2 Pedro 2

झ़ुठै गूरू

1 ज़िहै खास्सी साला पैहलै झ़ुठै गूर निखल़ै तै, तिहै ई निखल़णैं झ़ुठै गूरू तम्हां मांझ़ै। तिन्‍नां पाणै लोग झ़ुठी शिक्षा करै मसीहा दी विश्वास करनै का कबाता। तिन्‍नां झ़ुठी गूरू निं ईशू मसीहा आपणअ मालक मंदै ज़ुंणी तिंयां पापे शगती का आज़ाद किऐ। इहअ करै हणैं तिंयां आप्पू ई नभैऊशै बरैबाद। 2 कई ज़ुंण ईशू मसीहा दी विश्वास करनैओ दखाअ करा। तिन्‍नां बी करनी कंज़री बाते नकल ज़िहअ तिन्‍नां झ़ुठी गूरूओ बभार आसा। होर लोग ज़ुंण विश्वासी निं आथी तिन्‍नां करनी सत्ते साबै ज़िन्दगी ज़िऊंणें बी निंदा।✝2:2 रोम. 2:24; एज. 36:22

3 ईंयां गूरू हणैं मांण करनै आल़ै, तिन्‍नां पाणै तम्हैं आपणीं बणाईं दी कथ्या खोज़ी कबाता ताकि तम्हां का तिन्‍नां ढब्बै भेटे। परमेशरै आसा खास्सी साला पैहलै हेरअ द इने बारै सोठी कि तेऊ दैणीं इना लै सज़ा अर सह आसा एता करना लै तैर। तेऊ करनै पाक्‍कै दी तिंयां बरैबाद।