आमोस 6

1 तम्हां लै हणीं आफ़त! ज़ुंण सियोन धारा राज्ज़ी-मौज़ी आसा, ज़ुंण सामरी नगरी निहंचै आसा रहै दै! अर तम्हां इज़राईल देशे महान सैणैं लै ज़हा सेटा लोग नसाफ मांगदै डेओआ। 2 कलेना नगरी लै डेओआ, संघा दैआ भाल़णीं, तिधा का डेओआ तम्हैं हमात बडी नगरी लै। तेखअ डेओआ दखणा बाखा पलिश्ती लोगे गात नगरी लै, एथ भाल़ा कि किज़ै हुअ त! ईंयां नगरी अर मुल्ख थिऐ इज़राईल अर यहूदा मुल्खा का खास्सै बडै अर बलबान। 3 ज़ुंण बनाशे धैल़ी एछणी, तम्हैं सैणैं निं तैहा धैल़ीए बारै सोठणअ ई च़ाहंदै। इहअ करै लाअ तम्हैं आप्पू लै बूरअ बगत आणी। 4 तम्हैं सैणैं हआ हाथी दांदा करै सज़ाऊऐ दै पलगा प्रैंदै सुत्तै दै! तम्हैं हआ ज़ैऊंकर मणछा ज़िहै नरम बछ़ाऊणैं प्रैंदै लाम्मै पल़ै दै! तम्हैं खाआ हेल़्ही का मिम्मूं अर होछ़ै खुढै धाचै दै बाछ़ूए नरम शिखा। 5 तम्हैं सैणैं गांठा गिहा, संघा बोला तेता राज़ै दाबेदा ज़िहै कतारै बाज़ी। 6 तम्हैं झुटा दाखो रस भरी-भरी प्रिहै करै, मुंडै लाआ तम्हैं सोभी का किम्मती तेल! पर तम्हैं निं एतो शोग करदै कि युसुफे आद-लुआदा लै एछणअ बनाश। 7 तैही डेऊणैं तम्हैं सैणैं सोभी का आजी गलामी दी। तेखअ हणअ थारअ सुख-भोग मज़अ खतम।

8 स्वर्गे सारी सैनो मालक बिधाता काढै आपणैं सोह, सह बोला इहअ,

"मुंह आसा तेता का नफरत ज़ेतो याकबे आद-लुआद घमंड करा।

मुंह लागा तिन्‍नें मैहला का खास्सी च़िल़्ह,

तैही दैणअ मुंह सामरी नगरी अर तेते सोभी च़िज़ा दी तिन्‍नें दुशमणा कबज़अ करनै।"

9 ज़ै कहा घअरै दस मर्ध बी जुधा का ज़िऊंदै बच़े, तिंयां बी मरनै। 10 मूंऐं दै मणछे रिश्तैदार, ज़हा का ल्हासा दाबी डाहणें ज़िम्मैंबारी हणीं, तिन्‍नां काढणीं ल्हास घअरा का बागै। तिन्‍नां पुछ़णअ तेऊ का ज़ुंण घअरै ज़िऊंदअ हणअ बच़अ द, "ताह संघै कुंण होर बी आसा?"

तेऊ मणछा दैणअ ज़बाब, "होर निं कोह आथी!"

तेखअ बोल़णअ तिन्‍नां रिश्तैदारा, "च़ुप्पी रहै! बिधातो नाअं काढदअ निं लागी।"

11 ज़ेभै बिधाता हुकम करनअ, दुशमणा पाणै बडै-होछ़ै सोभ घअर ढोल़ी, तेते करनै तिन्‍नां ठोर-ठोर।

12 लादै दै घोल़ै निं बडी-बडी टोल्हा प्रैंदी ठुर्हदै,

बल्दा करै निं कोह समुंदरै हल़ लांदै!

पर तज़ी बी बणाअं तम्हैं नसाफ करनैओ बधान बिश! अर धर्म बणाअं नागदौण कल़ुई बुटी ज़िहअ। 13 तम्हैं हआ बृथा च़िज़ा करै खुश, तम्हैं बोला बडै घमंडा संघै, "हाम्हैं ज़िती आपणैं ज़ोरै करनाईम नगरी।"

14 तैही बोला स्वर्गे सारी सैनो मालक बिधाता आप्पै इहअ, "इज़राईलीओ, मंऐं लाई थारै देशा लै कबज़ै करदी पराऐ देशे सैना छ़ाडी। तिन्‍नां हंतणैं तम्हैं उतरा बाखा हमात ज़ोता उंधै दखण अराबा रेगीस्ताने गाडा तैणीं।"