1 ऐबै करा हुंह तम्हां सोभी का एही अरज़ कि सोभी मणछा लै करनी प्राथणां। परमेशरा का करनी एही प्राथणां कि तिन्‍नें मज़त करे। 2 राज़ै अर सोभी बडी पदबी आल़ै लै करनी एते तैणीं अरज़ कि तिंयां हाम्हां शांती दी रहणैं दैए अर म्हारी फाज़त करे, ताकि हाम्हैं परमेशरे च़ाकरी करी सके अर म्हारअ लोल़ी सोभी संघै भलअ बभार हुअ। 3 इहअ लागा म्हारै उद्धार करनै आल़ै परमेशरा शोभलअ अर भाऊंआ बी। 4 सह च़ाहा इहअ कि सोभी मणछो लोल़ी उद्धार हुअ, अर तिंयां सत्त भली भांती बछ़ैणीं सके।✝

5 किल्हैकि परमेशर आसा एक्‍कै, अर परमेशरा अर मणछा मांझ़ै मेल़-ज़ोल़ करनै आल़अ खणोढी बी आसा एक्‍कै, सह आसा मसीहा ईशू। 6 मसीहा हुअ सोभी लोगा लै पाप अर मौता का छ़ुटकारै दैणें तैणीं बल़ीदान। तेऊए मौता करै दैनअ परमेशरै ठीक बगती सबूत कि सह च़ाहा सोभी लोगा बच़ाऊंणअ। 7 तैही आसा हुंह परमेशरै खुशीए समादा खोज़दअ अर शधाणूं छ़ांटअ द। तेऊ छ़ांटअ हुंह होरी ज़ाती लै विश्वास अर सत्ते बारै शिक्षा दैणा लै। हुंह निं झ़ुठअ बोल्दअ, हुंह आसा शुची गल्‍ला खोज़दअ लागअ द।

8 हुंह च़ाहा इहअ कि हर ज़ैगा लोल़ी मर्धे हाथ प्राथणां करना लै परमेशरा बाखा लै तेऊ साबै उझ़ुऐ ज़ेता हाम्हैं सोभै मना। विश्वासीए प्राथणां निं लोल़ी रोश्शा रहैऊंणा लै या हठल़णैं लै हुई।

9 तिहअ ई, बेटल़ी बी करै लाज़-शरम डाही भलै कामों हार शंगार करनअ इहअ शंगार ज़ुंण परमेशरे लोगा शोभा दैआ, नां कि कई रंगे गुछ़टी बाली करै अर सुन्‍नैं-च़ंदी, मोती, अर किम्मती झिकल़ै करै। 10 पर तिन्‍नां लागा होरी लोगा लै भलै काम करनै सह आसा तिन्‍नों शंगार अर असली शोभा।

11 ज़ेभै कुंण विश्वासी लै शिक्षा दैआ, तेभै लागा सोभी बेटल़ी बडै अदर करी च़ुपच़ाप शूणैं लागणअ। 12 हुंह निं ऐहा गल्‍ला मंदअ कि बेटल़ी मर्धा लै शिक्षा दैए अर मर्धा प्रैंदै राज़ करे। ज़ेभै थारी सभा हआ, तेभै लागा बेटल़ी च़ुप्पी रहणअ।

13 मेरी ऐहा गल्‍ला बोल़णैं पिछ़ू आसा अह गल्‍ल कि मर्ध बणाअं परमेशरै पैहलै अर तेखअ बणाईं ज़नानी✝ 14 अर इहअ बी कि सह थिई हव्वा ज़ुंण दानुईं कबाता पाई, नां कि आदमी! इहअ करै निं बेटल़ी परमेशरो हुकम मनअ।✝

15 पर परमेशरा करनअ बेटल़ीए शोहरू-माठै पैईदा करनै पिछ़ू उद्धार ज़ेभै तैणीं तिंयां मसीहा दी विश्वास करा, सोभी संघै झ़ूरी डाहा अर आपणीं ज़िन्दगी नर्दोश डाहे।