आमोस 7

धैनै-सुपनै शुझुऐ रैट्टै

1 मेरै मालक बिधाता रहैऊअ मुखा धैनै-सुपनै। मुखा शुझुअ इहअ कि ज़ांऊं राज़े घाह लऊंणै बाद नाज़ा दी टिप्परू लागै, तेता लै बेठअ रैट्टैओ छ़ुंढ। 2 तिन्‍नैं खाअ धरनीं घाहा-पाचा संघी पठ; अर तेखअ बोलअ मंऐं, "ए मेरै मालक बिधाता! ज़ीबाण, माफी छ़ाड। एऊ बनाशा बाद निं याकबे आद-लुआद खल़ै उझ़णै जोगी रहणैं! इज़राईली आसा बाख थोल़ै ज़िहै।"

3 तेखअ हटअ बिधाता बनाश करनै का पिछ़ू संघा बोलअ इहअ, "ऐबै निं मुंह इहअ करनअ।"

आग

4 तेखअ रहैऊअ मेरै मालक बिधाता मुखा इहअ: मुखा शुझुअ कि तेऊ लाई आपणीं परज़ा लै आगी करै सज़ा दैई। तैहा आगी शकेऊअ माहा समुंदर बी अर तेखअ शाची सह आग धरती दी। 5 मंऐं बोलअ इहअ, "ए मेरै मालक बिधाता! ज़ीबाण, माफी छ़ाड। एऊ बनाशा बाद निं याकबे आद-लुआद खल़ै उझ़णै जोगी रहणैं! इज़राईली आसा बाख थोल़ै ज़िहै।"

6 तेखअ हटअ मेरअ मालक बिधाता बनाश करनै का पिछ़ू संघा बोलअ इहअ, "ऐबै निं मुंह इहअ करनअ।"

साहुल

7 तेखअ रहैऊअ मेरै मालक बिधाता मुखा इहअ: मुखा शुझुअ कि मालक आसा एकी उछ़टी दुआली सेटा खल़्हुअ द। तेऊए हाथै ती साहुल। 8 मालकै पुछ़अ मुखा, "आमोस, ताखा किज़ै शुझिआ?"

मंऐं दैनअ ज़बाब, "मुखा शुझिआ एक साहुल।"

तेखअ बोलअ मेरै मालक बिधाता इहअ, "अह साहुल लाई मंऐं आपणीं परज़ा इज़राईली लै लाई, तिंयां आसा दुआली ज़िहै ज़ुंण आजू-पिछ़ू आसा सिक्‍की दी। ऐबै निं हुंह तिन्‍नां लै सज़ा दैणैं का पिछ़ू हटदअ। 9 इसहाके आद-लुआदे पूज़ा करने गान-स्तान करनै पठ बरैबाद। इज़राईले पबित्र गान-स्तान पल़णै उज़र। राज़अ जरोबाम अर तेऊओ खिंब करनअ मुंह तलबारा करै खतम।"

आमोस अर अमास्या

10 अमास्या ज़ुंण बेतेल नगरी बेदीओ प्रोहत आसा थिअ, तेऊ दैनअ इज़राईले राज़ै जरोबामा लै समाद, "आमोस आसा तेरै बारै द्रोह करना लै इज़राईल मुल्खे लोगा शगरेऊंदअ लागअ द। ज़ुंण सह गल्‍ला खोज़ा, तेता करै हणैं लोग तेरै खलाफ। 11 आमोस बोला इहअ, ‘जरोबाम पाणअ दुशमणा तलबारा करै मारी, इज़राईली लागणअ आपणैं देशा छ़ाडी गलामी दी डेऊणअ।’"

12 अमास्या बोलअ आमोसा लै, "गूरा हुअ बै! तूह निखल़ इधा का पोर्ही, आपणैं देश यहूदा लै डेऊ, संघा रह तिधी आपणीं इना गल्‍ला खोज़दअ लागी। आपणअ ज़िऊंण बी कर तिधी। 13 ऐबै निं इधी बेतेल नगरी इना गल्‍ला खोज़दअ लागी। अह भबन आसा इज़राईल मुल्खो ज़िधी राज़अ पूज़ा करा।"

14 आमोसै दैनअ ज़बाब, "नां हुंह गूर आथी, नां हुंह गूरो शोहरू आथी। हुंह त एक फुआल अर फेडूए बूटे बागो छांगू। 15 पर बिधाता निंयं हुंह भेडा-बाकरीए हेल़्ही का दूर संघा किअ हुकम, ‘डेऊ तूह एछ मेरी परज़ा इज़राईली का मेरी गल्‍ला खोज़ी!’ 16 ऐबै शुण, कि बिधाता तम्हां लै किज़ै बोला। तूह बोला इहअ, ‘इज़राईली जैंदरी निं बिधातो समाद खोज़ी! इहअ निं बोलै कि इसहाके आद-लुआदा लै च़ाल्‍ली आफ़त पल़ी!’ 17 अमास्या, बिधाता बोला ताल्है इहअ, ‘तेरी बेटल़ी हणीं ऐहा नगरी कंज़री, तेरै शोहरू-शोहरी पाणै जुधा दी मारी। तेरी ज़ैगा बांडणी संघा दैणी होरी लै। आप्पू मरनअ तूह छ़ोतलै देशै। इज़राईली निंणै कैद करी तिन्‍नें आपणैं देशा का दूर गलामी लै।’"