1 ऐबै भाईओ, हाम्हां दैणअ तम्हां लै परमेशरे तैहा झींणा अर जशो समाद, ज़ुंण मकिदुनिया मुल्खे विश्वासीए टोली दी हुअ। 2 ज़ांऊं कई सांगटा करै परिक्षा हुई, तिन्‍नैं दैनै बडै नंद अर खुशी संघै गरीब हई बी एरुशलेम नगरीए विश्वासी लै खास्सै ढब्बै कठा करी।

3 तिन्‍नें बारै आसा मेरी अह शाजत कि तिन्‍नैं दैनअ आपणीं समरता का बी खास्सअ दान 4 अर तिन्‍नैं किई भिई-भिई हाम्हां का अरज़ कि एरुशलेम नगरीए विश्वासी लै दान दैणें च़ाकरी दी साझ़ू हणैंओ मोक्‍कअ दैआ तिन्‍नां लै बी। 5 हाम्हैं निं इहअ सोठअ थिअ अर नां एही आशा थिई कि तिन्‍नां दैणअ एतरअ दान। तिन्‍नैं दैनी पैहलै आपणीं ज़िन्दगी प्रभू लै अर तेखअ हाम्हां लै, ज़िहअ परमेशर च़ाहा त कि तिंयां करे।

6 तैही समझ़ाऊअ हाम्हैं तितसा बी कि ज़िहअ तेऊ पैहलै शुरू किअ त, तिहअ ई लए तम्हां मांझ़ै बी एऊ दान दैणें कामां पूरअ बी करी। 7 तैही ज़िहअ तम्हैं हर गल्‍ला दी विश्वास, गूरू, ज्ञैन अर हर रंगे कोशिशा दी, तैहा झ़ूरी दी ज़ुंण हाम्हां संघै डाहा, तिंयां बझ़दै रहा, तिहै ई गरीब विश्वासी लै एऊ दान दैणें कामां दी बी रहा बझ़दै।

8 हुंह निं तम्हां लै हुकम दैंदअ पर हुंह बोला होरीए जोशा संघै थारी झ़ूरीए सत्ता परखणैं तैणीं।

9 तम्हैं म्हारै प्रभू ईशू मसीहे जशे बारै, ज़ाणा कि सह बणअ सेठ हई भिई थारी तैणीं गरीब, ताकि तेऊए गरीब हणैं करै तम्हैं सेठ होए।

10,11 ऐहा गल्‍ला लै आसा मेरी अह ई सलाह कि तम्हां लै आसा अह बधिया, ज़ुंण तम्हैं एकी साला ओर्ही शुरू किअ तेऊ कामां करा पूरै। पिछ़ली साला तै तिंयां तम्हैं ई ज़ुंण दान च़ाहा तै दैणअ अर तम्हैं सोभी का आजी दैनअ बी। ऐबै करा तम्हैं तेऊ कामां पूरै ज़ुंण तम्हैं शुरू किअ। ज़ुंण जोश तम्हैं शुरू दी रहैऊअ सह लोल़ी एभै थारै दान दैणैं करै एभै बी शुझुअ। ज़ेतरी थारी समरता आसा तेऊ साबै दैआ आपणीं गांठी का दान। 12 ज़ेतरअ बी दान तम्हैं दिला का खुशी-खुशी दैए सह हेरनअ हाम्हां मनी। तम्हैं दैऐ तेता ज़ुंण तम्हां का आसा तेता निं दैई ज़ुंण तम्हां का नांईं आथी।

13 हुंह निं इहअ च़ाहंदअ कि थारै दान दैणैं करै होर, होए सुखी अर तम्हां होए खरी। हुंह च़ाहा इहअ कि सोभै लोल़ी सुखी रहै। 14 बराबरीए बच़ारा संघै लोल़ी ऐहा घल़ी थारी बढोतरी तिन्‍नें काम्मी-पेशी दी काम आई, ताकि तिन्‍नें बढोतरी बी थारी काम्मी-पेशी दी काम एछी सके, ताकि बराबरी होए।

15 ज़िहअ पबित्र शास्त्रा दी आसा लिखअ द,✝

"ज़ुंणी खास्सअ झाल़अ, तेऊ लै निं किछ़ खास्सअ निखल़अ

अर ज़ुंणी थोल़अ झाल़अ, तेऊ लै निं किछ़ घट निखल़अ।"

16 हुंह करा परमेशरो शूकर तेऊ पाअ सह ई जोश तितसे मन्‍नैं बी ज़ुंण तम्हां लै मेरै मन्‍नैं आसा। 17 ज़ेभै हाम्हैं तेऊ लै थारी मज़त करना लै बोलअ, सह हुअ तेभी तैर। सह थिअ थारी मज़त करना लै सोभी का आजू अर तेऊ बोलअ इहअ कि मुंह डेऊणअ तम्हां सेटा लै आप्पै।

18 हाम्हैं आसा तेऊ संघै सह विश्वासी भाई बी छ़ाडअ द ज़सरअ खुशीए समादा खोज़णें बारै सोभी विश्वासीए टोली दी आसा थोघ। 19 टोलीए विश्वासी बोलअ सोभी तेऊ लै हाम्हां संघै एरुशलेम डेऊणा लै कि एऊ दाना तिन्‍नां विश्वासी सेटा पजैल़े। हाम्हैं करा दान दैणें च़ाकरी एते तैणीं कि प्रभूओ नाअं बढे अर सोभी का शुझिए कि हाम्हां विश्वासी लागा एकी दुजे मज़त करनी।

20 सोभी विश्वासी भाई दैनै दिल खोल्ही करै ढब्बै दान। तितसा संघै छ़ाडअ हाम्हैं सह एक होर विश्वासी भाई तम्हां सेटा लै एते तैणीं कि तिन्‍नां ढब्बै एरुशलेम पजैल़णां लै कुंण हाम्हां लै दोश नां लाए कि हाम्हैं धख ढब्बै आप्पू का किनी डाहै होए। 21 हाम्हां डाहा इना सोभी गल्‍लो मानदारी दी अर सोभी मणछे आछी सम्हनै करनैओ खैल। हाम्हैं च़ाहा इहअ कि सोभी का लोल़ी थोघ लागअ कि हाम्हैं एता किहअ करै करा अर हाम्हैं समझ़ा इहअ बी कि ऐहा गल्‍ला भाल़णैं आल़अ आसा प्रभू बी।

22 इना दूई संघै छ़ाडअ हाम्हैं एक होर विश्वासी भाई बी। हाम्हां का शुझुअ इहअ कि एऊ भाई किऐ बडै शुचै-पाक्‍कै रही बडै खास काम, सह च़ाहा ऐबै थारी होर बी खास्सी मज़त करनी। किल्हैकि तेऊ आसा तम्हां दी बडअ विश्वास। 23 ज़ै कुंण तितसे बारै पुछ़े, सह आसा मेरअ साथी अर तम्हां लै मेरअ संघा काम करनै आल़अ शधाणूं अर ज़ै म्हारै तिन्‍नां दूई विश्वासी भाईए बारै पुछ़े, सह आसा विश्वासीए टोली आल़ै छ़ाडअ द अर सह करा मसीहो खास्सअ अदर।

24 एता लै रहैऊआ तिन्‍नां लै आपणीं झ़ूरी अर विश्वासी टोली दी करा ऐहा गल्‍ला पाक्‍की कि थारै बारै म्हारअ घमंड करनअ आसा ठीक।