तूह निं तेऊ देशै ऐबै पुजदअ ज़ेता दैणें करार मंऐं इज़राईली संघै आसा किई दी, तेरअ गअ ऐबै संसारा छ़ाडणेंओ बगत एछी। तंऐं अर मोसा निं मरीबा नाओंए सोबल़ा सेटा तिहअ किअ ज़िहअ हुंह च़ाहा त। 25 मोसा, तूह डेऊ हारण अर एऊए शोहरू एलीआजरा संघै उझै हूर धारा प्रैंदा लै। 26 तेखअ खोल्ह हारणा का प्रोहतो च़ोल़अ पोर्ही संघा बन्हैऊं तेता एलीआजरा का, हारणा शोटणै तिधी आपणैं प्राण।"

27 ज़िहअ बिधाता हुकम किअ त, मोसा किअ तिहअ ई, सह उखल़अ हारण अर एलीआजरा संघै हूर धारा प्रैंदा लै, इज़राईली टोलीए सोभै लोग थिऐ तिन्‍नां भाल़ै लागै दै। 28 तेखअ खोल्हअ मोसा माहा प्रोहतो च़ोल़अ हारणा का पोर्ही संघा बन्हैऊंअ सह एलीआजरा का। हारणै शोटै तिधी प्राण।✝20:28 लुआ. 29:29; गण. 33:38; बधा. 10:6

ज़ांऊं मोसा अर एलीआजर धारा प्रैंदा का उंधै होथै, 29 तेखअ हेरअ तिन्‍नां भाल़ी सोभी इज़राईली टोली ज़ाणीं कि हारण गअ ज़ांऐं हई। तेखअ किअ सोभी लोगै तेता लै तिहा धैल़ै तैणीं शोग।✝20:29 मूल. 50:3; बधा. 34:8